Sud u Haazie pryznaŭ vinavatym u vajennych złačynstvach u Darfury kolišniaha lidara sudanskaha apałčeńnia
Mižnarodny kryminalny sud u Haazie pryznaŭ vinavatym u vajennych złačynstvach i złačynstvach suprać čałaviečnaści sudanskaha palavoha kamandzira Ali Muchamada Ali Abd-al-Rachmana, viadomaha taksama jak Ali Kušejb, piša Bi-bi-si.
Ali Muchamad Ali Abd-al-Rachman uznačalvaŭ uzbrojenaje apałčeńnie «Džandžavid», jakoje dziejničała pry padtrymcy ŭładaŭ Sudana i pravodziła represiŭnyja dziejańni ŭ rehijonie Darfur u 2003—2004 hadach. Pad jaho kiraŭnictvam hrupoŭka ździajśniała masavyja zabojstvy, katavańni, źniščeńnie viosak i hvałtoŭnyja dziejańni, u vyniku jakich zahinuli sotni tysiač čałaviek, a miljony byli vymušanyja ŭciakać sa svaich damoŭ.
Sud pryznaŭ, što Abd-al-Rachman asabista ŭdzielničaŭ u złačynstvach — addavaŭ zahady na rasstreły, udzielničaŭ u źbićci ludziej i naziraŭ za pakarańniami. U adnym z apisanych epizodaŭ jon prymusiŭ kala 50 mirnych žycharoŭ lehčy na ziamlu i zahadaŭ svaim bajcam rasstralać ich.
Padčas sudovaha pracesu śviedki raskazvali, jak ich vioski byli spalenyja, mužčyny i chłopčyki zabityja, a žančyny — adpraŭlenyja ŭ seksualnaje rabstva.
Abd-al-Rachman, jaki naradziŭsia prykładna ŭ 1949 hodzie, admaŭlaŭ usie abvinavačańni, śćviardžajučy, što jaho błytajuć ź inšym čałaviekam. Adnak sud paličyŭ dokazy dastatkovymi, kab pryznać jaho sapraŭdnym Ali Kušejbam.
Jon staŭ pieršym čałaviekam, jakoha Mižnarodny kryminalny sud asudziŭ za złačynstvy, ździejśnienyja ŭ Darfury.
Pry hetym adznačajecca, što jon byŭ paplečnikam byłoha kiraŭnika Sudana Amara al-Bašyra, jakoha taksama šukaje Mižnarodny kryminalny sud pa abvinavačańniach u hienacydzie. Al-Bašyr byŭ zrynuty ŭ 2019 hodzie, ale da hetaha času nie pieradadzieny ŭ Haahu.
Kanflikt u Darfury pačaŭsia tady, kali niearabskija plamiony z hetaha rehijona paŭstali suprać dyskryminacyi z boku ŭrada, a ŭłady ŭ adkaz nakiravali suprać ich «Džandžavid». Pavodle acenak AAN, u hetym uzbrojenym kanflikcie zahinuli kala 300 tysiač čałaviek, a bolš za dva miljony stali ŭciekačami.
Kančatkovy prysud pa spravie Abd-al-Rachmana budzie abvieščany paźniej.
Trybunał dla Pucina i Łukašenki — što značyć rezalucyja Jeŭraparłamienta i jak taki sud budzie vyhladać
Eks-prezidentu Filipin Radryha Duterte vystaŭlenyja abvinavačvańni ŭ złačynstvach suprać čałaviečnaści
Novy Niurnbierh. Jeŭropa stvaraje Śpiectrybunał pa vajnie va Ukrainie — ci zmohuć asudzić Łukašenku?
«Łukašenka mnie skazaŭ: «Chočaš — možaš adkazać nam, udaryć pa Mazyry, pa zavodzie» — Zialenski32
«Łukašenka mnie skazaŭ: «Chočaš — možaš adkazać nam, udaryć pa Mazyry, pa zavodzie» — Zialenski
Zialenski: Ja nie budu kazać, jakim sposabam, ale našyja ludzi zajmalisia tym, kab try-čatyry retranślatary ŭžo nie pracavali na terytoryi Biełarusi11
Kamientary