Što IT-biznes dumaje pra Hannu Rabavu, novuju kiraŭnicu Parka vysokich technałohij?
Spadziavańni jość u achvotnych padaić dziaržavu, a bujnoj ajcišcy prosta abyjakava, chto na čale PVT.
Novaj kiraŭnicaj Parka vysokich technałohij stała Hanna Rabava. Raniej jana zajmała pasadu namieśnicy ministra suviazi i infarmatyzacyi.
Surazmoŭcy «Našaj Nivy» apisvajuć čynoŭnicu pieravažna pryjazna: maŭlaŭ, pryjemna, kali biełaruski čynoŭnik u takich tonkich śfierach, jak IT, časam razumieje, pra što kaža.
U Minsuviazi Rabava kuryravała infarmatyzacyju. Što heta značyć? U tym liku jana mieła ŭpłyŭ na raźmierkavańnie biudžetu na prajekty pa ličbavizacyi. Tamu tyja kampanii, jakija dziejničali na ŭnutranym rynku, viadomy Rabavaj, a jana sama viadoma mieniedžaram i ŭłaśnikam.
Pa słovach surazmoŭcaŭ «Našaj Nivy», pieradusim čakańni ad Rabavaj isnujuć voś u takich kampanij — zacikaŭlenych u dziaržaŭnych padradach.
«Ź jaje fihuraj źviazvajuć łabizm novych prajektaŭ, vybivańnie biudžetaŭ, padtrymku biełaruskich kampanij na biełaruskim ža rynku. Słovam, niekatoryja spadziajucca pierabić finansavy hoład zamovami ad samaha vialikaha zakazčyka — dziaržavy. Ale nakolki abhruntavanyja takija spadziavańni ja nie viedaju», — kaža adzin z IT-biznesmienaŭ.
«Toje, čym jana hanarycca, — heta zbolšaha biestałkovaja «Vitryna ličbavych prajektaŭ Biełarusi»… Ja b čakaŭ razvarotu ajciški ŭnutr krainy», — pahadziŭsia inšy mieniedžar.
Siońnia častka biełaruskaj IT-haliny nasamreč znachodzicca ŭ zaniapadzie.
Tyja hulcy, jakija zmahli vyvieźci ludziej i zachavać kantrakty, abo znajści novyja — jany, jak kažuć sami mieniedžary, «bolš cikaviacca ŭmovami dla IT u susiednich jurysdykcyjach, čym u Biełarusi».
Tyja ž kampanii, u asnoŭnym ź dziasiatkami ci sotniami supracoŭnikaŭ, jakija nie zdoleli znajści siabie na zamiežnych rynkach paśla 2022 hoda, u asnoŭnym spadziajucca na zamovy na rynkach SND. Z ulikam śpiecyfiki, viadoma, na hetych rynkach sapraŭdy samy vialiki zamoŭca — heta dziaržava i kaladziaržaŭnyja kamiercyjnyja struktury.
U niekatorych śfierach biełaruskaha IT nasamreč isnujuć kryŭdy i nieparazumieńni ŭ acency taho, što mnohija pa-sapraŭdnamu vialikija prajekty pa ličbavizacyi (niekatoryja ź jakich skončylisia pšykam) dziaržava addavała zamiežnym vykanaŭcam.
«Kali ŭpłyvu Rabavaj chopić adkusić biudžetnych hrošaj u adnych i pierakłaści ich u kišeni IT-kampanij — nu, dumaju, voś hetaha ad jaje čakajuć tyja, chto choča padaić dziaržavu», — dadaŭ mieniedžar inšaj kampanii.
Apytanyja sychodziacca ŭ dumcy, što spadziavańni ź fihuraj novaha načalnika źviazvaje absalutnaja mienšaść biznesaŭ. Niekatoryja, navat budučy rezidentami PVT, daviedvalisia ab pryznačeńni Rabavaj ad «Našaj Nivy».
«Možna pryznačyć tudy Rabavu, možna pryznačyć tudy Katkaviec. U pryncypie, jakaja roźnica? Jany ničym nie zajmajucca. Administracyja PVT, pa sutnaści, siadzić na pryjomie novych rezidentaŭ i na raźmierkavańni sabranych praz unioski hrošaj (1% ad abarotu kožnaha rezidenta), staŭšy ŭžo daŭno takim ajcišnym vykankamam: dajcie nam da abiedu spravazdaču z patrebnymi pakazčykami, ściah vyvieście, zhanicie supracoŭnikaŭ zadanacić.
Tamu biznesu ad administracyi PVT ničoha nie treba — aby b tolki nie pieraškadžali. A nijakich fundamientalnych prablem IT-haliny z zamiežnymi bankami, partniorami, pierajezdami i inšym jana vyrašyć nie zmoža», — kaža inšy biznesmien, čyj biznes nie zacikaŭleny ŭ supracoŭnictvie ź dziaržavaj.
«Sankcyj novaja administracyja PVT nie zdymie, prymać płaciažy banki nie prymusić, klijentaŭ pracavać z vykanaŭcami z RB nie prymusiać taksama. I ŭvohule heta nie jaje sprava: voś hetymi rečami, pa častcy «suviazi sa źniešnim śvietam», u Emiratach i Vienhryi zajmajecca [były kiraŭnik PVT Usievaład] Jančeŭski. Nie asabliva paśpiachova, treba skazać. Dla taho, kab viarnuć niejkaje žyćcio ŭ IT, patrebny zusim inšyja leki», — reziumavaŭ inšy surazmoŭca.
Asudžany za «Hajun» da chimii brat Ihara Łosika ŭciok ź Biełarusi3
Asudžany za «Hajun» da chimii brat Ihara Łosika ŭciok ź Biełarusi
Piśmieńnica Taćciana Zamiroŭskaja raskazała pra novuju knihu, sny pra Łukašenku, košt žyćcia ŭ Ńju-Jorku i toje, čamu złuje na niekatorych biełarusaŭ1616
Kamientary