U Polščy chtości raspaŭsiudziŭ čutki, što fiermier biaspłatna razdaje bulbu. Ludzi pryjšli i skrali 150 ton
Fiermier byŭ na adpačynku, a kali viarnuŭsia, nie moh pavieryć svaim vačam. Ciapier jon prosić viarnuć jamu bulbu, piša TVN24.
U niezvyčajnuju historyju trapiŭ fiermier pa imieni Piatro z Dambrovicaŭ u Padkarpackim vajavodstvie. Na vychodnych partał Nowiny24 zapuściŭ čutku ab tym, što fiermier razdaje biaspłatna 150 ton bulby, tamu što nie zmoh pradać uradžaj.
Sajt apublikavaŭ videa ad čytača, na im čałaviek kaža: «Fiermier vysypaŭ 150 ton bulby, jakuju nie zmoh pradać. Vysypaŭ i skazaŭ, što kožny moža jaje zabrać. Biaspłatna».
Čutki vielmi chutka raźlacielisia pa internecie. Na poli fiermiera sabraŭsia natoŭp. Ludzi pryjazdžali z pryčepami i navat z traktarami. Jany stali aktyŭna raźbirać bulbu, vyhružanuju na poli. Tolki voś akazałasia, što navina ab razdačy ŭradžaju była fejkam. Fiermier ničoha nie źbiraŭsia razdavać.
Piotr byŭ niedastupny ŭ subotu, u jaho było siamiejnaje ŭračystaść. I tolki ŭ niadzielu jon daviedaŭsia, što nieviadomyja ludzi raźbirajuć jaho bulbu.
«Ja byŭ u šoku. Mnie 68 hadoŭ, i nikoli ŭ žyćci sa mnoj takoha nie zdarałasia. Heta kašmar, jak ź filma Bareja (polskaha režysiora-kamiedyjohrafa). Spadziajusia, što tyja, chto tam byŭ, źviažucca sa mnoj, rastłumačać situacyju, i my vyrašym spravu pa-dobramu. Kali nie, to sprava moža dajści da prakuratury», — kaža fiermier.
Piotr źviarnuŭsia ŭ redakcyju Nowiny24 i abvierh, što harodnina pryznačałasia dla razdačy. Ale było ŭžo pozna.
«Chtości skraŭ u mianie hetuju bulbu. Staronnija ludzi pačali jaje zabirać. Prašu viarnuć jaje ci inšym čynam dobraachvotna vyrašyć hetaje pytańnie», — skazaŭ mužčyna partału.
Jak jon adznačyŭ, na poli źjavilisia roznyja ludzi, u tym liku fiermiery z navakolnych viosak. Pavodle jaho słoŭ, niekatoryja mahli zahruzić navat kala 60 ton bulby, to bok pa šeść pryčepaŭ.
Niekalki čałaviek užo dobraachvotna źviarnulisia da Piatra i viarnuli bulbu.
«Adzin čałaviek pryjšoŭ i skazaŭ, što ŭziaŭ dva miaški, tamu što «pamutnieńnie rozumu nastupiła», kali jon ubačyŭ natoŭp ludziej. Paprasiŭ prabačeńnia, rastłumačyŭ, i ŭsio ŭ paradku. Ale jość i takija, chto zabraŭ dziasiatki ton», — padkreśliŭ fiermier.
Piatro pakul nie viedaje, čym skončycca sprava. Ale jon vielmi zasmučany i źbirajecca padličyć straty. Pradprymalnik šmat hadoŭ zajmajecca pierapracoŭkaj dla śpirtavoj pramysłovaści.
«Dla adnaho košt taki, dla inšaha — jašče inšy. Dla mianie heta byŭ košt tavaru dla pierapracoŭki. Voś i ŭsio. Na poli było 150 ton bulby», — rastłumačyŭ fiermier.
Piotr nie kaža, ci budzie padavać zajavu ŭ prakuraturu. Pavodle jaho słoŭ, vialikaja ahałoska jamu była nie patrebna, tamu što heta škodzić biźniesu. Ale fiermier vielmi prosić, kab ludzi viarnuli jamu bulbu.
Čutki ab biaspłatnaj razdačy harodniny ŭdała lehli na infarmacyjny paradak dnia. U apošnija tydni polskija ŚMI pišuć ab tym, jak fiermiery pa ŭsioj krainie razdajuć uradžaj, jaki nie zmahli pradać.
Ciapier čytajuć
Źnikłuju ŭ Mjanmie Vieru Kraŭcovu znajšli miortvaj4
Kamientary