Eks-palitviaźnia Ihara Karnieja zaprašajuć u Biełaruś, kab viarnuć adzin rubiel
«Mohuć ža paradavać, kali zachočuć», — iranizuje žurnalist.
«Śledčy kamitet zaprašaje ŭ svajo minskaje ŭpraŭleńnie, kab ja moh zabrać pa viedamaści… 1 rubiel. Nie, nijakaja nie apiska: nie 1000, nie 100 i navat nie 10. A mienavita 1», — napisaŭ Ihar Karniej u svaim fejsbuku.
«Paśla taho, jak nahruzkaj da asnoŭnaha terminu ŭ jakaści dadatkovaha pakarańnia ŭlapili 20 tysiač rubloŭ materyjalnaj kampiensacyi, jak karpatliva padličyli straty «supraćzakonnaha ŭzbahačeńnia» ad žurnalisckaj dziejnaści, jak postfaktum vystavili rachunak za kałanijalnuju robu i spažyty korm, jak vykarystoŭvali biaspłatnuju niavolnickuju pracu na piłaramie dy miedałupni — i raptam pryznać pamyłku ŭ padlikach! Takoje pasypańnie popiełam darahoha vartaje», — piša žurnalist.
Jon zaznačaje, što ceły finansava-ekanamičny adździeł upraŭleńnia SK RB pa Minsku, zmarnavaŭšy hod paśla prysudu — adpaviedna, vydatkavaŭšy na adrasnaje rasśledavańnie kruhleńkuju sumu — ahučyŭ biesprecedentny vierdykt, zaniaŭšy bok palitviaźnia.
«Mała za toje — na «vy» dy jašče ź vialikaj litary: «Dieniežnyje sriedstva v summie 1 bieł. rub. podležat vozvratu Vam po prinadležnosti». Paśla hetaha jašče paŭhoda papierka dzieści boŭtałasia pa biurakratyčnych šufladach, pakul u miachu Śviatoha Mikałaja pad Kalady nie apynułasia ŭ paštovaj skryncy na Sucharava). Čamu ažno 1 rubiel, a nie 10 kapiejek? Adkul padobnyja ščodraści? Jaki viedamasny ałchimik varažyŭ nad raźlikami? U łohiku «finansavaj amnistyi» nie chočacca navat i zahłyblacca, usio roŭna prostym śmiarotnym nie zrazumieć. Zatoje jaskrava ŭjaŭlajecca viadomy kinapiersanaž, jaki za rubiel na apachmiełku «nie zabudzić, nie praścić»). Voś i ja pasiarod dylemy: jak razarvacca pamiž zaprašeńniem i vydvareńniem», — pytajecca Ihar Karniej.
Ciapier čytajuć
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?12
Kamientary