U «Minsk-Śviecie» adkryłasia novaja škoła, jakuju pabudavali za $24 miljony
8 studzienia ŭ mikrarajonie «Minsk-Śviet» adkryłasia škoła №228, jakaja vyłučajecca svajoj jarkaj i tvorčaj architekturaj. Zabudoŭščyk nie staŭ čakać vieraśnia i paśpiašaŭsia chutčej zdać ustanovu, da jakoj była źviernutaja ŭvaha i horada, i žycharoŭ mikrarajona, piša «Anłajnier».
Pieršyja vučni ŭžo zaniali svaje party — pačatak novaha hoda ŭ ich realna staŭ pačatkam novaha žyćcia.
U ich rasparadžeńni akazalisia nie tolki śviežyja navučalnyja kłasy, ale i toje, pra što ŭ ich uzroście možna tolki maryć: basiejn, zony adpačynku, vuličnyja placoŭki dla hulniaŭ i mnohaje inšaje.
Novaja škoła pasialiłasia pa adrasie Žaresa Ałfiorava, 20. Terytaryjalna jana znachodzicca ŭ kvartale «Rodnaja kraina», jaki składajecca ŭsiaho z dvuch kamiercyjna-žyłych damoŭ-dvajniatak «Niaśvižski zamak» i «Mirski zamak». Budynki pakul nie zdadzienyja ŭ ekspłuatacyju, dy i terytoryja vakoł ich vyhladaje tak sabie — usio ŭ pracesie pieraŭtvareńnia. U budučyni pamiž novabudoŭlami i škołaj źjavicca nievialikaja zialonaja zona.
Uvohule heta treciaja pa liku škoła ŭ «Minsku-Śviecie». Kvartał zabudoŭvajecca i abžyvajecca navasiołami tak chutka, što pieršyja dva abjekty litaralna pierapoŭnienyja i pracujuć na miažy mahčymaściaŭ. Mnohim miascovym dzieciam usio adno davodziłasia jeździć na vučobu ŭ inšyja škoły, choć i raźmieščanyja nie vielmi daloka ad doma, ale ŭžo nie ŭ krokavaj dastupnaści. A šmat damoŭ jašče nie zdadziena, tamu nieabchodnaść treciaj navučalnaj ustanovy była vidavočnaja.
Budynak škoły vidać zdalok. Pa-pieršaje, jon pafarbavany ŭ prykmietnyja kolery: nasyčana-čyrvony i pryhłušana-aranžavy. Pa-druhoje, fasady vytrymanyja ŭ duchu suprematyzmu: hieamietryčnyja ŭzory, «skraznyja» kruhi i adsyłki da tvorčaści Kazimira Maleviča.
Škoła atrymałasia sapraŭdy vialikaj. Mała taho, što sam budynak zajmaje 25 000 «kvadrataŭ», dyk jašče i vakoł jaho pabudavanaja maštabnaja infrastruktura ŭ vyhladzie placovak dla ŭsich mahčymych hulniavych vidaŭ sportu: ad strytboła da vialikaha tenisa. Pakul usio heta zasypana śnieham, tak što acanić vyhody takoha dvara možna budzie tolki viasnoj.
Unutry siońnia ažyŭlena. Pieršyja vučni nadzieli formu, načapili zaplečniki, zaviazali koski, pryčasalisia i pryjšli asvojvać svoj druhi «dom» na najbližejšyja hady. Acanić umovy zaprasili pradstaŭnikoŭ haradskich uładaŭ.
Dyrektar ZTAA «Dana Astra» Piotar Piatroŭ uručyŭ simvaličny kluč dyrektaru škoły Alenie Karatčeni i skazaŭ paru pryvitalnych słoŭ.
Zatym hości razyšlisia pa kalidorach, a dzieci — pa vučebnych kłasach. Viestybiul davoli prastorny — 530 mietraŭ, i chutka trapić siudy možna budzie tolki praz turnikiety. Ścieny ŭ ahulnych zonach paŭsiudna pafarbavanyja ŭ kantrasnyja adcieńni.
U kabinietach pačatkovych kłasaŭ małyja ŭžo siadziać za partami, a na došcy źjavilisia pieršyja nadpisy. Kresły i stały tut stvoranyja jak adzinaja kanstrukcyja: nachilnyja stalnicy pieraškadžajuć horbicca, a vyšyniu siadzieńniaŭ možna rehulavać. Jašče jość šafki dla asabistych rečaŭ, a taksama rukamyjnica.
Jość śpiecyjalnyja kabiniety, pryznačanyja dla vyvučeńnia anhlijskaj movy. Praduhledžanyja pamiaškańni dla pracoŭnaha navučańnia. Chłopčyki buduć pracavać na stankach, vučycca pracavać z drevam i mietałam. Dla dziaŭčynak prydumanyja zaniatki šyćcia, vyšyŭki, hatavańnia ježy. Kabiniet infarmatyki łakaničny:
A heta pakoj adpačynku dla pieršakłaśnikaŭ. Tut budzie znachodzicca hrupa padoŭžanaha dnia: u čakańni baćkoŭ možna i pahulać, i pavučycca, i navat paspać
U kalidorach jość usio nieabchodnaje, kab rassłabicca padčas pierapynkaŭ. Dzieści na padłozie namalavanyja kłasiki, dzieści staić paŭnavartasny šachmatny kutok. Možna pahojdacca ŭ kresłach-miaškach abo pahulać u nastołki.
