Biełarusa ŭ žadańni abmiežavać paŭsiudnuju rekłamu kazino padtrymała Minhandlu. Ale prapahandysty paraili jamu «nie leźci nie tudy»
U Biełarusi mohuć uzmacnić abmiežavańni na rekłamu ihralnaha biznesu. Adpaviednyja papraŭki ŭ zakanadaŭstva ŭžo raspracavanyja profilnym ministerstvam. Adnak sama inicyjatyva hramadzian źnizu vyklikała rezkaje razdražnieńnie ŭ Mukavozčyka.
Žychar Maładziečna Ihar Barysionak nakiravaŭ zvaroty ŭ ministerstvy kultury, infarmacyi i antymanapolnaha rehulavańnia i handlu (MARH) z prapanovaj całkam zabaranić rekłamu ihralnych ustanoŭ u krainie. Atrymany ad MARH aficyjny adkaz jon apublikavaŭ na svajoj staroncy ŭ Facebook.
U dakumiencie viedamstva tłumačyć, što ciapierašni zakon «Ab rekłamie» nie ŭtrymlivaje poŭnaj zabarony na prasoŭvańnie kazino i bukmiekieraŭ. Isnujuć tolki kropkavyja abmiežavańni: takuju rekłamu nielha raźmiaščać na budynkach škoł, balnic, spartyŭnych abjektaŭ, na dziciačych cackach, a na telebačańni i radyjo jana dazvolenaja tolki ŭ načny čas — z 21:00 da 7:00. Vonkavaja rekłama i rekłama ŭ internecie zastajucca praktyčna nieabmiežavanymi.
Tym nie mienš, u MARH aficyjna zajavili, što «padzialajuć apasieńni» hramadzianina. Viedamstva paviedamiła, što ŭžo raspracavała prapanovy pa ŭviadzieńni dadatkovych abmiežavańniaŭ na raźmiaščeńnie i raspaŭsiudžvańnie rekłamy ihralnych ustanoŭ. Ciapier hetyja źmieny ŭ zakon pavinny prajści praceduru razhladu i ŭzhadnieńnia sumiesna ź inšymi zacikaŭlenymi dziaržaŭnymi orhanami. Kankretnyja terminy i detali novych zabaron u adkazie nie ŭdakładniajucca.
Kałumnist vydańnia «SB. Biełaruś siehodnia», prapahandyst Andrej Mukavozčyk pryśviaciŭ skarzie aktyvista asobny artykuł.
Prapahandyst nie staŭ krytykavać samu rekłamu kazino, ź jakich kormicca režym, jaki kormić jaho, a abrynuŭsia na aŭtara zvarotu, nazvaŭšy takich ludziej «turbapatryjotami, jakim nadakučyła rabić svaju spravu». Hałoŭnaja pretenzija Mukavozčyka źviałasia da taho, što hramadzianin nakiravaŭ listy adrazu ŭ try ministerstvy, nie razabraŭšysia, što ŭzhadnieńniem vonkavaj rekłamy na miescach zajmajucca vykankamy.
U svaim tekście Mukavozčyk adkryta papiaredziŭ biełarusaŭ ab nastupstvach zališniaj hramadzianskaj aktyŭnaści. Jon paraiŭ «nie stvarać adno adnamu lišnich prablem» i «nie leźci nie tudy navat z samych najlepšych pamknieńniaŭ». U jakaści arhumienta prapahandyst pryhraziŭ, što skarhi hramadzian u dziaržaŭnyja orhany mohuć pryvieści da taho, što va ŭładaŭ źjavicca «spakusa hetuju svabodu padkarektavać».
-
U harach Kyrhyzstana z drona adšukali cieły źnikłych biełaruskich alpinistaŭ
-
Ź Biełarusi vysyłajuć bolš za dziesiać polskich śviataroŭ. U Mahilovie ŭžo raźvitalisia z probaščam — i z prajektam novaha kaścioła
-
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»
Kamientary