Ci zakryje Polšča znoŭ miažu na hetym tydni i čaho jana čakaje ad Minska?

23 vieraśnia premjer-ministr Polščy Donald Tusk abviaściŭ pra adkryćcio biełaruska-polskaj miažy, ale skazaŭ pry hetym, što instrumient zakryćcia pierachodaŭ «zastajecca ŭ rasparadžeńni» polskaha ŭrada i moža być zadziejničany znoŭ, kali «situacyja ź biaśpiekaj pahoršaje». I miaža sapraŭdy adkryłasia.

Adnak 25 vieraśnia polskaja ambasada ŭ Minsku raspaŭsiudziła papiaredžańnie ab «niebiaśpiečnaści pajezdak u Biełaruś» dla polskich hramadzian i zaklikała ich pakinuć krainu. Anałahičnaje papiaredžańnie hučała pierad zakryćciom miažy ŭ pačatku vieraśnia.

Ministr unutranych spraŭ i administracyi Polščy Marcin Kiarviński ŭ efiry TVN24 prakamientavaŭ rašeńnie ŭrada krainy ab adnaŭleńni pracy pamiežnych pierachodaŭ ź Biełaruśsiu, začynienych 12 vieraśnia.

«My kazali, što ŭ suviazi z vučeńniami «Zachad» čakajem roznych pravakacyj, dadatkovych pravakacyj. My zakryli hetu miažu. Kali my ŭbačyli, što praź niekalki dzion paśla zakančeńnia «Zachadu» hetaja situacyja narmalizujecca — jana nie źjaŭlajecca biaśpiečnaj na našaj polska-biełaruskaj miažy — ale narmalizujecca, viartajecca da takoha «niapeŭnaha kansiensusu», kali tak možna skazać, my pryniali rašeńnie adkryć miažu», — skazaŭ jon.

Abviestka polskaj ambasady pakazvaje, što Varšava hatovaja znoŭ zakryvać miažu, kali sutykniecca z ahresiŭnymi dziejańniami Minska.

Čakańni Polščy jasna sfarmulavanyja.

Pa-pieršaje, Polšča choča, kab polskuju miažu pierastali šturmavać nielehalnyja mihranty. Kolkaść takich vypadkaŭ pavinna źnizicca da naturalnych vieličyń, heta značyć, blizka da nula — jakim jano było da vosieni 2021 hoda.

Statystyka pakazvaje, što kolkaść incydentaŭ na miažy na karotki čas źniziłasia da 60—80 za dzień, ale paśla znoŭ viarnułasia na ŭzrovień 100—120 za dzień. Varšava čakaje, kab hetaja ličba viarnułasia na ŭzrovień, blizki da nula, na jakim była čatyry hady nazad. Biez hetaha narmalizacyi adnosin nie budzie. 

Pa-druhoje, nie pavinna być hibrydnych atak inšaha typu — kali takija buduć, to na ich, jak možna zrazumieć z zajavaŭ Varšavy, moža być dadzieny i siłavy adkaz — choć Polšča raniej staranna paźbiahała lubych siłavych dziejańniaŭ, navat kali na miažy zahinuŭ polski vajskoviec.

Pa-treciaje, pavinny spynicca advolnyja i abstaŭlenyja dla prapahandy aryšty hramadzian Polščy ŭ Biełarusi — apošnim takim vypadkam była historyja manacha-karmielita Hžehaža Haveła.

Pa-čaćviortaje, Varšava praciahvaje čakać vyzvaleńnia Andreja Pačobuta i spynieńnia represij suprać biełaruskich palakaŭ. Pryčym u hetym pytańni, jak i ŭ inšych, Varšava daje Minsku zachavać abličča: navat vychad Pačobuta pad chatni aryšt Polšča vitała b. Zdajecca, u adkaz na taki krok, napeŭna, byŭ by adkryty pierachod Babroŭniki—Bierastavica.

Takim čynam, Varšava maksimalna paniziła staŭki, choć i namacała słabaje miesca łukašenkaŭcaŭ. Ad zakryćcia miažy Polšča i Biełaruś u absalutnych ličbach straciać prykładna adnolkava, ale VUP Polščy prykładna ŭ 12 razoŭ bolšy za biełaruski, tamu pieratvareńnie Biełarusi ŭ ślapy apiendyks Rasii ŭdaryć pa biełaruskaj ekanomicy bolš adčuvalna.

U Polščy nie sumniajucca, što ŭ vypadku zakryćcia miažy Maskva kampiensuje Minsku hetyja niekalki socień miljonaŭ dalaraŭ, ale kožnaja kapiejka, vytračanaja na Łukašenku, źmianšaje sumu, jakuju Kreml moža patracić na ŭzbrajeńni dla frontu i źmianšaje ŭdar pa Ukrainie i Jeŭropie.

• 33
• 1
• 5
• 4
• 1
• 1
• 0
• 1