Biełaruskija artysty napružylisia: z Novaha hoda jany nie zmohuć pracavać jak IP — pryjdziecca addavać dziaržavie bolš hrošaj
Paśla 31 śniežnia 2025 hoda artysty nie zmohuć pracavać u jakaści IP. Heta źviazana sa skančeńniem pierachodnaha pieryjadu, jaki davaŭsia pradprymalnikam ad sceny na čas dla pierarehistracyi paśla vychadu pastanovy Savieta ministraŭ №457 «Ab vidach indyvidualnaj pradprymalnickaj dziejnaści».
U pastanovie pieraličvajucca vidy dziejnaści, pa jakich paśla Novaha hoda možna budzie praciahvać pracavać jak IP ci afarmlać ramieśnictva — muzykaŭ tam niama.
Ipešnikami i dalej zmohuć być, naprykład, fiermiery, biełarusy jakija piakuć chleb i robiać torty, šyjuć adzieńnie i stvarajuć aksiesuary dy meblu, a taksama akazvajuć pasłuhi ŭ śfiery ramontu i budoŭli.
A voś siarod tvorčych prafiesij prava mieć IP pakinuli tolki za tymi, chto zajmajecca mastactvam i litaraturnaj tvorčaściu (žurnalisty nie ličacca), a taksama za dziejačami ŭ halinach fizičnaj kultury, sportu, arhanizacyi adpačynku i zabavaŭ. Muzyčnaja artysty ŭ hetuju katehoryju nie ŭvachodziać.
U suviazi z hetym niekatoryja śpievaki mitusiacca i dumajuć nad tym, jakim čynam buduć pracavać paśla 31 śniežnia. Takim pytańniem u apošni momant, naprykład, zadałasia i Alena Łanskaja.
Toje, što heta chvaluje Alenu Łanskuju — nie dziva, bo jakraz padobnych artystaŭ, dapuščanych da bujniejšych placovak i śviataŭ, zakranie dziejańnie novaj pastanovy. Pryjdziecca rehistravać jurydyčnuju asobu, a heta paciahnie za saboj vyšejšyja padatki i składaniejšuju buchhałteryju.
Dla andehraŭndu ž, adznačajuć surazmoŭcy «Našaj Nivy», źmienicca mała.
«Raniej šukali IP, praź jakich možna było arhanizavać kancert, zaraz šukajuć jurasob z rejestru arhanizataraŭ, chto voźmiecca. Na vychadzie, kaniečnie, atrymlivajecca mienš hrošaŭ, bo jurasoba bolš sabie adkusvaje na vydatki. Ale kali hrošy i tak simvaličnyja, asablivaj roźnicy niama — tabie prosta chopić na dva pivy zamiest troch. A kali ty ŭ «čornym śpisie», to ŭvohule niama roźnicy», — iranizuje pradstaŭnik alternatyŭnaj sceny.
Ź im salidarnyja i jaho kalehi, ź jakimi my pahutaryli na ŭmovach zachavańnia ananimnaści.
«Nas heta tema nie tyčycca, tamu što prybytki ŭ nas nie takija, kab rehistravać praź IP.
Pieramieny buduć aktualnyja hałoŭnym čynam dla kavier-bendaŭ i kamand, jakija pracujuć na karparatyvach/viasiellach praź ivent-ahienctvy».
Raniej my pisali, što, pa roznych acenkach, siońniašni čorny śpis muzykaŭ u Biełarusi moža naličvać minimum tysiaču čałaviek — u jaho traplali jak za hramadzianskuju pazicyju, tak i pa dziŭnych pryčynach: «časta vyjazdžaŭ za miažu, zanadta śmieła viadzie sacsietki». Takija ludzi nie mohuć raźličvać na atrymańnie «hastrolki», jakuju patrabujuć dla praviadzieńnia luboha mierapryjemstva — chaj to kviz ci vystup u bary kavier-benda.
«Kryštalna čystym» ža pracaŭnikam sceny pryjdziecca damaŭlacca z aficyjna zarehistravanymi arhanizatarami kulturna-vidoviščnych mierapryjemstvaŭ. Na siońnia tam fihuruje amal 200 roznych arhanizacyj, pa bolšaj častcy — dziaržaŭnych ci adkryta praŭładnych.
Ciapier čytajuć
Babaryka raskazaŭ, čamu pierad vybarami nie šukaŭ padtrymki ŭ Rasii. I jak jaho chacieli zvolnić ź Biełhazprambanka za łozunh «Žyvie Biełaruś!»21
Babaryka raskazaŭ, čamu pierad vybarami nie šukaŭ padtrymki ŭ Rasii. I jak jaho chacieli zvolnić ź Biełhazprambanka za łozunh «Žyvie Biełaruś!»
Maksim Znak pra pres-kanfierencyju va Ukrainie: My damovilisia nie ŭzdymać najbolš balučyja temy — katavańniaŭ, sankcyj, vajny. Moža, musili my pa-inšamu zrabić1010
Kamientary
Ohromnoje količiestvo ludiej, kotoryje mohli podrabotať, śpiev paru piesien na korporativie, proviedia jubilej i t.d., ostajutsia za bortom.