Stałoŭka prastornaja i śvietłaja, a pobač pracuje bufiet dla tych, chto choča dadatkova pierakusić. Bułački, piečyva, napoi — asartymient pakul nievialiki, ale vybrać jość z čaho. Dyrektarka Alena Karatčenia adznačaje:
«Našy dzieci siońnia ŭžo naviedali cudoŭnuju šykoŭnuju abiedziennuju zału, u jakoj raźmieščana 350 pasadačnych miescaŭ. Heta niamała. Błok charčavańnia abstalavany sučasnym technałahičnym abstalavańniem. I ja jak dyrektarka vielmi radaja, što tam jość dva kłasnyja varačnyja katły, niekalki elektryčnych plit. Heta dazvolić chutka i jakasna hatavać zdarovuju ježu dla dziaciej».
Raźminacca, zajmacca, naroščvać ciahlicy i hetak dalej dzieci buduć až u niekalkich załach: trenažornaj na 70 «kvadrataŭ», himnastyčnaj na 275 i vialikaj hulniavoj zale na 630 mietraŭ. Darečy, himnastyčnaja zała asablivaja — vokny ŭ joj braniavanyja. Heta samaje biaśpiečnaje miesca, u jakim školniki zmohuć schavacca ŭ vypadku nadzvyčajnaha zdareńnia.
«Dla zaniatkaŭ fizičnaj kulturaj i sportam u škole adkrytaja vializnaja spartyŭnaja zała z sučasnym padłohavym pakryćciom, vydatnaj trybunaj, — kaža dyrektarka. — U hetaj zale, my spadziajemsia, buduć prachodzić spabornictvy nie tolki siarod vučniaŭ našaj škoły, ale i inšych dziaciej z rajona i horada. Taksama ŭ škole jość abstalavanaja trenažornaja zała. Zakuplenaja vielizarnaja kolkaść łyžaŭ. Adkrytaja łyžnaja baza dla zaniatkaŭ zimovymi vidami sportu».
U aktavaj zale chłopčyki i dziaŭčynki buduć nie tolki źbiracca na školnyja mierapryjemstvy, ale i zajmacca tvorčaściu:
«Heta naša muzyčnaja aktavaja zała z sučasnaj interaktyŭnaj panellu. Ustanoŭlena hukavoje i śvietłavoje abstalavańnie, jakoje dazvolić dzieciam vystupać, repietavać, zajmacca muzykaj. Jość elektronnaje pijanina, hitary».
Basiejn raźmieščany ŭ prybudovie, jakaja złučanaja z asnoŭnym budynkam krytaj halerejaj. Majecca i asobny ŭvachod z vulicy dla ŭsich žycharoŭ «Minsk-Śvietu», jakija viečarami i na vychodnych zmohuć brać płatnyja sieansy.
Budynak basiejna samy prykmietny — jahony fasad upryhožany zašklonymi kruhami roznaha pamieru. Heta i pryhoža, i funkcyjanalna. Unutry — adrazu dva basiejny: paŭalimpijski pamieram 25×10 mietraŭ i mały pamieram 5×10 mietraŭ. Jany zapracujuć paźniej.
Budaŭnictva i abstalavańnie novabudoŭli całkam lažała na plačach kamiercyjnaha zabudoŭščyka «Dana Astra». Na ŭsio pajšło kala 70 miljonaŭ rubloŭ. Adznačajecca, što šmat čaho daviałosia pryvozić ź Jeŭropy praź miechanizmy abychodu sankcyj.
Novaja škoła raźličanaja na 1020 čałaviek. U hety momant tut vučacca tolki vučni małodšych kłasaŭ — ad 1 da 4. Nabor u inšyja kłasy budzie rabicca letam, a paŭnavartasna škoła zažyvie tolki ŭ vieraśni.
Usie dzieci na hety momant — vyklučna žychary «Minsk-Śvietu». Dalej nabor taksama budzie prachodzić u miežach hetaha mikrarajona.
«A ty słužyŭ?» Vital Karpanaŭ adsłužyŭ na Rastvo ŭ carkvie
U centry Minska znosiać haražy — unikalny pomnik davajennaha kanstruktyvizmu
U Minsku vyrašajuć pytańnie z pustkami ŭ Kamiennaj Horcy i Dambroŭcy — zamiest ich mohuć źjavicca parkoŭki
Marki z rabotami Rubiensa i chatnija muziei. Biełaruskija entuzijasty źbirajuć niezvyčajnyja kalekcyi
Kamientary