Vajna66

«Pieravychavać, militaryzavać i rusifikavać»: Rasija stvaryła biesprecedentnuju sistemu dla vykradzienych ukrainskich dziaciej

U novaj spravazdačy łabaratoryja humanitarnych daśledavańniaŭ Jelskaha ŭniviersiteta raskryvaje isnavańnie sietki z 210 ustanoŭ pa ŭsioj Rasii i na akupavanych terytoryjach, pryznačanych dla ideałahičnaj apracoŭki ŭkrainskich dziaciej.

Ilustracyjnaje fota. Ukrainskija dzieci na minskim čyhunačnym vakzale. Vierasień 2023 hoda. Fota: BiełTA

Łabaratoryja humanitarnych daśledavańniaŭ Jelskaha ŭniviersiteta (HRL) apublikavała spravazdaču pad nazvaj «Vykradzienyja dzieci Ukrainy: u centry rasijskaj sietki pieravychavańnia i militaryzacyi».

U joj analizujecca, jak Maskva stvaryła maštabnuju i biesprecedentnuju sietku dla intehracyi departavanych ukrainskich dziaciej u rasijskuju vajennuju mašynu. Ź niekatorymi klučavymi vysnovami daśledavańnia znajomić francuzskaje vydańnie Le Monde.

Pavodle acenak HRL, u rukach Rasii zaraz znachodzicca da 35 000 takich dziaciej. U spravazdačy zafiksavana isnavańnie jak minimum 210 ustanoŭ pa ŭsioj Rasii i na akupavanych terytoryjach Ukrainy, dzie dziaciej padviarhajuć prymusovamu «pieravychavańniu» i militaryzacyi.

Maštab hetaj sietki, jakaja praciahvaje raźvivacca, ašałamlaje. Jana raspaścirajecca ad Čornaha mora da ŭschodniaha ŭźbiarežža Cichaha akijana, prachodziačy praź Sibir, i achoplivaje bolš za 5600 kiłamietraŭ i 59 rehijonaŭ u Rasii i akupavanaj Ukrainie.

Daśledčyki vyznačyli vosiem typaŭ miescaŭ: vajskovyja vučyliščy, vajskovyja bazy, miedycynskija ŭstanovy, relihijnyja abjekty, škoły i ŭniviersitety, haścinicy, centry dapamohi siemjam, dziciačyja damy i, čaściej za ŭsio, letnija łahiery i sanatoryi.

Pieryjad znachodžańnia dziaciej u hetych miescach rozny. Niekatorych nakiroŭvali tudy časova, i jany viarnulisia dadomu, inšych utrymlivali niavyznačany termin. U niekatorych vypadkach dzieci, jakija prajšli praz hetyja ŭstanovy, byli ŭklučany ŭ rasijskuju prahramu prymusovaha ŭsynaŭleńnia, kab trapić u rasijskija siemji i stać hramadzianami Rasii.

«Pramyvańnie mazhoŭ»

Rasśledavańnie HRL ustanaviła, što «Rasija vykarystoŭvaje patencyjna biesprecedentnuju sistemu masavaha pieravychavańnia, vajennaj padrychtoŭki i internataŭ, zdolnych raźmiaścić dziasiatki tysiač ukrainskich dziaciej na praciahły pieryjad».

Jano taksama pakazvaje hłybokuju ŭciahnutaść i saŭdzieł rasijskaha ŭrada ŭ miechanizmach finansavańnia, transparciroŭki, vajennaj padrychtoŭki i viarboŭki. Bolš za pałovu vyjaŭlenych abjektaŭ (jak minimum 106 z 210) naŭprost kirujucca fiederalnymi abo miascovymi orhanami ŭłady Rasii. Kab pryjści da takich vysnoŭ, daśledčyki spałučyli analiz infarmacyi z adkrytych krynic — časta z aficyjnych rasijskich dakumientaŭ — z vyvučeńniem spadarožnikavych zdymkaŭ.

Pavodle spravazdačy, mierapryjemstvy pa «pieravychavańni» ŭkrainskich dziaciej pravodzilisia ŭ bolšaści (61,9%) vyjaŭlenych miescaŭ. Jany ŭklučali kulturnyja, patryjatyčnyja abo vajennyja prahramy, jakija adpaviadajuć intaresam Maskvy i źjaŭlajucca častkaj bolš šyrokaj kampanii, jakaja pravodzicca pa zahadzie Uładzimira Pucina dla rusifikacyi žycharoŭ akupavanych terytoryj.

Hetaja sistematyčnaja i naŭmysnaja kampanija vidavočna nakiravana na dziaciej, — udakładniajecca ŭ dakumiencie, — asabliva na tych, chto naležyć da ŭraźlivych katehoryj, takich jak siroty i dzieci, što žyvuć pablizu linii frontu.

«Heta najbujniejšaja apieracyja pa vykradańni dziaciej z časoŭ Druhoj suśvietnaj vajny, kali nacysty vykrali tysiačy polskich dziaciej, — zajaviŭ vydańniu Nataniel Rejmand, vykanaŭčy dyrektar HRL. — Rasija stvaryła sistemu dla ideałahičnaj apracoŭki ŭkrainskich dziaciej, ich vajennaj padrychtoŭki i padmieny ŭkrainskaj nacyjanalnaj identyčnaści na rasijskuju».

