Na papiery vysadžana 400 kustoŭ, na miescy — nivodnaha. Siłaviki ŭzialisia za azielanieńnie ŭ haradach

Samyja jaskravyja prykłady «virtualnaha» azielanieńnia znajšlisia ŭ Mahilovie. Supracoŭniki kamunalnaj haspadarki paviedamili, što la doma №8 na vulicy Kryvulina vysadžanyja ažno 79 tuj. Viečnazialonaje dreva mahło b stać upryhožańniem dvara. Adnak pravierka vyjaviła ŭsiaho 10 raślin hetaha vidu ŭ aznačanym miescy. Kudy padzielisia jašče 69 tuj — pytańnie rytaryčnaje.

Jašče cikaviejšaja situacyja skłałasia na kalcy vulic Kaštanavaj i Krupskaj. Pavodle dakumientaŭ, tut pavinna była raści hustaja žyvaja aharodža ź biručyny — bolš za 200 kustoŭ. Prakurory razam sa śpiecyjalistami abyšli kolcy z usich bakoŭ, ale nie znajšli nivodnaj raśliny. Kali ŭ kamunalnikaŭ paprasili pakazać palcam, dzie ž tyja kusty, im nie było što adkazać — žyvaja aharodža isnavała vyklučna na papiery.

Nie lepš situacyja i na praśpiekcie Šmita. Tam pa dakumientach ciaham dvuch hadoŭ vysadzili 600 dreŭ. Ale biez naležnaha dohladu sadžancy paprostu zahinuli ŭ burjanie rostam z čałavieka. Tolki paśla ŭmiašańnia prakuratury terytoryju pakasili, a zamiest suchich dubcoŭ pasadzili novyja drevy.

Prablema tyčycca nie tolki Mahilova. Maštabnaja pravierka Hienprakuratury pakazała, što situacyja z azielanieńniem pa krainie dalokaja ad ideału.

Za apošnija dzieviać hadoŭ miascovyja vykanaŭčyja kamitety tak i nie zabiaśpiečyli raspracoŭku i zaćviardžeńnie schiem azielanieńnia dla 57 haradoŭ krainy. Biez hetych dakumientaŭ nielha płanamierna stvarać parki, skviery i abnaŭlać zialonyja zony.

Nie našmat lepšaja situacyja i tam, dzie schiemy jość: u 65 z 112 haradoŭ i pasiołkaŭ nie vykonvajucca navat minimalnyja normy pa płoščy hramadskich azielanionych terytoryj.

U Pinsku, Viciebsku, Słonimie, Barysavie, Ašmianach, Žytkavičach i šerahu inšych haradoŭ pakazčyki azielanieńnia akazalisia ŭdvaja nižejšyja za nieabchodnyja.

Asnoŭnaja pretenzija prakuroraŭ — farmalny padychod. Časta drevy hinuć prosta tamu, što ich nichto nie dahladaje. Płany pa pasadkach zryvajucca, a vysiečanyja drevy nie kampiensujucca novymi.

Prykładaŭ biezhaspadarčaści chapaje pa ŭsioj krainie. U Kalinkavičach jašče ŭ pačatku hoda vysiekli častku skviera, ale adnaŭlać jaho nichto nie śpiašajecca. U Krasnapolskim rajonie zamiest amal 600 zapłanavanych dreŭ vysadzili tolki 220. U Loźnienskim rajonie «zabylisia» vysadzić 40 dreŭ na terytoryi voinskaha pachavańnia.

Pa vynikach pravierki Hienprakuratura prainfarmavała Saviet Ministraŭ pra realny stan spraŭ. U Mahilovie kiraŭnik kamunalnaha pradpryjemstva ŭžo atrymaŭ aficyjnaje patrabavańnie likvidavać parušeńni. Ciapier adkaznym asobam daviadziecca zaniacca rabotaj nad pamyłkami i narešcie vysadzić tyja drevy i kusty, jakija dahetul isnavali tolki na papiery.

• 3
• 0
• 8
• 3
• 0
• 0
• 2
• 0