Ukrainskaha biełaha tyhra evakujujuć ad vajny ŭ Vialikabrytaniju. Zaraz jon čakaje pieranosku adpaviednaha pamieru
Biełaha tyhra pa imieni Aleks vyviazuć z prytułku dla kinutych žyvioł pad Kijevam u Linkalnšyrski park dzikaj pryrody va ŭschodniaj Anhlii, raspaviali Bi‑bi‑si ŭ kiraŭnictvie hetaj ustanovy.
Aleksa znajšli kinutym letaś u Charkaŭskaj vobłaści. Zaraz jon žyvie ŭ «Centry vyratavańnia dzikich žyvioł» u Čubinskim Kijeŭskaj vobłaści.
Styŭ Nikałs, hienieralny dyrektar Linkalnšyrskaha parku dzikaj pryrody, raspavioŭ, što tyhr utrymlivajecca ŭ «bietonnaj skryncy z sałomaj na padłozie», ale heta maksimum taho, što mohuć zabiaśpiečyć vałanciory šełtara. «Biednyja ludzi ledźvie spraŭlajucca z tym, kab vada nie zamiarzała, — adznačyŭ jon. — My tak vostra pieražyvajem, što na hety bok pracesu my paŭpłyvać nie možam».
Pa słovach Nikałsa, jaho zaapark aformiŭ usie dakumienty na pieravozku žyvioły ŭ Złučanaje Karaleŭstva, i zaraz zastałosia dastavić śpiecyjalny kantejnier dla jaho transparciroŭki. «Zaraz my na toj stadyi, kali zastałosia tolki atrymać habaryty kantejniera, kab možna było padabrać mašynu i datu pieravozki», — rastłumačyŭ jon.
Z Ukrainy tyhra paviazuć praz Polšču i krainy Paŭnočnaj Jeŭropy ŭ anhlijski port Duŭr, a adtul — u Linkalnšyrski park dzikaj pryrody. «Ja b skazaŭ, što na praciahu troch tydniaŭ jon adpravicca ŭ šlach», — dadaŭ dyrektar.
Pavodle infarmacyi zaaparka, kali tyhra znajšli biez nahladu, jon byŭ źniasilenym, abiazvodžanym i zaražanym parazitami. U jaho vyjavili prablemy ź piečańniu, nyrkami i straŭnikava-kišačnym traktam.
Nikałs abiacaje, što ŭ Anhlii źvier zmoža «žyć u raskošy», a nie «pračynacca z abledzianiełym futram».
Pa prybyćci jamu arhanizujuć praces adaptacyi z troch stadyj. Spačatku tyhra pasielać u zakrytym pamiaškańni z prastoraj dla snu, dla hulniaŭ i dla karmleńnia. Paźniej pad kantrolem vieterynaraŭ jon zmoža pierabracca ŭ adkryty valjer, a zatym paznajomicca ź inšymi tyhrami parku.
Ciapier čytajuć
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić3737
Kamientary