Спроба аштрафаваць беспілотнае аўто за незаконны разварот паставіла амерыканскую паліцыю ў тупік

Як піша The Guardian, падчас рэйду па выяўленні п'яных кіроўцаў паліцэйскія горада Сан-Бруна ў Каліфорніі (ЗША) заўважылі, як аўтамабіль здзейсніў забаронены разварот на святлафоры.

Нарад, як і належыць, спыніў парушальніка. Але калі паліцэйскія падышлі да машыны, іх чакаў сюрпрыз: за рулём нікога не было. Гэта быў беспілотнік Waymo — вядомы ў раёне заліва Сан-Францыска сэрвіс робата-таксі.

На афіцыйнай старонцы дэпартамента з'явілася фота, дзе збянтэжаны афіцэр зазірае ў салон пустога белага аўтамабіля. Паліцыя пракаментавала сітуацыю з доляй іроніі:

«Паколькі чалавека-кіроўцы не было, штраф выпісаць не ўдалося. У нашых бланках для штрафаў няма графы для робата».

Замест штрафу паліцэйскія звязаліся непасрэдна з кампаніяй Waymo і паведамілі пра збой у сістэме. «Спадзяёмся, перапраграмаванне дапаможа пазбегнуць новых незаконных манеўраў», — дадалі ў паліцыі.

Waymo вырасла з праекта Google Self-Driving Car Project, запушчанага яшчэ ў 2009 годзе. У 2016 годзе ён быў выдзелены ў асобную кампанію ў складзе холдынгу Alphabet Inc. Ужо ў 2018 годзе кампанія запусціла камерцыйны сэрвіс пад назвай Waymo One. Цяпер у некаторых гарадах ЗША любы чалавек можа праз мабільную праграму выклікаць таксі, за рулём якога не будзе кіроўцы: машына сама прыедзе, адвязе пасажыра ў патрэбнае месца і з'едзе.

У сваю чаргу, Waymo выпусціла стандартную заяву, у якой паведаміла, што іх сістэма аўтаномнага кіравання «распрацавана з улікам захавання правілаў дарожнага руху». Кампанія паабяцала «вывучыць сітуацыю» і працягваць працу над павышэннем бяспекі на дарогах.

Гэты камічны выпадак — яскравая ілюстрацыя таго, як тэхналогіі апярэджваюць заканадаўства. Аднак улады Каліфорніі ўжо працуюць над вырашэннем праблемы. Яшчэ летась губернатар штата падпісаў закон, які дазволіць паліцыі выпісваць паведамленне аб парушэнні непасрэдна кампаніі-аператару, чый беспілотнік парушае правілы. Праўда, закон уступіць у сілу толькі ў ліпені 2026 года.

Неабходнасць такога закона выклікана не толькі нявіннымі разваротамі. У Сан-Францыска ўжо былі зафіксаваныя значна больш сур'ёзныя інцыдэнты.

Аўтаномныя машыны блакавалі рух, перашкаджалі працы пажарных і заязджалі на ачэпленыя паліцыяй месцы злачынстваў. Асаблівую занепакоенасць грамадства выклікаў рэзанансны выпадак, калі беспілотнік іншай кампаніі (Cruise) працягнуў за сабой пешахода, які трапіў пад колы.

Таму, хоць гэтым разам робат-парушальнік пазбегнуў пакарання, у будучыні кампаніям давядзецца несці адказнасць за паводзіны сваіх аўтаномных аўтамабіляў на дарозе.

• 0
• 0
• 0
• 0
• 0
• 0
• 0
• 0