Biełaruski akcior-školnik, jaki začytvaŭ «Hoj ty, Ruś moja, rodnaja», raskazaŭ, jak paśpieŭ źjeździć u «Artek»
15‑hadovaha Słavu Kanarazava z Hrodna rodnyja bajalisia adpuskać. Ale padletak zmoh ich pierakanać, što hetaja pajezdka dapamoža pastupić u teatralny ŭniviersitet u Maskvie.
Školnik z Hrodna maryć być prafiesijnym akcioram. Jon sapraŭdy šmat plonna pracuje dziela taho, kab dasiahnuć pastaŭlenaj mety. Chłopiec skončyŭ teatralnaje adździaleńnie Dziciačaj škoły mastactvaŭ imia Antonija Tyzienhaŭza, hraje ŭ narodnym moładzievym muzyčna-dramatyčnym teatry «Haradzienskaja Nadzieja».
Sprabuje siabie i ŭ kino. Niadaŭna pa NTB pakazali film «Partyzany», dzie Słava hraje aficera NKUS.
A ŭ mai ŭ rasijskim kinaprakacie vyjšaŭ film «Nie adna doma 3», dzie biełarus syhraŭ adnaho sa staršakłaśnikaŭ.
Mnohim jon zapomniŭsia, kali vykłaŭ videa, jak z nadryvam začytaŭ «Hoj ty, Ruś moja, rodnaja», za što adchapiŭ ad biełarusaŭ.
Słava płanuje pastupić u adzin z teatralnych VNU Rasii z tak zvanaj «załatoj piaciorki» — u pryjarytecie HITIS i teatralny instytut imia Barysa Ščukina.
Sioleta chłopiec udzielničaŭ u rasijskim Mižnarodnym konkursie junych čytalnikaŭ «Žyvaja kłasika» i vyjšaŭ u finał, jaki musiŭ adbycca ŭ łahiery «Artek». Svaimi videa i ŭražańniami adtul jon dzielicca ŭ sacsietkach.
Rodnyja školnika vielmi bajalisia adpuskać jaho na akupavanuju terytoryju, ale Słava zmoh pierakanać ich u tym, što heta — unikalnaja mahčymaść, ad jakoj nielha admaŭlacca. Maŭlaŭ, suviaziaŭ i błatu ŭ jaho niama, tamu treba šukać luby varyjant paznajomicca ź ludźmi, jakija źviazanyja sa śvietam teatru i kino.
Patencyjnaja niebiaśpieka jaho nie vielmi chvalavała — ničoha ž nie adbyłosia z haściami łahiera za čatyry hady. A tam užo i važatyja supakojvali asabliva ŭraźlivych dziaciej — kazali, što pobač ustalavana SPA.
Zatoje pierśpiektyŭ dla siabie chłopiec bačyŭ šmat. Raniej pieramožcaŭ «Žyvoj kłasiki» bieź ispytaŭ brali ŭ teatralny instytut imia Barysa Ščukina pa patryjatyčnaj kvocie. Ciapier hetaha niama, ale ž Słava vieryć, što pry pastupleńni jamu paśpiachovy ŭdzieł u konkursie čytalnikaŭ moža dapamahčy.
Z Hrodna da Maskvy Słava jechaŭ samastojna (jon byŭ na źmienie ŭ mai). Adtul užo ŭ składzie arhanizavanaj hrupy — ciahnikom da Simfieropala. Było viesieła, bo ŭ vahonie znajšłasia navat dziaŭčyna z hitaraj. Tamu ŭsiu darohu padletki śpiavali, viesialilisia, razmaŭlali.
Amal što apošniaja mahčymaść narmalna pahavaryć z rodnymi była pryblizna za 20 chvilin da Krymskaha mosta. U Krymie Słava nie moh telefanavać ź biełaruskaj simki. Na terytoryi łahiera byŭ vaj-faj, ale heta asabliva nie dapamahała: telehram i instahram praz VPN pracavali žudasna.
Chłopca raźmierkavali ŭ dziciačy łahier «Palavy».
Na konkursie było jašče niekalki školnikaŭ ź Biełarusi.
Uvohule, tema źmieny Słavy hučała jak «Naščadki Vialikaj Pieramohi», tamu było šmat «patryjatyčnych» mierapryjemstvaŭ.
U Słavy pajezdka abyšłasia biez pryhod. Ale kali inšaja hrupa pajechała ŭ Sievastopal na ekskursiju, dzieci byli vymušany chavacca ŭ bambaschovišča, bo była pahroza abstrełaŭ.
Chłopcam u łahiery nie chapała ježy — usio było davoli smačnaje i karysnaje, ale ž dla padletkaŭ niedastatkova.
A kali Słava padčapiŭ prastudu, to asablivaj dapamohi ŭ miedpunkcie nie atrymaŭ, lačyŭsia samastojna, treba było mieć svaje leki.
Słava ŭ vyniku paśpiachova vystupiŭ u «Arteku» i trapiŭ na supierfinał konkursu ŭ Maskvu — vystupaŭ na Krasnaj płoščy i dekłamavaŭ «U śpisach nie značyŭsia» Barysa Vasiljeva.
Ciapier čytajuć
Na Minskim paŭmarafonie pamior 50‑hadovy biahun. Voś što viadoma pra Alaksieja Dašynieviča11
Kamientary