Aktyvist ź Biełastoka, jaki ciškom viarnuŭsia ŭ Biełaruś, byŭ u kiraŭnictvie «Narodnaj hramady»

Redaktar kolišniaj baranavickaj haziety «Šah» Anatol Vajciachoŭki, jaki ŭlapaŭsia ŭ skandał z prapahandysckim filmam «Čužoje nieba», a paśla śmierci svajho susieda-špijona Uładzimira Usiera viarnuŭsia ŭ Biełaruś, paŭhoda nazad byŭ abrany ŭ revizijnuju kamisiju partyi «Narodnaja hramada».

Pra heta paviedamiŭ były palitviazień Siarhiej Sparyš, jaki ŭdzielničaje ŭ baraćbie za lidarstva ŭ partyi.

Čytajcie: Biełastok na vušach praź źniknieńnie aktyvista Vajciachoŭskaha, susieda pamierłaha špijona Usiera. A toj ciškom viarnuŭsia ŭ Biełaruś

«Vierahodna, varta čakać novych prapahandysckich pieradač — karaciej, jak ź Ciškievič. Vajciachoŭski paŭhoda tamu byŭ uklučany ŭ revizijnuju kamisiju «Narodnaj hramady» Vilskaha. Prytym što pytańni da jaho ŭźnikali jašče niekalki hadoŭ tamu», — napisaŭ Sparyš.

Jon nie staŭ dzialicca dadatkovaj infarmacyjaj, adnak paraiŭ «Našaj Nivie» pisać staršyniu «Narodnaj hramady» Jaŭhienu Vilskamu. Zrešty, na hetym koła zamknułasia, bo Vilski, u svaju čarhu, paprasiŭ źviartacca pa kamientary da Sparyša.

Revizijnaja kamisija — kantrolny orhan «Narodnaj hramady». Kamisija źbirajecca minimum raz na hod, rychtuje spravazdaču dla źjezda partyi. Jaje siabry abirajucca hałasavańniem i, zhodna sa statutam, praviarajuć dziejnaść partyi.

Sparyš u svaim dopisie zhadvaje Volhu Ciškievič — jana niekali ŭznačalvała mahiloŭskaje adździaleńnie «Narodnaj hramady», u 2022 hodzie vyjechała ŭ emihracyju. Kali «Kibierpartyzany» ŭzłamali sajt KDB i apublikavali raźmieščanuju bazu danosaŭ, to znajšoŭsia i danos ad Ciškievič, jakaja prasiła «pryniać miery» ŭ adnosinach błohiera Eduarda Palčysa. U vyniku skandała Ciškievič ciškom viarnułasia ŭ Biełaruś i razdavała intervju prapahandystam.

Uśled pajechaŭ u Biełaruś i jašče adzin siabar «Narodnaj hramady», Pavieł Bialucin. Jon u svoj čas uciorsia ŭ davier da Mikoły Aŭtuchoviča — i napisaŭ na jaho danos u KDB.

Ciapier tym ža šlacham rušyŭ i Anatol Vajciachoŭski. Pierad hetym jon ulapaŭsia ŭ zdymki prapahandysckaha filma BT. Za 50 jeŭra Vajciachoŭski i jaho susied Uładzimir Usier zapisali videa, u jakim raskazali pra ŭsie minusy žyćcia ŭ zamiežžy.

Polskija śpiecsłužby abvinavacili Usiera ŭ špijanažy, adnak pa stanie zdaroŭja nie stali aryštoŭvać. Nieŭzabavie paśla hetaha jon pamior. Na nastupny dzień paśla śmierci byłoha susieda Vajciachoŭski, jaki nibyta padradziŭsia arhanizoŭvać pachavańnie, źnik.

Vajciachoŭski pryznavaŭsia siabram, što padumvaje źviartacca ŭ «kamisiju pa viartańni» hienieralnaha prakurora Andreja Švieda.

«Narodnaja hramada» pad kiraŭnictvam Jaŭhiena Vilskaha sprabuje vystavić siabie alternatyvaj Ofisu Śviatłany Cichanoŭskaj, raz za razam stvaraje adpaviednyja inicyjatyvy — błok «Salidarnaść», «Miemarandum», Biełaruskaja nacyjanalnaja kaalicyja.

Na vybarach u Kaardynacyjnuju radu ŭ 2024 hodzie błok «Salidarnaść», u jaki ŭvachodzili «Narodnaja hramada» i BCHD, zaniaŭ pieradapošniaje miesca — 1,55%. Apošniaje miesca było ŭ ich ža paplečnikaŭ z «Krainy dla žyćcia» palihrafołaha Vitala Saviuka.

• 1
• 2
• 2
• 17
• 0
• 1
• 4
• 0