Vučonyja znajšli sposab nazaŭsiody pazbavicca ad marščyn i sivizny

Z uzrostam skura i vałasy pieražyvajuć značnyja źmieny: źjaŭlajucca marščyny, vałasy hublajuć pihmient i stanoviacca sivymi. Hetyja pracesy źviazanyja z razbureńniem złučalnaj tkanki, źnižeńniem aktyŭnaści stvałavych kletak i pamianšeńniem vypracoŭki miełaninu. Źniešnija faktary, takija jak ultrafijaletavaje vypramieńvańnie, taksama paskarajuć stareńnie, paškodžvajučy kletki skury.

Jak piša BBC, novaje daśledavańnie pakazała, što peŭnyja harmony mohuć zapavolić ci navat praduchilić hetyja źmieny. Vučonyja vyvučyli ŭpłyŭ naturalnych harmonaŭ na pracesy stareńnia i vyśvietlili, što niekatoryja ź ich vałodajuć ułaścivaściami amałodžvańnia. Ich vykarystańnie moža dapamahčy zachavać skuru pruhkaj, a vałasy — pihmientavanymi.

Daśledavańnie praviała hrupa navukoŭcaŭ z Univiersiteta Miunstera ŭ Hiermanii pad kiraŭnictvam prafiesara Markusa Bioma. Vyniki pracy apublikavanyja ŭ navukovym časopisie Endocrine Reviews. Asnoŭnaj zadačaj daśledavańnia było vyśvietlić, jakija harmony mohuć zapavolić stareńnie skury i jak mienavita jany ŭździejničajuć na kletki.

«Skura — heta nie tolki mišeń dla roznych harmonaŭ, jakija kantralujuć praces jaje stareńnia, ale i adna z najbujniejšych krynic vypracoŭki harmonaŭ u arhaniźmie, aproč kłasičnych endakrynnych załoz, takich jak hipofiz. Naprykład, vałasianyja falikuły źjaŭlajucca svojeasablivymi mini-endakrynnymi orhanami, jakija ŭdzielničajuć u rehulacyi roznych pracesaŭ», — adznačaje prafiesar Biom.

U chodzie daśledavańnia navukoŭcy zasiarodzilisia na niekalkich klučavych harmonach, u tym liku estrahienach, harmonie rostu i miełataninie. Apošni akazaŭsia asabliva važnym: akramia rehulacyi snu, jon taksama abaraniaje kletki skury ad paškodžańniaŭ dziakujučy svaim antyaksidantnym ułaścivaściam. Heta moža značna zapavolić pracesy stareńnia.

Akramia taho, navukoŭcy vyjavili, što miełanacytstymulujučy harmon, jaki ŭpłyvaje na pihmientacyju skury, i aksitacyn spryjajuć zachavańniu maładości skury i vałasoŭ, praduchilajučy ich paškodžańnie ŭltrafijaletam.

Vučonyja spadziajucca, što ich adkryćci pryviaduć da raspracoŭki novych amaładžalnych preparataŭ — sienaterapieŭtykaŭ, jakija buduć uździejničać na starejučyja kletki, pieraškadžajučy ich nazapašvańniu ŭ arhaniźmie. U pierśpiektyvie takija mietady mohuć być karysnyja nie tolki ŭ kaśmietałohii, ale i ŭ ahulnym zapavoleńni ŭzrostavych źmianieńniaŭ u arhaniźmie.

• 25
• 0
• 1
• 1
• 0
• 0
• 0
• 2