Zasnavalnik telehram-kanała NEXTA Ściapan Puciła staŭ hościem novaha vypusku jutub-šou «Žyćcio-malina». U razmovie jon raskryŭ finansavyja pakazčyki prajekta: nazvaŭ miesiačny biudžet, krynicy dachodu i svoj asabisty zarobak.
Pa słovach Puciły, u toj čas, jak u rasijskaha telekanała «Dožd́» hadavy biudžet kala 5‑7 miljonaŭ dalaraŭ na hod, miesiačny biudžet Nexta ŭ zaležnaści ad biahučych vydatkaŭ składaje ad 35 da 40 tysiač jeŭra. Hetyja srodki iduć na zarobki kamandzie, arendu ofisa i vydatki na zdymki, u tym liku kamandziroŭki.
Jak adznačaje Ściapan, u kamandzie prajekta 22 supracoŭniki. «Chtości addalena pracuje, jak Źmicier Tankovič, chtości z domu, chtości na pałovie staŭki».
Jon padkreśliŭ, što prajekt bolš nie zaležyć ad hrantaŭ i całkam pierajšoŭ na samastojnaje finansavańnie. Asnoŭnyja krynicy dachodu — danaty, rekłama, kansałtynh i prodaž ułasnaha kantentu.
«My nie zaležym ad hrantaŭ. (…) U 2025‑m u nas nie było ŭvohule hrantaŭ takoha instytucyjnaha finansavańnia. Byŭ tolki adzin prajekcik jutubaŭski. (…) [My] całkam samastojna [zarablajem]. Danaty, rekłamy, kansałtynh. Taksama pradajom kantent ukrainskim kanałam. Zaraz budziem pradavać kantent «Biełsatu», inšyja kanały cikaviacca», — raskazaŭ zasnavalnik Nexta.
Na pytańnie Mikity Miełkaziorava, ci źjaŭlajecca supracoŭnictva z «Biełsatam» nastalhičnym krokam, Puciła adkazaŭ:
«Heta biznes, ale heta asensavany biznes z karaniami. (…) Było vielmi šmat prapanovaŭ ź inšych kanałaŭ, navat z Małdovy. Jość navat anhłamoŭnyja kanały, jakija b chacieli bačyć nas jak svaich daradcaŭ. Heta ŭsio čas. I my krychu paźniej u hetym kirunku pojdziem. A spačatku, kaniečnie, heta svajo, heta biełaruskamoŭnaje, prasoŭvać biełaruskamoŭny kantent» — zaŭvažyŭ jon.
Pa słovach Puciły, kanał pracuje z «nievialikim plusam» i jość paduška biaśpieki na šeść miesiacaŭ napierad.
«U nas nikoli nie było zatrymki zarobkaŭ», — padkreśliŭ Puciła.
Asabisty zarobak i staŭleńnie da hrošaj
Ściapan Puciła taksama raskazaŭ, što siaredni zarobak u supracoŭnika Nexta składaje 1800 jeŭra na miesiac. Jaho asabisty zarobak — 15 tysiač złotych na miesiac (kala 3500 jeŭra). Pa jaho słovach, taki pamier abumoŭleny jak padatkovymi limitami ŭ Polščy, tak i jaho asabistymi zapatrabavańniami.
«Pa-pieršaje, jość padatkovyja limity ŭ Polščy, kab tvoj padatak uharu nie palacieŭ. (…) Mnie absalutna dastatkova 15 tysiač złotych na miesiac», — zajaviŭ jon.
Puciła dadaŭ, što nie ličyć hrošy samametaj, a ŭsprymaje ich jak instrumient dla dasiahnieńnia bolš važnych zadač.
«Dla nas važna atrymać pabolš hrošaj, kab inviestavać u toje, što my ličym važnym», — padsumavaŭ jon.
Kamientary