Dziasiatki kažanoŭ vykinuli na śnieh kala himnazii ŭ Salihorsku. Što było dalej
Ranicaj 2 lutaha ŭ dvary himnazii №1 u Salihorsku ludzi ŭbačyli žachlivuju karcinu: na śniezie, u luty maroz, lažali niekalki dziasiatkaŭ kažanoŭ. Jak jany tam apynulisia, raskazała miascovaje vydańnie «Šachcior».
Jak prakamientavali vydańniu va ŭpraŭleńni pa adukacyi Salihorskaha rajvykankama, 2 lutaha a 7:30 u kabiniecie ruskaj movy na druhim paviersie pry ŭklučeńni śviatła pabačyli skraznuju dzirku ŭ ścianie pad padakońnikam.
Na padłozie i na stale kala dzirki byli ślady žyćciadziejnaści žyvioł, stajali niepryjemny pach i pisk, čulisia huki vałtuźni.
Imavierna, kažany, jakija zimavali na fasadzie budynka himnazii, u mocny maroz pačali imknucca da ciapła ad batarei i prahryźli ŭciaplalnik pad akonnaj ramaj, patłumačyli čynoŭniki.
Nastaŭniki źviarnulisia ŭ MNS. Praz hadzinu tyja pryjechali. Ahledzieŭšy miesca zdareńnia, jany dastali ź dzirki kala 230 kažanoŭ.
Rabotniki himnazii sabrali žyvioł, pakłali va ŭcieplenyja skryni i zavieźli da ciepłatrasy, śćviardžajuć va ŭpraŭleńni adukacyi.
Što rabić, kali vy znajšli kažanoŭ
U Biełarusi naličvajecca 19 vidaŭ kažanoŭ, 8 ź ich zaniesienyja ŭ Čyrvonuju knihu Biełarusi i achoŭvajucca zakonam, im pahražaje źniknieńnie.
U Biełarusi ŭžo niekalki hadoŭ pracuje Centr reabilitacyi rukakryłych «Kažanapolis». Asabliva aktyŭna jon dziejničaje z vosieni da viasny.
Kali padčas ramontu abo vypadkova ŭ svaim domie vy znajšli kažanoŭ, nie dakranajciesia da ich i nie vykidajcie na dvor, a lepš źviažyciesia z vałanciorami «Kažanapolisa» (u sacsietkach prajekta paznačany telefon: +375 29 213 92 57). Tam žyvioł źmiaščajuć u śpiecyjalnym chaładzilniku ŭ spalnych miašečkach, dzie jany biaśpiečna pierazimujuć, a viasnoj ich vypuskajuć u pryrodu.
Kažany — nie «škodniki», a važnaja častka ekasistemy. Jany źniščajuć nasiakomych, u tym liku škodnikaŭ sielskaj i lasnoj haspadarki. Jany nie ahresiŭnyja i, nasupierak raspaŭsiudžanym ujaŭleńniam, nie napadajuć na čałavieka i nie hryzuć elektryčnyja pravady.
Akramia taho, źniščeńnie niekatorych vidaŭ kažanoŭ — heta parušeńnie zakonu. Za hibiel žyvioł, zaniesienych u Čyrvonuju knihu, praduhledžanyja štrafy, administracyjnaja, a ŭ vypadku masavaj hibieli — navat kryminalnaja adkaznaść.
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj12
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1818
Kamientary