Mižnarodnyja ekśpierty acanili rasijski kantynhient na vučeńniach «Zachad-2025»
Mižnarodnaja inicyjatyva iSANS apublikavała analiz situacyi vakoł sumiesnych biełaruska-rasijskich vučeńniaŭ «Zachad-2025», jakija prachodziać z 12 da 16 vieraśnia. Ekśpierty acanili kolkaść i skład rasijskaha kantynhientu, što ŭdzielničaje ŭ manieŭrach na terytoryi Biełarusi, piša Reform.news.
Pavodle źviestak ekśpiertaŭ, u Lidu prybyli dva rasijskija źniščalniki Su-30 i šeść frantavych bambavikoŭ Su-34, a na aeradromie ŭ Mačuliščach raźmiaścilisia jašče piać viertalotaŭ. Jašče ŭ žniŭni byli pierakinutyja padraździaleńni 4-j tankavaj dyvizii.
Pry hetym u Biełarusi ŭžo znachodzilisia vajskoŭcy 71-j motastrałkovaj i 98-j pavietrana-desantnaj dyvizij, jakija ŭdzielničali ŭ vučeńniach ADKB «Uzajemadziejańnie-2025». Kali ŭličyć ich, ahulnaja kolkaść rasijskich vajskoŭcaŭ, zadziejničanych u vučeńniach, składaje prykładna 400 čałaviek.
Ekśpierty padkreślivajuć, što ŭ paraŭnańni z vučeńniami «Zachad-2021» ciapier niama maštabnaha pierakidańnia vojskaŭ: abjom ešałonaŭ z technikaj i asabovym składam u dziesiać razoŭ mienšy.
Da vučeńniaŭ taksama dałučanyja biełaruskija vojski: miechanizavanyja, artyleryjskija, radyjoelektronnaj baraćby, materyjalnaha zabieśpiačeńnia, a taksama avijacyjnyja i zienitna-rakietnyja padraździaleńni. Asnoŭnyja miescy praviadzieńnia manieŭraŭ — palihony «Barysaŭski» (dzie projdzie aktyŭnaja faza) i «Lasišča» ŭ Słuckim rajonie, umacavanyja rajony na Vaŭkavyskim i Smarhonskim kirunkach. Zadziejničanyja taksama aeradromy ŭ Baranavičach, Mačuliščach, Lidzie, jašče adzin učastak aŭtadarohi vykarystoŭvajecca jak palavy aeradrom. Pavodle Minabarony Biełarusi, vučeńni pravodziacca na palihonach u hłybini i na ŭschodzie krainy.
U ahladzie iSANS pryvodzicca infarmacyja pra incydent ź bieśpiłotnikami: u noč z 9 na 10 vieraśnia nie mienš za 19 rasijskich dronaŭ zalacieli ŭ pavietranuju prastoru Polščy. Adnačasova ŭ Biełarusi było zafiksavana kala 27 bieśpiłotnikaŭ, ź jakich da siami mahli taksama pieralacieć miažu. Dla pierachopu ŭzdymalisia źniščalniki i viertaloty.
Pavodle acenak ekśpiertaŭ, najbolš vierahodna, što paśla zakančeńnia «Zachadu-2025» rasijskija vajskoŭcy buduć vyviedzienyja ź Biełarusi nazad u Rasiju. Pry hetym ahresija suprać Ukrainy ci krain NATA ličycca małavierahodnaj.
Ale ryzyka pravakacyj zachoŭvajecca — mahčymyja karotkaterminovyja parušeńni pavietranaj prastory, vykarystańnie bieśpiłotnikaŭ abo inšyja padobnyja dziejańni.
Litoŭskaja armija: Ryzyka napadu padčas vučeńniaŭ «Zachad» nizkaja, ale vierahodnaść pravakacyj uzrasła
Siońnia pačynajucca biełaruska-rasijskija vučeńni «Zachad-2025»
Polšča zakryła miažu ź Biełaruśsiu
MZS Rasii zapatrabavała ad Polščy nie zakryvać miažu ź Biełaruśsiu i namiaknuła na nastupstvy
Polšča razhortvaje na miažy ź Biełaruśsiu 40 tysiač vajskoŭcaŭ
Ciapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary