Maładoj mamie z Navahrudka dali 6 hadoŭ za karupcyju. Jana dakazała svaju nievinavataść — ale kali ŭžo adsiedzieła

Pra ŭnikalnuju dla biełaruskich realij situacyju raskazała kiraŭnica jurydyčnaj kansultacyi Navahrudskaha rajona Hrodzienskaj abłasnoj kalehii advakataŭ Viktoryja Vavulina.

Sama historyja datyčycca «hramadzianki K.» i napisanaja ciažkaj jurydyčnaj movaj. Pasprabujem patłumačyć jaje bolš prosta.

Da 2016 hoda Kaciaryna (nazaviem jaje tak, sapraŭdnaje imia nieviadomaje) pracavała na niejkim pradpryjemstvie Navahrudskaha rajona (nazva nie ŭkazvajecca) na kirujučaj pasadzie, źviazanaj ź finansami.

U adnosinach žančyny zaviali kryminalnuju spravu za pieravyšeńnie ŭłady i słužbovych paŭnamoctvaŭ, što paciahnuła ciažkija nastupstvy (č. 3 art. 426 Kryminalnaha kodeksu). Ciažkija nastupstvy ŭ jaje vypadku — toje, što arhanizacyja atrymała 250 tysiač rubloŭ škody, a heta asabliva bujny pamier.

Adnak śledčyja, prakuratura i sud nie ŭziali da ŭvahi, što častku pieryjadu, kali adbyvałasia złačynstva, Kaciaryna nie pracavała, bo znachodziłasia ŭ dekretnym adpačynku.

U vyniku maładaja mama atrymała 6 hadoŭ kałonii — pahražała ad 3 da 10 hadoŭ. Aproč taho, jana atrymała zabaronu zajmacca peŭnaj dziejnaściu (chutčej za ŭsio, zajmać kirujučyja pasady) na praciahu 5 hadoŭ paśla vyzvaleńnia. A taksama była pavinna kampiensavać 250 tysiač rubloŭ «škody». 

Kaciaryna nie zdałasia — jana pisała skarhi i padčas adbyćcia pakarańnia, i navat paśla jaho. Kolki hadoŭ joj daviałosia pravieści ŭ kałonii, nie paviedamlajecca.

I voś pry čarhovaj sprobie, užo paśla vyzvaleńnia, Kaciaryna zdoleła z dapamohaj advakatki Viktoryi Vavulinaj dahrukacca da Viarchoŭnaha suda. Tam pryznali, što finansava-ekanamičnaja ekśpiertyza, jakaja naličyła 250 tysiač škody, była ŭmoŭnaj, a jaje vysnovy — zdahadkami. A značyć, jany nie mahli paćviardžać vinavataść ci nievinavataść žančyny.

«Zychodnyja dadzienyja, źmieščanyja ŭ materyjałach spravy, nie adpaviadali patrabavańniam, pradjaŭlenym da dokazaŭ; kalkulacyi nie ŭtrymlivali daty raźliku i podpisaŭ; pieršasnyja ŭlikovyja dakumienty pradpryjemstva padčas praviadzieńnia pravierki KDK i ekśpiertyzy nie daśledavalisia», — vyrašyŭ Viarchoŭny sud.

Ale asnoŭnaje, što ŭsio ž pryznali, što Kaciaryna, budučy ŭ dekrecie, nie adkazvała za toje, što adbyvałasia na pradpryjemstvie.

U vyniku Viarchoŭny sud admianiŭ apielacyjnaje vyznačeńnie abłasnoha suda i adpraviŭ spravu na novy apielacyjny razhlad — choć, nahadajem, na toj momant Kaciaryna ŭžo adsiedzieła svoj termin.

U vyniku suma škody była źmienšana z 250 tysiač da 6 tysiač rubloŭ. A heta ŭžo nie treciaja, a pieršaja častka artykuła 426 Kryminalnaha kodeksu. Heta mienš ciažkaje złačynstva, maksimalnaje pakarańnie za jaho — 3 hady kałonii, ale možna ŭvohule abyścisia štrafam.

Adnak pakolki z 2016 hoda prajšło zanadta šmat času i terminy daŭniny skončylisia, Kaciarynu vyzvalili ad kryminalnaj adkaznaści. Kanfiskacyju jaje majomaści admianili.

• 3
• 1
• 3
• 11
• 7
• 4
• 4
• 0