Banki buduć prymać valutu, jakaja śviecicca va ultrafijaletavych pramianiach. Pra heta paviedamiŭ namieśnik staršyni praŭleńnia Nacbanka Andrej Kartun pierad naradaj z pradstaŭnikami kamiercyjnych bankaŭ.
Biełaruskija banki vykarystoŭvajuć adziny pieralik prykmiet płaciežazdolnaści valuty. Ciapier patrabavańni da banknotaŭ źmiakčać, piša Onliner.by.
— Užo z 1 kastryčnika ŭ adzinyja patrabavańni ŭniesieny źmieny: usie ultrafijaletavyja śviačeńni valuty (niejkaja kropka abo plama) buduć pryznavacca płaciežazdolnymi. Adpaviedna, bank pavinien budzie prymać takuju kupiuru.
Raniej klijent moh atrymać valutu ŭ adnym banku, a zatym u inšym abmieńniku kasir spasyłaŭsia na śviačeńnie i admaŭlaŭsia prymać kupiury. Z ulikam zvarotaŭ hramadzian praviły vyrašyli skarektavać.
Andrej Kartun nahadaŭ, što Nacbank zakazvaŭ daśledavańnie ŭ Akademii navuk, kab razabracca, ci ŭpłyvaje śviačeńnie ŭ ultrafijalecie na płaciežazdolnaść banknoty. U vyniku akazałasia, što «nie kožnaje śviačeńnie źjaŭlajecca ćvillu, a nie kožnaja ćvil viadzie da straty płaciežazdolnaści banknoty».
Pry hetym prykmiety znošanaści banknot zastajucca raniejšymi. Tak, banki pa-raniejšamu nie zmohuć pryniać valutu ź istotnymi paškodžańniami — z nadryvami, parvanyja banknoty, a zatym sklejenyja, z prykmietnymi nadpisami.
Akramia hetaha, Nacbank maje namier abmierkavać z bankami ŭviadzieńnie dadatkovaj adkaznaści za admovu prymać płaciežazdolnyja banknoty.
— Budziem abmiarkoŭvać z bankami ŭ tym liku ŭviadzieńnie dadatkovaj adkaznaści kasavych słužbaŭ u častcy takich incydentaŭ i vypadkaŭ niepryjomu banknot z prykmietami płaciežazdolnaści.
Jašče adna tema datyčycca taryfaŭ, pa jakich banki ciapier prymajuć paškodžanyja banknoty. Zaraz kamisii za takija apieracyi ŭ asobnych vypadkach dasiahajuć 15—20%, ale Nacbank budzie rekamiendavać źnizić ich prykładna da 5%.
-
Pamierła 32‑hadovaja dyzajnierka Volha Šaŭcova — amal pałovu svajho žyćcia jana zmahałasia z ankałohijaj
-
Novy kanflikt vakoł «Pahoni». Litoŭcy vinavaciać biełaruski futbolny kłub u kradziažy ich simvoliki
-
U Vaŭkavyskim rajonie žycharku vioski aštrafavali za vialikuju kolkaść katoŭ. Ale jurystka dapamahła adbicca
Ciapier čytajuć
«Ludziej prymušali dumać, što ničoha nikoli nie źmienicca». Chto taki antykamunist Łasła Krasnaharkai, jaki atrymaŭ Nobieleŭskuju premiju pa litaratury?99
Kamientary