Kitajskija aŭto ŭsio čaściej sustrakajucca na biełaruskich darohach. Ale ci varta ich kuplać? Raskazvajuć uładalniki
U Biełarusi raście kolkaść aŭto kitajskich brendaŭ. Jakija mašyny karystajucca popytam i jakija plusy i minusy jość u hetych marak?
Kitajskaja ekspansija biełaruskich daroh
Zhodna z danymi Biełaruskaj aŭtamabilnaj asacyjacyi, na dolu «BiełDžy» prychodzicca kala 50-55% prodažaŭ novych aŭto aficyjnymi dylerami. Jašče da 25% prypadaje na aŭtamabili kitajskich marak, jakija vyrablajucca niepasredna ŭ Kitai.
Adnak treba ŭličvać, što impartam kitajskich aŭto zajmajucca nie tolki aficyjnyja dylery. Da taho ž z Kitaja ŭvoziać i patrymanyja mašyny. Tamu kolkaść aŭtamabilaŭ kitajskich brendaŭ na našych darohach pavialičvajecca ŭ bolšaj stupieni, čym demanstruje statystyka Biełaruskaj aŭtamabilnaj asacyjacyi.
Tym nie mienš, luboŭ biełarusaŭ da aŭto made in China — heta šmat u čym luboŭ pad prymusam, da jakoj aŭtaamataraŭ pryviali sankcyi.
Jakija marki i madeli ŭ topie
Z kitajskich brendaŭ na našym rynku lidziruje Voyah z madellu Free. Aproč elektramatora, jaki pryvodzić u ruch koły, aŭtamabil maje pad kapotam 1,5-litrovy bienzinavy ruchavik, jaki vykonvaje rolu hienieratara, što zaradžaje batareju.
Krasovier Voyah Free atrymaŭ papularnaść praz pryvabny źniešni vyhlad, funkcyjanalnaść i davoli vysokuju jakaść vykanańnia.
Biełarus, jaki kala dvuch hadoŭ vałodaje takoj mašynaj, kaža, što ŭ cełym joj zadavoleny, choć u płanie ekanamičnaści jość pytańni. Asabliva kali razmova idzie pra dalokija pajezdki, pry jakich mator-hienieratar uvieś čas pracuje.
«Raschod paliva ničym nie mienšy, čym u majho papiaredniaha krasoviera, jaki mieŭ dyzielny ruchavik», — śćviardžaje aŭtaamatar.
Ale hałoŭnym minusam ułaśnik Voyah Free nazyvaje toj fakt, što na hetyja aŭto mocna ŭpała cana.
Dva hady tamu Voyah Free ŭ aficyjnaha dylera pradavaŭsia pa cenach ad 159 tysiač rubloŭ. Siaredni kurs dalara ŭ žniŭni 2023 hoda skłaŭ 3,15 rubla. Atrymlivajecca, što Voyah Free tady kaštavaŭ kala 50 500 dalaraŭ.
Siońnia ceny na anałahičnyja novyja aŭto ŭ dylera pačynajucca z 108 800 rubloŭ, što składaje kala 36 000 dalaraŭ
Heta davoli typovaja situacyja, kali ceny na kitajskija aŭtamabili mocna źnizilisia. Kitajskija aŭtavytvorcy lubiać chutka rabić restajlinh i pradavać abnoŭlenuju viersiju tańniej, čym papiaredniuju.
Tyja, chto dva hady tamu addaŭ krychu bolš za 50 tysiač dalaraŭ za novy Voyah Free, ciapier mohuć pasprabavać vyručyć za ich kala 26-28 tysiač dalaraŭ. Heta amal u dva razy mienš.
Ułaśnik Voyah kaža, što za dva hady karystańnia jaho aŭto nie maje ržy. Ale tyja ž, chto pracuje na aŭtaservisach, zaŭvažajuć, što kitajskija mašyny hnijuć chutčej za jeŭrapiejskija.
Jaki jon, premium z Kitaja?
Aproč Voyah davoli papularnymi kitajskimi brendami źjaŭlajucca Dongfeng, Haval i BYD.
Siarod tak zvanych premijalnych kitajskich marak vyłučajuć Zeekr i Li Auto.
Biełarus, jaki ŭ 2023 hodzie pryvoziŭ dla prodažu mašyny Zeekr 001, kaža, što sama pa sabie mašyna vielmi cikavaja, jak ź vizualnaha, tak i z techničnaha punktaŭ hledžańnia.
«Heta sapraŭdy kłasny aŭtamabil, ale dakładna nie za tyja hrošy, što jon spačatku kaštavaŭ. Kali paśla Zeekr siadaješ u BMW ci Porsche — pačynaješ razumieć, što kitajskim aŭtavytvorcam pakul daloka da sapraŭdnaha premiumu», — miarkuje surazmoŭca.
«Kiravalnaść u niemcaŭ lepšaja, adčuvajecca, što ŭsio zroblena pradumana i daskanała. U Zeekr bieźlič opcyj, ale kali paraŭnoŭvać z Porsche, to adčuvajecca niejkaja niedapracavanaść.
Prynamsi, pa stanie na 2023 hod, kali roźnica ŭ canie była nie takaja, jak ciapier, to Zeekr dla siabie mnie nie byŭ cikavy. Pa ciapierašnich cenach, mahčyma, varyjant niadrenny. Hałoŭnaje, kab pierastaŭ tak chutka hublać u canie», — ličyć aŭtaamatar.
Mužčyna kaža, što zakinuŭ pryhon kitajskich aŭto na prodaž praz toje, što kitajskija aŭtavytvorcy nieadnarazova źnižali ceny na novyja mašyny, jak z vychadam restajlinhu, tak i prosta praz toje, što im treba zmahacca za spažyŭca.
«Mahčyma, ciapier hety praces zapavoliŭsia, ale hod-dva tamu ceny padali nastolki chutka, što pryviezieny niadaŭna aŭtamabil, jaki mieŭ nibyta dobry zazor u canie, stanaviŭsia niavyhadny dla pieraprodažu», — tłumačyć aŭtamabilist.
Na prykładzie taho ž Zeekr možna ŭbačyć, jak viasnoj 2023 hoda takija mašyny pradavalisia za 74-75 tysiač dalaraŭ. Ciapier reštki novych Zeekr 001 (2024 hoda vytvorčaści) pradajuć za 45-51 tysiaču dalaraŭ.
A za mašyny z prabieham ciapier prosiać ad 30 tysiač dalaraŭ.
Jakija jašče minusy ŭ kitajskich aŭto?
Kali razmova idzie pra redkija madeli, jakija nie pastaŭlajucca ŭ Biełaruś aficyjna abo ich prodažy byli vielmi nizkija, to ich uładalniki sutykajucca z adsutnaściu zapčastak u najaŭnaści, pakolki pradaŭcam niavyhadna trymać ich.
Kali ŭ dadatak takaja madel uvohule vypuskałasia ŭsiaho 2-4 hady, to deficyt zapčastak budzie jašče bolš adčuvalnym. Jak vynik, z časam likvidnaść takich mašyn budzie na minimalnym uzroŭni, što znoŭ ža budzie adbivacca na canie.
Ciapier čytajuć
Cichanoŭski patłumačyŭ, čamu jon tak pavodziŭ siabie ŭ Ńju-Jorku69
Kamientary
Takoj podchod vo vsiom kitajskom.