Jak nie pieratvaryć dyskusiju ŭ bulbasrač? I ci narmalna banić ludziej u sacsietkach?

Vykładčyk kursa «Majsterstva znosin» u adukacyjnym chabie «Nacyja lidaraŭ» Alaksandr adkazvaje na hetyja pytańni.

Zapisacca na biaspłatny anłajn-kurs «Majsterstva znosin» možna pa hetaj spasyłcy. Kurs pačniecca ŭžo 2 sakavika, tamu nie adkładvajcie. Zaniatki raźličanyja na dva miesiacy.

— Jak zrazumieć, što dyskusija pieratvarajecca ŭ bulbasrač?

— Treba źviartać uvahu na «čyrvonyja ściažki». Naprykład, vy ŭ abmierkavańni pakinuli svoj kamientar — i na vas u hety ž momant nakinulisia. Spyniciesia ŭ niejki momant i spakojna pieračytajcie dyjałoh. Naprykład, pačynałasia razmova z abmierkavańnia hatunku bulby, a skončyłasia sprečkaj pra palityčnuju situacyju ŭ Biełarusi.

Budzie dobra, kali vy budziecie sačyć za tym, kab vas nie vyvodzili za miežy kankretnaj temy. Jak tolki surazmoŭca pierasiakaje miežy, — heta značyć, vami ŭžo pačali manipulavać, naviazvać svaju hulniu. U takich vypadkach lepš spynicca i panazirać zboku za tym, što adbyvajecca.

— A jak trymać hetyja miežy?

— Dobra, kali ŭ dyskusii jość maderatar, jaki sočyć za ŭdzielnikami i pry patrebie nahadvaje praviły. Ale ŭ sacsietkach, kaniešnie, zvyčajna sprečku nichto nie kantraluje. Jość dva cikavyja momanty. Pa-pieršaje, kali vy chočacie vykazacca, vy majecie na heta prava. Ale ŭ toj ža čas vy pavinny razumieć, što za luboje mierkavańnie moža «prylacieć».

Dobra, kali vy adrazu abaznačajecie praviły dyskusii. Naprykład: «Ja chaču vykazać svajo mierkavańnie pa hetym pytańni. Razumieju, što inšyja mierkavańni taksama majuć prava na isnavańnie. Mianie cikaviać vašy dumki, ale nie abrazy i nie zanadta emacyjnyja vykazvańni — jany ŭniasuć tolki błytaninu ŭ ahulnuju razmovu». Heta dapamoža vam adrazu zadać napramak abmierkavańniu.

Potym, kali niechta pačnie pisać nieprymalnyja dla vas rečy, vy zaŭsiody zmožacie spasłacca na toje, što raniej užo prasili hetaha nie rabić.

— Čamu tak atrymoŭvajecca ŭ biełarusaŭ, što navat biaskryŭdnyja abmierkavańni — umoŭna «Jak mnie nie chapaje syrkoŭ» — chutka pierachodziać u bulbasrač?

— Davajcie ŭjavim typovuju situacyju: pryjšoŭ kiraŭnik na pracu zły. I na jaho ŭsie hladziać i taksama pačynajuć złavacca. Ale zamiest hetaha lepš padumać: dyk a što ź im adbyłosia, što tak na jaho paŭpłyvała?

Kali my razumiejem ci chacia b sprabujem zrazumieć, čamu čałaviek napisaŭ toje, što napisaŭ, časta my źmianiajem staŭleńnie da kamientara. Tamu kali vy bačycie, što čałaviek sprabuje raźvieści bulbasrač, padumajcie pra toje, čaho jon choča dasiahnuć. Moža, jon choča ŭvahi? Moža, sacsietki — adzinaje miesca, dzie jon moža vykazacca, a bolš jamu niama z kim pahavaryć?

Ja zaŭsiody sprabuju skłaści partret čałavieka i zrazumieć, što im kiruje. Dziela čaho jon robić toje, što robić? Moža, dziela pavyšeńnia samaacenki? Umoŭna, lažyć jon na kanapie i pačynaje siabie adčuvać hienierałam «kanapavych vojskaŭ». U realnym žyćci jamu čahości nie chapaje, tamu ŭ fejsbučnaj sprečcy jon choča adčuć siabie hałoŭnym. 

Pavialičyć

Kali vy adčuvajecie, što čałaviek nastojliva vas praciskaje, adkažycie: «Kali łaska, rastłumač, čym tvaja pazicyja adroźnivajecca ad majoj? Davaj ich paraŭnajem».

I voś kali vy robicie adsyłku da svaich niejkich pazicyj, vy viartajecie čałavieka da kanstruktyŭnaha dyjałohu. Dziakujučy paraŭnalnamu analizu jość šaniec nie syści ŭ emocyi.

Vyśvietlicie, jakija jość plusy i minusy ŭ pieršaj i druhoj pazicyj. Heta dazvolić vam hulać na svajoj terytoryi. Tady čałaviek vas nie pieraciahnie, bo vy budziecie znoŭ i znoŭ viartacca da pieršapačatkovych tezisaŭ.

