Cudaŭ nie budzie dla tych, chto spadziavaŭsia schudnieć biez dyjety. Papularnaje intervalnaje haładańnie nie dziejničaje biez deficytu kałoryj
Intervalnaje haładańnie stała sapraŭdnym chitom apošnich hadoŭ: mnohija ličać, što kali jeści tolki ŭ peŭny čas, naprykład, z 8‑j ranicy da 4‑j dnia, to lišniaja vaha sydzie sama saboj, a zdaroŭje palepšycca. Adnak novaje surjoznaje daśledavańnie pakazvaje, što heta nie dziejničaje.
Pra heta piša telehram-kanał Sybulinka sa spasyłkaj na publikacyju ŭ aŭtarytetnym časopisie Science Translational Medicine.
Navukoŭcy ź Niamieckaha instytuta charčavańnia čałavieka i kliniki Charité pryjšli da vysnovy: abmiežavańnie času pryjomu ježy samo pa sabie nie niasie anijakaj karyści dla mietabalizmu i serca, kali vy nie źmianšajecie ahulnuju kolkaść kałoryj.
Jak pravodzili ekśpierymient
Raniej ličyłasia, što papularnaja schiema «8/16» (kali čałaviek jeść ciaham 8 hadzin, a 16 hadzin haładaje) źnižaje ryzyku atłuścieńnia, palapšaje adčuvalnaść da insulinu i narmalizuje cukar.
Ale prablema raniejšych nazirańniaŭ była ŭ tym, što navukoŭcy nie mahli zrazumieć: palapšeńni adbyvajucca praz «mahiju» času ci prosta tamu, što za 8 hadzin čałaviek paśpiavaje źjeści mienš, čym za ŭvieś dzień?
Kab pastavić kropku ŭ hetym pytańni, daśledčyki adabrali 31 žančynu ź lišniaj vahoj abo atłuścieńniem. Ekśpierymient byŭ strohim:
-
Dva tydni ŭdzielnicy jeli zhodna z «ranišnim» režymam (z 08:00 da 16:00).
-
Dva tydni — pavodle «viečarovaha» (z 13:00 da 21:00).
Hałoŭnaja ŭmova: žančyny atrymlivali absalutna adnolkavyja kałaryjnaściu i składam stravy. Heta dazvoliła vyklučyć faktar pierajadańnia ci niedajadańnia.
Vyniki rasčaroŭvajuć
Analiz pakazaŭ, što ni rańni, ni poźni režym charčavańnia nie pryvioŭ da klinična značnych źmien. Adčuvalnaść da insulinu, uzrovień lipidaŭ u kryvi i markiery zapaleńnia zastalisia takimi ž, jak i byli.
Aŭtary daśledavańnia kanstatujuć: karyść, jakuju prypisvali intervalnamu haładańniu raniej, chutčej za ŭsio, była vynikam banalnaha skaračeńnia kałoryj. Ludzi prosta mienš jeli, bo mieli na heta mienš času.
Ale jość adzin niuans
Adzinaje istotnaje adroźnieńnie, jakoje zaŭvažyli navukoŭcy, tyčycca bijałahičnych rytmaŭ. Hrafik charčavańnia sapraŭdy ŭpłyvaje na «ŭnutrany hadzińnik». Pry poźnim režymie pryjomu ježy cyrkadnyja rytmy ŭ žančyn ssoŭvalisia ŭ siarednim na 40 chvilin, što pryvodziła da bolš poźniaha zasynańnia i ciažejšaha abudžeńnia.
Takim čynam, hałoŭny sakret pachudańnia i mietabaličnaha zdaroŭja zastajecca niaźmiennym i sumnym: klučavoje značeńnie maje nie toje, kali vy jaście, a toje, kolki vy jaście.
Kamientary
***
Intervalnaje haładańnie (IH) - heta režym charčavańnia, jaki čarhuje pieryjady pryjomu ježy i pieryjady ŭstrymańnia ad ježy, fakusujučysia nie na tym, što jość, a na kali jość, z metaj palapšeńnia zdaroŭja i źnižeńnia vahi, časta praz aktyvacyju pracesu aŭtafahii (samaačystki kletak). Papularnyja schiemy ŭklučajuć mietad 16/8 (16 hadzin haładańnia, 8 hadzin dla ježy), 5:2 (5 dzion zvyčajnaha charčavańnia, 2 dni z mocnym abmiežavańniem kałoryj) i inšyja varyjacyi.
---
Niadaŭna miedyki "dazvolili" haładać da 36-ci hadzin