Staršynia AHP mocna schudnieŭ u źniavoleńni — jon straciŭ kala 30 kiłahramaŭ.
Paśla vybaraŭ-2020 Mikałaj Kazłoŭ byŭ dvojčy asudžany. U žniŭni 2021‑ha — na try miesiacy aryštu za raskryćcio danych śledstva pa spravie Kaardynacyjnaj rady. Paśla jaho znoŭ zatrymali i asudzili da 2,5 hoda kałonii pa artykule 342 za ŭdzieł u pratestach. Pakul Kazłoŭ byŭ u kałonii, u jaho pamierła maci — palityk daviedaŭsia pra heta tolki paśla jaje pachavańnia. Za čas źniavoleńnia jon 11 miesiacaŭ pravioŭ u ŠIZA i PKT.
Na volu Kazłoŭ vyjšaŭ u lipieni 2024 hoda. I praz hod źjechaŭ ź Biełarusi. Ciapier jon u Brusieli.
«Paŭsiul prysutničaje strach», — tak jon apisaŭ, što adčuvajuć usie byłyja palitźniavolenyja.
Na pres-kanfierencyi Kazłoŭ padzialiŭsia, što apošnim časam u Biełarusi nie karystaŭsia mabilnym telefonam.
«Dajšło da taho, što ja admoviŭsia ad mabilnaha telefona. U mianie nie było jaho naohuł, kab nie padstaŭlać inšych ludziej».
Jon taksama adznačyŭ, što, pakul siadzieŭ u kałonii, z prapanovaj pisać prašeńnie na pamiłavańnie da jaho ni razu nie padychodzili.
U intervju «Lusterku» jon padrabiaźniej raskazaŭ, čamu pakinuŭ Biełaruś tolki zaraz.
«Tak, ja tam prabyŭ bolš za hod, atrymlivajecca. Pa‑pieršaje, byli chatnija spravy — pakul siadzieŭ, u mianie maja mama pamierła. A pa‑druhoje, i heta samaje hałoŭnaje, — nie chacieŭ źjazdžać. Ja chacieŭ žyć u Biełarusi. Nialohka dałosia rašeńnie, što treba źjazdžać. Pa palityčnych artykułach ja ŭžo asudžany dvojčy. Paśla pieršaha svajho źniavoleńnia pryniaŭ pryncypovaje rašeńnie zastavacca doma. Tamu što, budučy staršynioj Abjadnanaj hramadzianskaj partyi, ja nie moh źjazdžać raniej, čym maje kalehi, adnadumcy. Mnie zdajecca, kiraŭnik pavinien źjazdžać apošnim, kali ŭsie ŭžo ŭ biaśpiecy. Tamu ja zastaŭsia i trapiŭ u turmu ŭ druhi raz», — raskazaŭ jon.
Palityk kaža, što hety hod na voli byŭ vielmi ciažkim, uładkavacca na pracu było ciažka.
«Atrymlivałasia drenna, ja vam skažu. Nichto nie choča ryzykavać ni svaim biznesam, ni svajoj pasadaj.
Adzin z maich znajomych, čałaviek vysokaj kvalifikacyi, paśla doŭhich‑doŭhich pošukaŭ zmoh uładkavacca tolki hruzčykam u kramu. I to tolki tamu, što tam była vialikaja patreba ŭ takich supracoŭnikach.
Inakš jaho i nie ŭziali b. Ni na adnym pradpryjemstvie nie biaruć, tamu što ŭ administracyi luboha ź ich jość ideołahi, byłyja supracoŭniki KDB, MUS, jakija praviarajuć na palityčnuju łajalnaść. I budź ty choć siami piadziej u łbie — z palityčnymi artykułami ŭładkavacca praktyčna niemahčyma».
«Skažu dla tych ludziej, jakija kažuć, što «my b chacieli zastacca ŭ Biełarusi»: pa maich adčuvańniach, roźnica pamiž turmoj i žyćciom na voli nie vielmi vialikaja, asabliva dla byłych palitviaźniaŭ. Ty pastajanna pavinien chadzić adznačacca, ciabie pastajanna praviarajuć.
Ty ŭvieś čas znachodzišsia pad svajho rodu kaŭpakom — ja bačyŭ, što za mnoj nazirali. Štości zrabić abo skazać ty nie možaš. Tam paŭsiudna panuje atmaśfiera strachu. Represii nie spyniajucca. Ludzi bajacca navat havaryć na mnohija temy. Heta nie taja Biełaruś, jakaja była da 2020 hoda. Zusim nie taja», — dadaŭ jon.
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»1414
Kamientary