«Dumaŭ, miažu zakryjuć tolki na ŭjezd». Biełarus raskazaŭ, jak viartaŭsia na aŭtamabili ź Jeŭrasajuza

Z 16 žniŭnia 2024 hoda punkt propusku «Brest» na polska-biełaruskaj miažy staŭ adzinym, dzie pamiž Biełaruśsiu i ES bieśpieraškodna prapuskajuć mašyny ź biełaruskimi numarami. Litva z hetaj daty zakryła ŭjezd takim aŭtamabilam, za vyklučeńniem tych, haspadary jakich majuć DNŽ u hetaj krainie. Zabarona dziejničaje i z boku Łatvii.

Praŭda, na pieryjad zakryćcia miažy pamiž Biełaruśsiu i Polščaj litoŭski bok časova dazvoliŭ prajazdžać aŭtamabilam ź biełaruskimi numarami. Ale havorka idzie tolki pra viartańnie ŭ Biełaruś.

Biełarus Alaksandr u pačatku vieraśnia zajechaŭ u Polšču na svajoj mašynie praz punkt propusku «Brest». Navina pra zakryćcio polskaj miažy zaśpieła jaho ŭ harach Čechii.

«Na toj momant ja padumaŭ, što vypuścić to pavinny. Miažu kali i zakryjuć, to, chutčej za ŭsio, na ŭjezd. Tolki zasialiŭsia ŭ hatel, napieradzie piać dzion adpačynku, tamu vyrašyŭ nie dziorhacca», — raskazvaje surazmoŭca.

Kali 12 vieraśnia stała zrazumieła, što miažu zakryli i na ŭjezd, i na vyjezd, Alaksandr pačaŭ manitoryć čaty. Tam na nastupny dzień i daviedaŭsia z paviedamleńniaŭ, što źjaviłasia mahčymaść prajechać praź Litvu.

Spačatku nie było zrazumieła, ci možna prajechać mienavita praź litoŭskuju terytoryju, ale potym niechta ŭ čacie atrymaŭ aficyjny adkaz, što sapraŭdy možna jechać tranzitam na miažu ź Biełaruśsiu dla tych, chto zajechaŭ praz Polšču.

«U mianie pa płanie adpačynak byŭ da 14 abo 15 vieraśnia. Vyrašyŭ pajechać u paniadziełak, 15-ha. Padumali, što ŭsie pajeduć u niadzielu nazad, — kaža Alaksandr. — I kali mierkavać pa čatach, u subotu i niadzielu praktyčna nie było čerhaŭ na vyjezd. Ranicaj u paniadziełak, kali ja vyjazdžaŭ z Varšavy, taksama pisali pra siem-dziesiać mašyn. Ale kali padjechaŭ da litoŭskaj miažy da hadziny čaćviortaj, tam užo sabrałasia čarha na vyjezd z 80 mašyn, što dla «Kamiennaha Łoha» niamała».

Alaksandr adznačaje, što paśla taho, jak jon padjechaŭ da miažy, tudy adrazu zapuścili kala 30 mašyn — čarha prykmietna źmienšyłasia. Ale paśla daviałosia pastajać jašče niekalki hadzin: na litoŭskuju miažu ŭdałosia zajechać u rajonie vośmaj hadziny viečara.

«Pamiežnik spytaŭ, u nas DNŽ ci vizy, bo z DNŽ možna biez pytańniaŭ jechać na biełaruskich numarach, a voś ź vizami — tolki tranzitam i kali zajechaŭ praz Polšču. Bolš ničoha nie pytalisia, usie razumiejuć situacyju. U vyniku litoŭskuju miažu prajechaŭ chvilin praz 20».

Pa słovach Alaksandra, da viečara paniadziełka na vyjezd ź Litvy čarha pavialičyłasia: pierad litoŭskim šłahbaŭmam u «Miednikach» (ź biełaruskaha boku — «Kamienny Łoh») stajała bolš za sotniu mašyn.

Surazmoŭca adznačaje, što ŭ asnoŭnym aŭtamabili na litoŭskaj miažy byli na biełaruskich numarach, a na numarach ES — litaralna ź dziasiatak mašyn.

Paśla jašče paru hadzin pajšło na čarhu i prachodžańnie biełaruskaj miažy. A ŭ cełym, pa słovach Alaksandra, sama pracedura pierasiačeńnia miažy ŭ vyniku akazałasia davoli budzionnaj.

• 1
• 0
• 0
• 1
• 0
• 0
• 0
• 0