Transpłantacyja brovaŭ — novy trend. Kaštuje niekalki tysiač dalaraŭ, ale zahvozdka nie tolki ŭ canie
Pamiatajecie modu 2000-ch, kali dziaŭčaty biaźlitasna vyščypvali brovy, pieratvarajučy ich u tonkija «nitački»? Siońnia ž mnohija žančyny hatovyja na darahuju transpłantacyju brovaŭ, kab viarnuć sabie naturalnuju huščyniu. Ale jość adzin pabočny efiekt.
Pra novuju praceduru, jakaja nabiraje papularnaść, piša The Wall Street Journal.
Pavodle źviestak śpiecyjalizavanych płatformaŭ u śfiery estetyčnaj miedycyny ZŠA, kolkaść zapytaŭ i prahladaŭ materyjałaŭ pra transpłantacyju brovaŭ z 2022 da 2024 hoda pavialičyłasia amal u dziesiać razoŭ. Rostu papularnaści spryjała i toje, što pra svaje apieracyi pačali adkryta raskazvać publičnyja asoby.
Pierasadka vykonvajecca mietadam falikularnaj ekstrakcyi, pry jakim asobnyja vałaski biarucca z patylicy pacyjenta i ŭkaraniajucca ŭ zonu brovaŭ.
Košt takoha ŭmiašańnia pad miascovaj aniestezijaj u ZŠA zvyčajna vahajecca ad 15 000 da 18 000 dalaraŭ, a kali patrabujecca paŭtornaja pracedura dla stvareńnia bolšaj ščylnaści, ahulnaja suma moža vyraści da 25 000 dalaraŭ.
U Turcyi apieracyja abychodzicca značna tańniej — kala 3 500 dalaraŭ.
Choć apieracyja ličycca amal biazbolnaj, jana supravadžajecca aciokami i siniakami, z-za jakich pacyjentki ŭ pieršyja dni paśla ŭmiašańnia vyhladajuć davoli niepryvabna.
Praces adnaŭleńnia patrabuje strohaj dyscypliny: na praciahu tydnia zabaroniena dakranacca da tvaru abo paŭnavartasna mycca. Dalej pačynajecca składany etap, kali da pałovy z 200—375 pierasadžanych falikułaŭ vypadajuć na praciahu šaści tydniaŭ. Novyja vałaski pačynajuć paŭnavartasna raści tolki praz try-čatyry miesiacy, i ŭ hety pieryjad žančynam davodzicca pa-raniejšamu karystacca kaśmietykaj.
Pośpiech pracedury składaje 70—90%, pryčym niekatoryja vałaski mohuć nie pryžycca praz staryja šnary abo stan zdaroŭja.
Daktary adznačajuć, što mnohija śpiecyjalisty pa pierasadcy vałasoŭ na hałavie pamyłkova miarkujuć, što mohuć hetak ža lohka spravicca i z brovami. Adnak hety vid transpłantacyi patrabuje značna bolšaha majsterstva ŭ pracy z formaj i kirunkam rostu.
Adnavić pryrodny vyhlad nadzvyčaj składana mienavita praz asablivaści rostu brovaŭ: vałaski kala pieranośsia nakiravany ŭvierch, a tyja, što ŭ centry, stvarajuć pierakryžavany malunak. Padčas transpłantacyi falikuły raźmiaščajuć tak, kab imitavać hetyja pryrodnyja linii i zabiaśpiečyć taki vuhał nachiłu, pry jakim vałaski buduć maksimalna ščylna prylahać da skury.
Akramia techničnych składanaściaŭ, isnujuć i pryrodnyja niuansy: naprykład, pracedura stanovicca bolš pracajomkaj, kali ŭ pacyjentki kučaravyja vałasy. A ludziam z siviznoj paśla apieracyi pryjdziecca pastajanna farbavać novyja brovy, kab jany nie vyłučalisia na tvary.
Hałoŭnaj asablivaściu, pra jakuju daktary papiaredžvajuć zahadzia, źjaŭlajecca pryroda pierasadžanaha materyjału. Vałasy z patylicy zachoŭvajuć svaje hienietyčnyja ŭłaścivaści: jany rastuć značna chutčej za naturalnyja brovy i mohuć dasiahać nieabmiežavanaj daŭžyni. Kali ich nie padrazać nažnicami kožny tydzień, jany tearetyčna zdolnyja vyraści «da samych piat».
Mienavita hetyja štotydniovyja stryžki časta stanovicca hałoŭnaj pryčynaj, pa jakoj patencyjnyja klijenty ŭ vyniku admaŭlajucca ad apieracyi. Tym nie mienš, tyja, chto advažyŭsia na transpłantacyju, hatovyja da takoha rehularnaha kłopatu dziela mahčymaści kožnuju ranicu pračynacca z hustymi i naturalnymi brovami.
«Jak pišuć u kamientarach, brežnieŭskija». Biełaruska, jakaja pierasadziła sabie brovy, pakazała, jak ciapier vyhladaje
Biełaruska admoviłasia ad bjuci-pracedur i vyrašyła hod nie nabyvać adzieńnie i abutak. Jana raskazała navošta
«Patraciŭ 2 tysiačy dalaraŭ — było viesieła». Biełarus raskazaŭ, jak rabiŭ transpłantacyju vałasoŭ u Turcyi
Luxvisage adkazaŭ na skarhi rasijanak, u jakich nibyta z-za biełaruskaha hiela masava vypadajuć brovy
Ciapier čytajuć
Prapahanda rychtuje hramadstva da zahadkavaj «praciahłaj kamandziroŭki» Łukašenki31
Kamientary