Zarobak jak u ajcišnika: biełaruskamu traktarystu prapanujuć da 10 tysiač rubloŭ. Razabralisia, u čym sakret
«Kali chočacie atrymać dziesiać tysiač, treba praktyčna nie vyłazić z traktara. Pracavać i ŭdzień, i ŭnačy».
Na biełaruskim dziaržaŭnym partale zaniataści źjaviłasia vakansija, jakaja lohka mahła b stać maraj mnohich biełarusaŭ. Pradpryjemstva «Višniaviecki-Ahra» sa Staŭbcoŭskaha rajona šukaje traktarysta-mašynista sielskahaspadarčaj vytvorčaści i abiacaje jamu ad 5000 da 10 000 rubloŭ u miesiac.
Dla pracaŭładkavańnia dastatkova ahulnaj siaredniaj adukacyi, a viedańnie ruskaj movy paznačana jak pačatkovaje, to-bok praca padychodzić i zamiežnym hramadzianam.
Dla paraŭnańnia, bolšaść traktarystaŭ u biełaruskich haspadarkach siońnia atrymlivajuć ad 1200 da 3000 rubloŭ, navat u siezon niaredka havorka idzie pra 3000—5000 rubloŭ. Tamu prapanova ŭ 10 tysiač vyhladaje jak niešta zusim vyklučnaje.
Adkul ža biarucca takija hrošy?
Kab atrymać 10 tysiač, treba praktyčna nie vyłazić z traktara
Pad vyhladam suiskalnika my patelefanavali ŭ adździeł kadraŭ haspadarki.
Tam raspaviali, što 5000 rubloŭ možna zarabić u siezon pry 12‑hadzinnym pracoŭnym dni. A voś vierchniaja miaža ŭ 10 tysiač — heta ŭžo amal bieśpierapynnaja praca amal 24/7.
«Kali chočacie atrymać dziesiać tysiač, treba praktyčna nie vyłazić z traktara. Pracavać i ŭdzień, i ŭnačy», — patłumačyli ŭ haspadarcy.
Tam ža adznačyli, što praca źviazanaja z ahrachimijaj.
«Rabotnik budzie zajmacca ŭniasieńniem hierbicydaŭ, srodkaŭ dla abarony raślin ad pustaziella, škodnikaŭ i chvarob. Najpierš havorka idzie pra apracoŭku rapsu i zbožža. To bok heta praca z chimijaj», — raspaviali ŭ adździele kadraŭ.
Adznačym, što hierbicydy — heta mocnyja jady, i takaja praca ličycca škodnaj dla zdaroŭja.
Vialikija hrošy — tolki niekalki miesiacaŭ na hod
Jašče adzin važny niuans — siezonnaść. U adździele kadraŭ nam patłumačyli, što vysokija zarobki prychodziacca na čas aktyŭnaj apracoŭki paloŭ — najbolš intensiŭny pieryjad doŭžycca kala dvuch miesiacaŭ.
Potym usio jak u astatnich miechanizataraŭ: zimoj ramont techniki, pamiž siezonami byvaje pa-roznamu. Tak, u «spakojnyja» miesiacy traktaryst moža atrymlivać ad 800 da 3000 rubloŭ u zaležnaści ad abjomu rabot.
Nakolki niebiaśpiečnaja takaja praca
Praca apieratara apyrskvalnika sapraŭdy ličycca adnoj z samych škodnych u raślinavodstvie.
Hierbicydy, funhicydy i insiektycydy ŭvachodziać u hrupu piestycydaŭ — rečyvaŭ, pryznačanych dla baraćby sa škodnikami, pustaziellem i chvarobami raślin. Pry parušeńni techniki biaśpieki abo praciahłym kantakcie jany mohuć traplać u arhanizm praz dychalnyja šlachi i skuru.
Suśvietnaja arhanizacyja achovy zdaroŭja aceńvaje kolkaść vypadkaŭ nienaŭmysnych atručvańniaŭ piestycydami ŭ śviecie prykładna ŭ 385 miljonaŭ štohod. Najčaściej heta adbyvajecca ŭ krainach, dzie słaba kantralujecca vykarystańnie ahrachimii i parušajucca patrabavańni biaśpieki.
Navat sučasnyja apyrskvalniki nie vyklučajuć ryzyki kantaktu z ahrachimijaj. Najbolšyja pahrozy dla zdaroŭja ŭźnikajuć pry pryhatavańni rastvoraŭ, źmiešvańni kancentravanych preparataŭ, zapraŭcy bakaŭ, pramyvańni sistemy i ramoncie abstalavańnia.
A kolki traktarystam płaciać zvyčajna?
Na fonie abiacanych 10 tysiač rubloŭ prapanova «Višniavieckaha-Ahra» vyhladaje chutčej vyklučeńniem.
Analiz vakansij na dziaržaŭnym partale zaniataści pakazvaje, što bolšaść traktarystaŭ-mašynistaŭ u biełaruskich sielhaspradpryjemstvach mohuć raźličvać na 1200—2500 rubloŭ na miesiac.
U siezon pasiaŭnoj abo ŭboračnaj kampanii zarobki časta vyrastajuć da 3000‑5000 rubloŭ. U asobnych haspadarkach možna sustreć prapanovy ŭ 6000‑7000 rubloŭ, ale jany taksama pryviazanyja da intensiŭnaj siezonnaj pracy.
Darečy, heta ŭžo nie pieršy raz, kali haspadarka «Višniaviecki-Ahra» šukaje takoha śpiecyjalista. Jašče ŭ sakaviku pradpryjemstva prapanoŭvała traktarystu ad 3 da 6 tysiač rubloŭ.
Kamientary