U ZŠA zakłapočanyja, kab paśla źniaćcia sankcyj z «Biełavija» detali dla «Boinhaŭ» nie traplali ŭ Rasiju
ZŠA sprabujuć pieraškodzić tamu, kab rašeńnie administracyi Donalda Trampa ab źniaćci sankcyj ź biełaruskaj avijakampanii «Biełavija» dało dostup da važnych avijakampanientaŭ Rasii. Choć amierykancy dazvalajuć pradavać zapčastki samoj «Biełavija», jany imknucca zabaranić kampanii ździajśniać paloty amierykanskimi samalotami ŭ Rasiju. Adnak efiektyŭnaść takoj zabarony vyklikaje sumnievy, piša Politico.
Rašeńnie ab častkovym źniaćci sankcyj było pryniata 11 vieraśnia paśla vyzvaleńnia 52 palitviaźniaŭ, jakija ŭtrymlivalisia ŭ Biełarusi.
Adrazu paśla hetaha Ministerstva handlu ZŠA dasłała hienieralnamu dyrektaru «Biełavija» Iharu Čarhincu dakumient z umovami dostupu da zapčastak dla fłotu avijakampanii (16 samalotaŭ, u tym liku 9 Boeing). U dakumiencie abmiežavańni dla samalotaŭ amierykanskaj vytvorčaści vyrazna ŭklučali zabaronu palotaŭ u Kubu, Iran, Paŭnočnuju Kareju, Rasiju, Siryju i časova akupavanyja ŭkrainskija terytoryi (Krym, Danieckaja i Łuhanskaja vobłaści).
Biełaruskaja avijakampanija pakul nie dała aficyjnaha kamientara, ci spynić jana rejsy ŭ Rasiju. Ekśpierty adznačajuć, što kantrol za vykanańniem amierykanskich abmiežavańniaŭ u miežach «Rasija+» amal niemahčymy, tamu kampanija moža praciahvać rejsy, niahledziačy na zabaronu.
Ryzyka, što amierykanskija avijakampanienty trapiać u Rasieju, dzie avijafłot maje vostruju patrebu ŭ techničnym absłuhoŭvańni i zapčastkach paśla bolš čym troch hadoŭ sankcyj, značna ŭzrasła paśla abviaščeńnia pra źmiakčeńnie sankcyj dla «Biełavija».
Heta rašeńnie ZŠA taksama vyklikała mahčymuju napružanaść ź Jeŭrapiejskim sajuzam. Kamisar ES pa finansavych pasłuhach Maryja Łuis Albukierkie adznačyła, što sankcyi ES zabaraniajuć jeŭrapiejskim apierataram akazvać pasłuhi abo davać ekanamičnyja resursy subjektam, uklučajučy «Biełavija». Heta padnimaje pytańnie, ci pavinny krainy ES pieraškadžać tranzitu amierykanskich zapčastak praz svaju terytoryju ŭ Biełaruś.
Ekśpiertka Elina Rybakova adznačaje, što na praktycy vyznačyć, kudy sapraŭdy iduć zapčastki, składana: technałohii mohuć spyniacca ŭ Brusieli na šlachu ŭ Małdovu, ale na samaj spravie patraplać u inšaje miesca. Akramia taho, nacyjanalnyja orhany mohuć pa-roznamu prymianiać sankcyi da takich pastavak.
U vyniku rašeńnie pra prodaž zapčastak budzie zaležać ad amierykanskich vytvorcaŭ, u tym liku Boeing. Airbus, jaki maje vytvorčaść u ZŠA, paabiacaŭ dziejničać u poŭnaj adpaviednaści ź mižnarodnym zakonam i sankcyjnymi režymami ES i ZŠA. Boeing pakul nie kamientavaŭ situacyju.
Budrys: ES nie stanie bolš miakkim z-za taho, što ZŠA źniali sankcyi z «Biełavija»
Łatuška: Źniaćcie sankcyj z «Biełavija» — krok u intaresach biełaruskaha hramadstva
Ci zmohuć samaloty «Biełavija» paśla źniaćcia sankcyj ZŠA znoŭ lotać u Jeŭropu?
«Padrabiaznaściaŭ nie viedajem». «Biełavija» nie papiaredzili, što z kampanii zdymuć sankcyi
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA16
Kamientary
PS. Dumaju dastupna abjaśnił dla małaletnich i umstvienna adstałych sredzi kamientatarav ździeś.