Novy kanflikt vakoł «Pahoni». Litoŭcy vinavaciać biełaruski futbolny kłub u kradziažy ich simvoliki
Litoŭskija aktyvisty zaŭvažyli, što łahatyp kłuba «Pahonia», jaki pieršym ź biełaruskich kamand zhulaje ŭ čempijanacie Polščy, amal identyčny z emblemaj zbornaj Litvy pa futbole. Litoŭskaja fiederacyja futbołu nazvała heta kradziažom. Ciapier biełaruski kłub, kab nie raspalvać kanflikt, šukaje novy łahatyp.
Padabienstva simvoliki dźviuch kamand zaŭvažyŭ litoŭski aktyvist i błohier Žylvinas Śvitojus, jaki ŭ apošnija časy staŭ viadomy praz svaje vykazvańni suprać «lićvinizmu».
U pole zroku łahatyp biełaruskaj kamandy trapiŭ, vidać, paśla naviny pra toje, što «Pahonia» praz dva hady namahańniaŭ stałasia pieršaj biełaruskaj futbolnaj kamandaj, jakaja atrymała dazvoł na ŭdzieł u vośmym dyvizijonie čempijanatu pa futbole Polščy.
Śvitojus prykłaŭ vyjavy dvuch łahatypaŭ dla paraŭnańnia, nazvaŭšy heta kradziažom, «nie pieršym i nie apošnim» ź biełaruskaha boku i pairanizavaŭšy, što heta ŭsio dla najchutčejšaj intehracyi i, moža, užo ciapier varta nazvacca LitBiełam.
Łahatypy nie identyčnyja: u biełaruskaj viersii stylizavany vieršnik, uziaty z histaryčnaha hierba «Pahonia», źmieščany ŭ pole ščyta i maje bolš płaŭnyja abrysy, taksama adroźnivajucca mieč, hałava vieršnika i kryž na ščycie. Ale ŭ cełym abodva łahatypy padobnyja da stupieni źmiašeńnia, jak zvyčajna havorycca ŭ takich vypadkach, tak što płahijat vidavočny.
Biełarusy ŭ sacsietkach adznačajuć, što nie bačać asablivaj prablemy ŭ hetym — jašče niadaŭna amatarskaja kamanda ŭziała pieršaje, što im trapiłasia pa zapycie ŭ pošukaviku, trochi adaptavaŭšy pad siabie. Inšyja kazali, što kamanda pastupiła niapravilna i treba źmianić stylistyku łahatypa, kab nie było płahijatu.
Chtości mierkavaŭ, što kłub moh vykarystoŭvać emblemu pa damoŭlenaści ź litoŭskaj kamandaj, ale aficyjny akaŭnt Litoŭskaj fiederacyi futbołu, jakuju Śvitojus paprasiŭ prakamientavać situacyju, abvierh heta, zajaviŭšy, što nie davali dazvołu na vykarystańnie svaich łahatypaŭ. Fiederacyja prapanavała dasyłać skarhi na profil kłuba «Pahonia» ŭ fejsbuku.
Biełaruskaja futbolnaja kamanda padabienstva simvoliki pryznała i patłumačyła, jak tak stałasia. U svajoj aficyjnaj zajavie jana zajaviła, što łahatyp byŭ raspracavany prafiesijnym dyzajnieram pierad udziełam kamandy ŭ rozyhryšy Kubka Polščy ŭ 2024 hodzie.
«My atrymali ŭsie nieabchodnyja materyjały i dakumienty, a dyzajnier atrymaŭ hanarar za svaju pracu. Asnoŭnaj idejaj łahatypu była spasyłka na biełaruskuju tradycyju i nacyjanalny simvał, a nie zapazyčańnie čužoj emblemy.
Na žal, tady my apynulisia ŭ časavym cejtnocie i nie źviarnuli ŭvahu, što hety łahatyp vielmi nahadvaje simvoliku Litoŭskaj fiederacyi futboła. My nie mieli namieru pakryŭdzić litoŭskich zaŭziataraŭ futboła, rabotnikaŭ i kiraŭnictva fiederacyi», — havorycca ŭ zajavie.
Kłub «Pahonia» vykazaŭ škadavańnie, što ŭ centry ŭvahi apynulisia nie jaje dasiahnieńni, a jaje łahatyp. U pošukach kampramisu kłub abjaviŭ adkryty konkurs na stvareńnie novaha łahatypu na asnovie histaryčnaj «Pahoni».
Kamanda spadziajecca, što ŭ chutkim časie i ŭžo pad novym łahatypam zmoža pravieści tavaryski matč ź litoŭskaj zbornaj, jaki stanie simvałam siabroŭstva i ŭzajemnaj pavahi.
«Naša Niva» — bastyjon biełaruščyny
PADTRYMAĆCiapier čytajuć
Bondarava dakałupałasia da vierša «Vaviorka» ŭ prahramie dziciačych sadkoŭ. Što ź im nie tak?3
Bondarava dakałupałasia da vierša «Vaviorka» ŭ prahramie dziciačych sadkoŭ. Što ź im nie tak?
«Ja ich ni pra što nie prasiŭ i tym bolš — vysyłać mianie z radzimy». Departavanyja palitviaźni rezka adkazali Kavaleŭskamu. Nie abyšłosia biez abrazaŭ4242
Kamientary