Tramp dazvoliŭ CRU pravodzić tajnyja apieracyi ŭ Vieniesuele

Za apošnija tydni amierykanskija vajskoŭcy nanieśli ŭžo jak minimum piać udaraŭ u Karybskim basiejnie pa sudnach, jakija, jak miarkujecca, pieravozili narkotyki, u vyniku čaho zahinuli 27 čałaviek. Ekśpierty AAN pa pravach čałavieka nazvali hetyja ataki «pazasudovymi pakarańniami śmierciu», piša Bi-bi-si.

Amierykanski prezident imkniecca ŭzmacnić cisk na prezidenta Nikałasa Madura, jakoha ZŠA i inšyja krainy nie pryznajuć zakonnym lidaram Vieniesueły. Zajava Trampa — rezkaja eskałacyja situacyi, kamientuje ahienctva Reuters.

Vystupajučy ŭ Biełym domie ŭ sieradu, Tramp skazaŭ žurnalistam, što ŭ jaho administracyi «razhladajuć mahčymaść naziemnych apieracyj».

U sieradu hazieta New York Times paviedamiła, spasyłajučysia na krynicy, što Tramp dazvoliŭ CRU pravodzić apieracyi ŭ Vieniesuele — samastojna abo ŭ ramkach bolš maštabnaj vajennaj apieracyi.

«Čamu vy dazvolili CRU adpravicca ŭ Vieniesuełu?» — spytaŭ prezidenta ZŠA adzin z žurnalistaŭ u Biełym domie.

«Nasamreč, ja daŭ dazvoł pa dźviuch pryčynach», — adkazaŭ Tramp. — Pa-pieršaje, jany spustošyli svaje turmy i pierapravili ich [źniavolenych] u Złučanyja Štaty… Jany pryjechali praź miažu».

«Druhoje — narkotyki. Da nas pastupaje šmat narkotykaŭ ź Vieniesueły, i mnohija ź vieniesuelskich narkotykaŭ pastupajuć pa mory», — praciahnuŭ jon. «Ciapier my razhladajem suchaputnyja pieravozki, pakolki mora ŭ nas pad kantrolem», — zajaviŭ prezident ZŠA.

Tramp nie staŭ kamientavać mahčymy ŭdzieł CRU ŭ sprobach źviaržeńnia Madura, za zachop jakoha ZŠA raniej pryznačyli ŭznaharodu 50 młn dalaraŭ. «Chiba nie było b niedarečna adkazvać na hetaje pytańnie?» — skazaŭ jon.

Krynicy New York Times, jakija raskazali pra sakretnuju dyrektyvu, śćviardžajuć, što stratehija administracyi Trampa nakiravana mienavita na adchileńnie prezidenta Madura ad ułady.

Amierykanski prezident nieadnarazova nazyvaŭ Vieniesuełu pieravałačnym punktam dla niezakonnaha abarotu śmiarotna niebiaśpiečnaha narkotyku fientaniłu, choć, zhodna z aficyjnymi dadzienymi, asnoŭnaj krynicaj fientaniłu ŭ ZŠA źjaŭlajecca Mieksika.

Urad Vieniesueły ŭ sieradu asudziŭ kamientaryj Trampa ab tym, što jon dazvoliŭ CRU pravodzić tajnyja apieracyi ŭ krainie, nazvaŭšy jaho parušeńniem mižnarodnaha prava i Statuta AAN.

U zajavie vieniesuelskich uładaŭ havorycca, što dziejańni ZŠA nakiravany na lehalizacyju apieracyi pa źmienie režymu, kančatkovaja meta jakoj — zachop naftavych resursaŭ Vieniesueły.

Niezvyčajna čuć ad viarchoŭnaha hałoŭnakamandujučaha ZŠA paćvierdžańnie jakoj-niebudź tajnaj apieracyi CRU.

Padčas apošniaha ŭdaru ZŠA ŭ aŭtorak zahinuli šeść čałaviek — sudna było atakavana la bierahoŭ Vieniesueły. Jak pisaŭ Tramp u Truth Social, «raźviedka paćvierdziła, što sudna pieravoziła narkotyki, było źviazana ź niezakonnymi narkaterarystyčnymi sietkami i prachodziła pa viadomym [kalidory narkatrafika]».

Jak i ŭ vypadku z papiarednimi ŭdarami, ułady ZŠA nie ŭdakładniali, jaki narkakartel moh adpravić sudna i chto znachodziŭsia na borcie.

Madura ŭ sieradu addaŭ zahad ab praviadzieńni vajennych vučeńniaŭ u pryharadzie Karakasa. Raniej Tramp nakiravaŭ u Karybski basiejn vosiem vajennych karabloŭ, atamnuju padvodnuju łodku i źniščalniki, što, jak śćviardžaje Bieły dom, taksama źviazana sa sprobaj spynić kantrabandu narkotykaŭ.

• 1
• 0
• 0
• 0
• 0
• 0
• 0
• 0