Pavieł Łatuška zhadaŭ pra svaje kantakty z Natallaj Kačanavaj i adkazaŭ, ci lohkaja ŭ jaje ruka.
Padčas hutarki ŭ novym vypusku jutub-kanała «Žyćcio-malina» kiraŭnik Narodnaha antykryzisnaha ŭpraŭleńnia, a ŭ minułym ministr kultury i dyrektar Kupałaŭskaha teatra Pavieł Łatuška zhadaŭ niekalki svaich sustreč z Natallaŭ Kačanavaj.
«Kali ja byŭ ministram, jana była staršynioj Navapołackaha harvykankama. Dyk jana absłuhoŭvała na pryjomach u Połacku. Heta było 1150-hodździe Połacka», — zhadaŭ Pavieł Łatuška adnu ź pieršych sustreč z Natallaŭ Kačanavaj.
Na ŭdakładniajučaje pytańnie, što aznačaje «absłuhoŭvała», były čynoŭnik adkazaŭ: «Nalivała».
«Surjozna? Chadziła z butelkaj, nalivała?», — ździviŭsia Miełkazioraŭ.
«Tak, — paćvierdziŭ Łatuška i dadaŭ: — Heta rola staršyniaŭ rajvykankamaŭ. Nu nie tolki ŭ hetym, kaniečnie, ale ŭ tym liku».
«Dyk ruka ŭ jaje lohkaja ci nie, kali jana nalivała?» — spytaŭ Miełkazioraŭ.
«Ja nie skažu, kab aktyŭna piŭ, tamu ja nie hatovy skazać, acanić», — z uśmieškaj adkazaŭ były čynoŭnik.
Jak zhadvaje Łatuška, paźniej, kali Natalla Kačanava stała vice-premjeram, to paprasiła jaho sustrecca:
«Jana zaprasiła mianie, kali ja pryjechaŭ u kamandziroŭku z Paryža, i vielmi sa mnoj raiłasia, kaho treba zrabić novym ministram kultury, ministram adukacyi, ministram infarmacyi».
Taja razmova, pa słovach byłoha čynoŭnika, była «zacikaŭlenaj» i praciahvałasia dźvie z pałovaj hadziny. Ale paźniej Kačanava stała toj asobaj, jakaja pačała błakavać jaho prasoŭvańnie.
«Pra heta mnie skazaŭ Ryžankoŭ asabista. Kali ja ŭžo viartaŭsia z Francyi, jana błakavała tam niejkija kroki napierad».
Jak Kačanavu ŭ Kupałaŭskim sustreła prybiralščyca
Łatuška zhadvaje vypadak, jaki adbyŭsia ŭ čas jaho dyrektarstva ŭ Kupałaŭskim teatry. Na toj čas Natalla Kačanava ŭznačalvała Administracyju Łukašenki:
«Pamiataju, jak jana abraziłasia ŭ Kupałaŭskim teatry. Pierad balem [u 2019 hodzie], byli repietycyi. Pavinien byŭ pieršy Kupałaŭski bal adbycca, Łukašenka skraŭ jaho faktyčna. Tady Ejsmant dała daručeńnie, što pieršym balem pavinien być tolki vienski bal, pavinien być tolki Łukašenka.
Kačanava pryjšła ŭ Kupałaŭski teatr. Mnie patelefanavali z achovy, nu i ja nie paśpieŭ spuścicca. I jaje sustreła, pry ŭsioj pavazie da hetaj prafiesii, prybiralščyca ź viadrom, sa švabraj.
I ja pamiataju, my padymajemsia pa leśvicy, i mnie Kačanava vyhavorvała: «Što ž heta takoje, što mianie prybiralščyca sustrakaje?»
Ciapier čytajuć
Represii razhaniajucca ci zapavolvajucca? Davajcie ličyć6
Represii razhaniajucca ci zapavolvajucca? Davajcie ličyć
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach1010
Kamientary
Da i povadki,i vośpitanije.
Tolko pri kałchoźnikie ETO mohło vypłyť v prorubi navierch.