Rabočaja hrupa Jeŭrapiejskaha chimičnaha ahienctva paznačyła rečyva jak taksičnaje dla čałavieka, što vyklikała tryvohu ŭ miedycynskaj supolnaści.
Jeŭrapiejski sajuz razhladaje mahčymaść kłasifikavać etanoł jak niebiaśpiečnaje rečyva, jakoje pavyšaje ryzyku raźvićcia raku. Jak piša Financial Times, taki krok moža de-fakta pryvieści da zabarony mnohich srodkaŭ dla dezynfiekcyi ruk i myjnych srodkaŭ, što vykarystoŭvajucca ŭ balnicach.
Na siońnia ačyščalnyja srodki na śpirtavoj asnovie dazvolenyja ŭ ES jak biaśpiečnyja i z 1990‑ch hadoŭ uvachodziać u śpis asnoŭnych lekavych srodkaŭ Suśvietnaj arhanizacyi achovy zdaroŭja (SAAZ).
Adnak 10 kastryčnika ŭnutranaja rekamiendacyja adnoj z pracoŭnych hrup Jeŭrapiejskaha chimičnaha ahienctva (ECHA) paznačyła etanoł jak taksičnaje rečyva, jakoje pavyšaje ryzyku raku i ŭskładnieńniaŭ padčas ciažarnaści i jakoje nieabchodna zamianić u ačyščalnych i inšych praduktach.
U kancy kastryčnika Kamitet ahienctva, jaki zajmajecca vyvučeńniem aktyŭnych bijacydnych rečyvaŭ, praviadzie sustreču, kab vyrašyć, ci varta kłasifikavać etanoł jak škodny dla čałavieka. Paśla hetaha jon nakiruje rekamiendacyju ŭ Jeŭrapiejskuju kamisiju, jakaja prymie kančatkovaje rašeńnie.
Pradstaŭniki haliny achovy zdaroŭja ŭžo bjuć tryvohu nakont nastupstvaŭ takoha rašeńnia. Jak adznačyła ŭ intervju vydańniu Alaksandra Pieters z Ženieŭskaha ŭniviersiteta i sietki «Čystyja balnicy», takoje rašeńnie akaža «vielizarny ŭpłyŭ na balnicy».
«Štohod va ŭsim śviecie ad infiekcyj, źviazanych z akazańniem miedycynskaj dapamohi, pamiraje bolš ludziej, čym ad malaryi, tubierkulozu i ŚNIDu razam uziatych. Hihijena ruk, asabliva z vykarystańniem antysieptykaŭ na śpirtavoj asnovie, štohod ratuje ad 16 miljonaŭ infiekcyj pa ŭsim śviecie», — adznačyła Pieters.
Pa jaje słovach, alternatyvy etanołu, takija jak izaprapanoł, jašče bolš taksičnyja. Pastajannaje vykarystańnie myła zajmaje bolš času i paškodžvaje skuru. Pavodle adnaho z daśledavańniaŭ, biez antysieptyka miedsiostry musili b tracić 30 chvilin kožnaj hadziny apieracyi na myćcio ruk.
U ECHA zajavili, što kali ich ekśpiertny kamitet «pryjdzie da vysnovy, što etanoł źjaŭlajecca kancerahiennym», jon parekamienduje jaho zamienu. Adnak ahienctva dadało, što rečyva «ŭsio jašče moža być uchvalena dla vykarystańnia ŭ bijacydach, kali jany buduć ličycca biaśpiečnymi z ulikam čakanych uzroŭniaŭ uździejańnia abo kali nie znojdziecca alternatyvy». Ahienctva padkreśliła, što kančatkovaje rašeńnie jašče nie pryniataje.
Inicyjatyva vyklikała značnuju krytyku. Pradstaŭniki pramysłovaści śćviardžajuć, što navukovyja danyja hruntujucca na ŭpłyvie ŭžyvańnia ałkaholnych napojaŭ, a nie na vykarystańni antysieptykaŭ. Hramadskija słuchańni pakazali pieravažnuju niazhodu z zabaronaj, a Jeŭrapiejski centr pa kantroli zachvorvańniaŭ raniej rekamiendavaŭ mienavita śpirtavyja srodki jak asnoŭny mietad hihijeny.
Taksama vykazvajucca aściarohi, što choć kampanii i zmohuć atrymlivać časovyja dazvoły na vykarystańnie etanołu, heta pryviadzie da biurakratyčnych zatrymak i vydatkaŭ. Da taho ž, ekśpierty padkreślivajuć, što vytvorčaść etanołu lohka pavialičyć u nadzvyčajnych situacyjach, takich jak pandemija COVID-19, što niemahčyma zrabić ź jaho alternatyvami.
Ciapier čytajuć
«Paša, ja tabie nie vieru». Sieviaryniec raskazaŭ, jak vypadkovaja dziaŭčyna matyvavała jaho nazaŭsiody pierajści na biełaruskuju movu3
Kamientary