100 tysiač žyćciaŭ za 1% terytoryi. Ekśpiert — pra tupik, u jakim apynułasia armija Pucina
Z takimi tempami prasoŭvańnia Maskvie spatrebicca jašče minimum čatyry hady vajny tolki dla taho, kab całkam zaniać anieksavanyja vobłaści. Adzinym šancam na pośpiech dla Pucina zastajecca palityčny cisk Trampa na Kijeŭ, śćviardžaje palityčny ahladalnik BILD Juljan Ropkie.
Na čaćviortym hodzie vajny suprać Ukrainy Rasija, jak i ŭ papiarednija hady, mieła pieravahu na poli boju: kala 1 młn sałdat i vajennaja ekanomika, jakaja kruhłasutačna — z dapamohaj Kitaja — vyrablaje zbroju i bojeprypasy dla vajny Pucina.
Tym nie mienš u 2025 hodzie joj udałosia zachapić tolki 4400 kvadratnych kiłamietraŭ — mienš za 1% niezaniataj ukrainskaj terytoryi, piša Ropkie.
Za heta ŭ 2025 hodzie zahinuła amal 100 000 hramadzian Rasii, jak pakazvajuć realistyčnyja acenki pa-za miežami rasijskaj i ŭkrainskaj prapahandy. Da siaredziny hoda, zhodna z analizam zališniaj śmiarotnaści, praviedzienym vydańniem «Miedyjazona», kolkaść zahinułych užo składała 48 tysiač čałaviek, ź jakich 22 tysiačy byli viadomyja pajmienna.
U druhoj pałovie hoda ŭzrovień strat, pavodle źviestak vydańnia, pa mienšaj miery zastavaŭsia prykładna takim ža. Praz bolš aktyŭnyja nastupalnyja apieracyi Rasii, mahčyma, straty pavialičylisia, tamu ličba zahinułych kala 100 000 (plus 200 000 paranienych rasijan) — realistyčnaja acenka, piša Ropkie.
Rasija pa-raniejšamu znachodzicca daloka ad svajoj mety — zachopu čatyroch rehijonaŭ, anieksavanych Pucinym u 2022 hodzie.
U Danieckaj vobłaści Ukraina pa-raniejšamu ŭtrymlivaje 5700 kvadratnych kiłamietraŭ, u Zaparožskaj — 5800 i ŭ Chiersonskaj — 6400 kv. km. Takim čynam, navat kali Rasija zastaniecca hetak ža paśpiachovaj, jak u 2025 hodzie, rasijskaj armii spatrebicca jašče jak minimum čatyry hady, kab uziać pad kantrol anieksavanyja terytoryi.
Adzinaj nadziejaj Rasii na «chutkuju pieramohu» va Ukrainie zastajucca sumiesnyja namahańni z administracyjaj prezidenta ZŠA Donalda Trampa, jakaja pavinna prymusić Kijeŭ dobraachvotna vyvieści svaju armiju z krytyčna važnych rajonaŭ, reziumuje ahladalnik BILD.
Ciapier čytajuć
Jakija retranślatary na miažy maje na ŭvazie Ukraina?37
Kamientary
Dakładniej było b kazać 200 tysiač žyćciaŭ, bo ŭkraincy taksama hinuć. Pryčym na hetym etapie vajny, bolšaść strat idzie praz drony, jakich zaraz bolš z rasiejskaha boku.
"Danieckaj vobłaści Ukraina pa-raniejšamu ŭtrymlivaje 5700 kvadratnych kiłamietraŭ, u Zaparožskaj — 5800 i ŭ Chiersonskaj — 6400 kv. km"©
Tolki havorka pra abaviazkovy zachop Zaparožskaj i Chiersonskaja vobłaści nie idzie. Jany płanujuć zachapić Danbas, a heta mieniej za 1% terytoryi Ukrainy.
Chutčej za ŭsio, utrymańnie hetaj terytoryi budzie kaštavać Ukrainie jašče 100 tysiač duš ( pry čym, jakaja roźnica, kolki pry hetym zhinie rasiejcaŭ, ich usio roŭna nichto nie ličyć, da i vajujuć jany dabraachvotna za hrošy).