Ci možna apjanieć ad cukierak «Staličnyja» i maroziva z takoj ža načynkaj? Voś što pakazaŭ ekśpierymient
Što pakaža ałkatestar adrazu paśla ŭžyvańnia hetych prysmakaŭ? Žurnalist abw.by pravieryŭ.
U źmieścivie maroziva «Staličnaje elit» (pradukt supracoŭnictva Minskaha choładakambinata №2 i fabryki «Kamunarka») značycca etyłavy śpirt, ale jaho kolkaść nie napisanaja.
U internecie stali virusnymi roliki pra toje, što, źjeŭšy litaralna dźvie porcyi, možna adčuvalna napicca. U adnym ź ich demanstrujecca prościeńki bytavy ałkatester, navat biez muštuka, jaki adlustroŭvaje vynik u 0,7 pramile.
Ale takoje niemahčyma. Kab atrymać apjanieńnie 0,7 pramile pry vazie 70 kh, zhodna z formułaj Vidmarka, treba vypić litr piva macunkam 6,5%, a bolš bujnym ludziam i taho bolš. Heta značyć, nieabchodna 65 mł (ci 51 hram) čystaha etyłavaha śpirtu, kab napicca da 0,7 pramile.
Pry hetym dźvie porcyi «Staličnaha elit» važać 180 hramaŭ. Kali b u ich źmiaščaŭsia 51 hram śpirtu — macunak marožanaha składaŭ by amal 30%.
Žurnalist źjeŭ spačatku adno maroziva. Paśla pieršaj porcyi na dysplei ałkatestara 0,1 pramile. Vynik paśla druhoj porcyi — 0,2 pramile. Praz 10 chvilin jon užo nulavy.
Što tyčycca ŭłasnych adčuvańniaŭ, to najaŭnaść śpirtu žurnalist usio ž źlohku adčuvaŭ — jak byccam vypiŭ kubak kvasu ci blašanku biezałkaholnaha piva.
A što z cukierkami? U internecie jość infarmacyja ad supracoŭnikaŭ «Kamunarki», pavodle jakoj najaŭnaść śpirtu ŭ cukierkach składaje 4%.
Žurnalist źjeŭ piać cukierak. Pakazańni ałkatestara paśla piaci «Staličnych» — 0,1 pramile. Pry hetym nijakich źmianieńniaŭ u samaadčuvańni niama.
Paśla jašče piaci cukierak ałkatestar pakazvaje 0,4 pramile. Ale pryčyna vidavočna ŭ parach ałkaholu ŭ rocie.
Potym žurnalist uziaŭ jašče try cukierki. Ałkatestar daje 0,3 pramile.
Praz 10 chvilin prybor užo pakazvaje 0,1 pramile, a pa zakančeńni jašče piaci chvilin — nuli.
13 źjedzienych cukierak — heta prykładna 220 hramaŭ. Kali ŭ cukierkach sapraŭdy 4% śpirtu, to žurnalist atrymaŭ dozu ŭ 8,8 hrama, ci 11,2 mł. Kab u litry vadkaha napoju źmiaščałasia takaja kolkaść śpirtu, jaho macunak pavinien byŭ by skłaści 1,12%. Na asnovie ŭžo zhadanaj formuły Vidmarka vychodzić, što ad źjedzienaha žurnalist pavinien byŭ napicca na 0,1 pramile.
Kali hulać z kalkulataram dalej, to možna padabrać pakazčyki, pry jakich možna pajeści «Staličnych» na pazbaŭleńnie pravoŭ. Atrymać kancentracyju ŭ 0,3 pramile ałkaholu možna, kali paŭkiłahrama cukierak źjeść dziaŭčyna vahoj 50 kh i rostam 160 sm.
Ciapier čytajuć
«Naiŭna spadziavalisia zarablać u Jeŭropach, pryjazdžać dadomu lačyć zuby na chalavu i zdavać kvateru». Prapahanda pačała apraŭdvać darahija žyroŭki dla «darmajedaŭ»2121
Kamientary