Vajennaja padrychtoŭka

Uładzimir Pucin na praciahu bolš jak dziesiaci hadoŭ uzmacniaje patryjatyčnaje vychavańnie i militaryzacyju rasijskaj moładzi, ale ciapier u hetyja prahramy ŭklučajuć i ŭkrainskich niepaŭnaletnich va ŭzroście ad 8 da 17 hadoŭ.

Heta adbyvajecca jak minimum u 39 z 210 vyjaŭlenych ustanoŭ, pryčym praparcyjanalna ich kolkaść amal adnolkavaja jak u Rasii, tak i na akupavanych terytoryjach. Dziaciej navučajuć vieści boj, jany ŭdzielničajuć u paradach, vyvučajuć vajennuju historyju i vyrablajuć abstalavańnie dla rasijskich uzbrojenych sił, u tym liku drony.

U spravazdačy adznačajecca, što niemahčyma vyznačyć, ci adpraŭlali dziaciej, jakija ŭdzielničali ŭ hetych prahramach, na front va Ukrainu. Adnak vypadki pryzyvu ŭkrainskich dziaciej u rasijskuju armiju ŭžo fiksavalisia. Tak, u studzieni ŭkrainski Centr procidziejańnia dezynfarmacyi paviedamiŭ, što dzieci z terytoryj, akupavanych Rasijaj z 2014 hoda, byli pryzvany ŭ rasijskuju armiju i zahinuli ŭ bajach u 2022 hodzie.

Maskva zajmałasia departacyjaj, pieravychavańniem, militaryzacyjaj i prymusovym usynaŭleńniem ukrainskich dziaciej na akupavanych terytoryjach Kryma, Łuhanskaj i Danieckaj abłaściej jašče z 2014 hoda, paśla pačatku vajny na Danbasie. Ale paśla poŭnamaštabnaha ŭvarvańnia 2022 hoda hetyja namahańni značna pašyrylisia i nabyli bolšy maštab, — padkreślivajecca ŭ dakumiencie.

Aŭtary śćviardžajuć, što dokazy, pradstaŭlenyja ŭ hetaj i papiarednich spravazdačach, składajuć tryvałuju asnovu dla vyznačeńnia dziejańniaŭ Rasii jak vajennych złačynstvaŭ i złačynstvaŭ suprać čałaviečnaści.

Kamientary6

  • imperyja — kraina dziŭnaj, prosta-taki kaśmičnaj harmonii: u joj ahidna absalutna ŭsio
    18.09.2025
    Maskoŭskaja imperyja — kraina dziŭnaj, prosta-taki kaśmičnaj harmonii: u joj ahidna absalutna ŭsio. Ułada, “apazycyja”, klimat, darohi, ŚMI, ekanomika — nivodnaja detal nie psuje karciny, vyłomvajučysia z ahulnaha stylu
  • russkij mir
    18.09.2025
    Russkij nacizm .....
  • Imia
    18.09.2025
    Kolki kłopatu. U bssr sami baćki sa svaimi dzietkami robiać toje ž samaje.

Ciapier čytajuć

«Hubazikaŭcy schilajuć Kaleśnikavu da vysyłki, ale jana nie choča»1

«Hubazikaŭcy schilajuć Kaleśnikavu da vysyłki, ale jana nie choča»

Usie naviny →
Usie naviny

Vystup hurta «Technałohija», jaki płanavaŭsia siońnia ŭ Pleščanicach, admienieny3

Kučuk: Ja dva razy płakaŭ u kamiery naŭzryd, kab źniać psichałahičnuju napruhu

Cichanoŭskaja lacić u ZŠA. Što tam płanujecca?13

U vioscy pad Minskam pradajuć katedž z łaźniaj, padobnaj na haściničny numar1

U manastyr Natalla Piatkievič padabrała da chustački francuzskaje palito18

U Padmaskoŭi zahinuŭ kiraŭnik kampanii-pastaŭščyka kampazitnych materyjałaŭ dla MS-21 i paranieny budaŭnik kaśmičnaha centra, adkrytaha Pucinym3

Kibierataka paralizavała pracu aeraportaŭ pa ŭsioj Jeŭropie2

U Trajeckim pradmieści Minska pradajecca kvatera płoščaj 118 kvadrataŭ1

Jak skłałasia ŭ emihracyi žyćcio 22‑hadovaj «terarystki» Danuty Pieradni, jakuju vyzvalili pa pamiłavańni6

bolš čytanych navin
bolš łajkanych navin

«Hubazikaŭcy schilajuć Kaleśnikavu da vysyłki, ale jana nie choča»1

«Hubazikaŭcy schilajuć Kaleśnikavu da vysyłki, ale jana nie choča»

Hałoŭnaje
Usie naviny →

Zaŭvaha:

 

 

 

 

Zakryć Paviedamić