Supracoŭnik Imihracyjnaj i mytnaj palicyi ZŠA (ICE) zastreliŭ žančynu ŭ Minieapalisie, štat Miniesota, jakaja, jak śćviardžajuć amierykanskija ŭłady, sprabavała taranić patrul ICE na svaim aŭtamabili, piša Bi-bi-si.
U viedamstvie pavodziny achviary nazvali aktam «unutranaha teraryzmu», a reakcyju patrula — samaabaronaj.
Incydent adbyŭsia padčas pratestnaj akcyi suprać dziejańniaŭ ICE pa zabieśpiačeńni vykanańnia imihracyjnaha zakanadaŭstva, paviedamlajuć miascovyja ŚMI.
«Sproba pierajechać našych supracoŭnikaŭ pravaachoŭnych orhanaŭ z metaj ich zabojstva — akt unutranaha teraryzmu», — zajaviła Ministerstva ŭnutranaj biaśpieki, jakoje kiruje ICE.
«Supracoŭnik ICE, bajučysia za svajo žyćcio, žyćcio svaich kaleh-supracoŭnikaŭ pravaachoŭnych orhanaŭ i biaśpieku nasielnictva, zrabiŭ streły ŭ metach samaabarony», — taksama havorycca ŭ zajavie.
Pavodle dadzienych telekanała CBS — miedyja-partniora Bi-bi-si, zabitaja — 37‑hadovaja paetesa Rene Hud, hramadzianka ZŠA i miascovaja žycharka.
Mer Minieapalisa Džejkab Frej rezka raskrytykavaŭ zajavu fiederalnych uładaŭ, asabliva tuju častku, u jakoj stralba była acharaktaryzavana jak akt samaabarony, nazvaŭšy hetuju viersiju «śmiećcievym naratyvam».
Miž tym u Ministerstvie ŭnutranaj biaśpieki śćviardžajuć, što siarod supracoŭnikaŭ ICE jość paciarpiełyja, jakija, jak skazana ŭ zajavie, «poŭnaściu adnoviacca».
Kolki supracoŭnikaŭ słužby paciarpieła i jakija mienavita traŭmy jany atrymali, pakul nieviadoma.
Pa słovach načalnika palicyi Minieapalisa Brajana O'Chara, žančyna znachodziłasia ŭ aŭtamabili, jaki pierakryvaŭ prajeznuju častku. U niejki momant, skazaŭ O'Chara, da jaje padyšoŭ supracoŭnik ICE, paśla čaho aŭtamabil pačaŭ źjazdžać, a zatym prahučali jak minimum dva streły.
Paviedamlajecca, što stralba adbyłasia na skryžavańni 34‑j vulicy i Portlend-avieniu ŭ Minieapalisie.
U niekatorych haradach Miniesoty ŭ sieradu prajšli burnyja pratesty suprać mier pa zabieśpiačeńni vykanańnia imihracyjnaha zakanadaŭstva, jakija pravodziacca administracyjaj Trampa i nakiravany na aryšty i departacyju nielehalnych mihrantaŭ.
Jak pakazała miascovaje adździaleńnie telekanała CBS, supracoŭniki ICE ŭžyvali piercavyja bałončyki i rašturchoŭvali pratestoŭcaŭ.
Supracoŭniki kanała śćviardžajuć, što videa incydentu sa stralboj raspaŭsiudžvajecca siarod miascovych žycharoŭ, i adzin ź jaho reparcioraŭ bačyŭ hety rolik.
«Niemahčyma ŭjavić, kab hetaja žančyna zasłužyła śmierć za svaje dziejańni», — skazaŭ adzin ź vidavočcaŭ telekanału.
Ministr unutranaj biaśpieki ZŠA Kryści Noem, jakaja prylacieła ŭ Minieapalis, vykłała aficyjnuju viersiju padziej, jakija pryviali da stralby. Pavodle jaje słoŭ, supracoŭniki ICE viartalisia ŭ ofis paśla zaviaršeńnia apieracyi, kali adzin ź ich aŭtamabilaŭ zatrymaŭsia ŭ śniezie.
Ahienty sprabavali vyšturchnuć mašynu, kali vakoł ich sabrałasia hrupa pratestoŭcaŭ, jakija, pa słovach ministra, sačyli za supracoŭnikami na praciahu ŭsiaho dnia i sprabavali zabłakavać ich pieramiaščeńnie.
Pa viersii Noem, žančyna, jakuju zastrelili, «pieratvaryła svoj aŭtamabil u zbroju» i nakiravała jaho na supracoŭnikaŭ z metaj «zabić» ich.
Noem zajaviła, što adzin z ahientaŭ byŭ źbity hetaj žančynaj, dadaŭšy, što raniej jon užo traplaŭ pad mašynu ŭ incydencie ŭ červieni. Jana nazvała ahienta, jaki adkryŭ ahoń, «vopytnym» supracoŭnikam, jaki dziejničaŭ u ramkach «samaabarony».
Taksama Noem paviedamiła, što budzie praviedziena rasśledavańnie FBR i što apieracyi ICE praciahnucca.
Hubiernatar štata i mer horada — suprać Trampa
Hubiernatar amierykanskaha štata Miniesota Cim Uołz abvinavaciŭ imihracyjnuju palityku administracyi Donalda Trampa ŭ tym, što jana nakiravana na stvareńnie atmaśfiery strachu i hučnych zahałoŭkaŭ u ŚMI. Heta zajava prahučała paśla taho, jak fiederalny ahient ZŠA zastreliŭ žančynu.
Pavodle jaho słoŭ, štatu nie patrebna dadatkovaja «dapamoha» z Vašynhtona ŭ zabieśpiačeńni paradku. Uołz abviaściŭ, što hatovy zadziejničać Nacyjanalnuju hvardyju Miniesoty.
Raniej mer Minieapalisa Džejkab Frej zaklikaŭ fiederalnych imihracyjnych aficeraŭ pakinuć horad.
Trahiedyja ŭ Miniesocie stała rezkaj eskałacyjaj na fonie čarhovaj chvali imihracyjnych apieracyj pa ŭsioj terytoryi ZŠA.
Paśla ŭstupleńnia na pasadu ŭ druhi raz Tramp sankcyjanavaŭ adpraŭku sotniaŭ vajskoŭcaŭ Nacyjanalnaj hvardyi i supracoŭnikaŭ ICE u roznyja harady ZŠA, kab, pa jaho słovach, spravicca z «złačynnaściu, što vyjšła z-pad kantrolu».
Kamientary