— Jak adroźnić arhumient ad manipulacyi?

— Časam heta tolki naprykancy razmovy možna zrazumieć. Ale, napeŭna, hałoŭny «čyrvony ściah» — kali čałaviek tabie biezapielacyjna niešta zajaŭlaje. Vy možacie tut ža zadać pytańnie «Čamu ty tak śćviardžaješ? Na čym hruntujecca tvaja dumka?». Kali čałaviek adkazvaje aksijomami, heta dla vas pavinna być sihnałam.

— Ale ž možna sapraŭdy ŭ niejki momant zrazumieć, što surazmoŭca maje racyju, a ty ŭ čymści pamylaŭsia.

— A heta važny momant, kali nieabchodna pahavaryć ab pryznańni pamyłak i ŭdziačnaści. Navat kali vy paśpieli pasvarycca z čałaviekam, heta dobra pracuje. Patelefanujcie i raspaviadzicie, što adčuvali. Naprykład: «Mnie dva dni było drenna. Pa-pieršaje, ja nie lublu svarycca. Pa-druhoje, mnie było vielmi baluča, što ja pasvaryŭsia z takim cudoŭnym čałaviekam. Nu i pa-treciaje, ja vielmi ŭdziačny, što ty dapamoh mnie razabracca ŭ hetym pytańni. Ja ŭsio ž pahadžusia z taboj».

Nasamreč, bolšaści ludziej składana pryznać svaje pamyłki. Jany buduć stajać na svajoj pazicyi da apošniaha, navat užo paśla taho, jak zrazumieli, što jana pamyłkovaja: samalubstva pieraškadžaje.

Tamu pavažajuć ludziej, jakija mohuć pryznać svaje pamyłki. Nie pabłažliva «Nu ładna, ty pieramoh», a praz udziačnaść — «Dziakuj, što dapamoh mnie razabracca».

— Nakolki dapuščalna banić apanientaŭ u sacyjalnych sietkach? Hety cenzura ci hihijena kamunikacyi?

— Mnie zdajecca, usio zaležyć ad apanienta. Kali čałaviek piša štości vielmi niepryjemnaje, kaniešnie, praściej za ŭsio vam budzie zabanić jaho. Ale pry žadańni jon zaviadzie novy akaŭnt i vierniecca da vas.

U dyzajnieraŭ jość taki pryjom — pieratvaryć defiekt u efiekt. Čałavieka, jaki vam zdajecca destruktyŭnym majatnikam, možna časam vykarystoŭvać jak sajuźnika ci jak krytyčny hołas.

To-bok vy publikujecie niešta i trymajecie ŭ hałavie, što hety čałaviek pačnie adrazu krytykavać. Vy možacie adrazu zhulać na apiaredžańnie i napisać: «Chaciełasia b pačuć kanstruktyŭnaje mierkavańnie voś hetaha čałavieka».

Chutčej za ŭsio, čałaviek toj znoŭ raskrytykuje vas, ale nie tak ahresiŭna, jak zvyčajna. I paśla hetaha napišycie jamu słovy padziaki: «Dziakuj za takija cikavyja dumki».

Nu i pasprabujcie ŭsprymać jaho nie jak voraha, a jak krytyčny hołas. Časam dastatkova źmianić nazvu dla źjavy, kab źmianić staŭleńnie da jaje.

Treba zaścierahacca pieršaha žadańnia adrazu zabanić. Bo mozh zaŭsiody padkidvaje samaje prostyja varyjanty rašeńnia — zvykłyja dy kamfortnyja dla nas. Ale heta nie značyć, što jany zaŭsiody pravilnyja.

Darečy, navat u chejtarskich kamientarach možna znajści pazityŭ — dziakujučy im vaš dopis budzie prasoŭvacca ŭ sacsietkach, źbiare bolš prahladaŭ.

Ale kali dla čałavieka heta norma, to naŭrad ci jamu niešta dapamoža. Zabańcie i zabudźciesia.

— Darečy, navat na abjektyŭnuju krytyku daloka nie kožny ŭmieje spakojna reahavać.

— Bo heta narmalnaja reakcyja našaha mozha — lubaja krytyka ŭsprymajecca jak patencyjalnaja pahroza. Jana pahražaje našaj biaśpiecy, našamu ŭłasnamu śvietu. I my ŭ pieršuju čarhu ŭsprymajem krytyku jak napad na pryvatnaje.

Zadavajcie ŭdakładniajučyja pytańni: «Što mienavita tabie nie padabajecca? Jak možna było zrabić lepš?». Lubaja krytyka pavinna mieć vysnovu — a nie prosta abrazili adno adnaho i raźbiehlisia pakryŭdžanyja.

Asensavańnie pamyłak dapamahaje nam vučycca.

Technika, jakaja dobra dapamahaje ŭ kanfliktnych situacyjach, — treba kazać mienavita pra svaje adčuvańni. Nie «ty mianie razdražniaješ», a «kali ty voś tak robiš, mnie vielmi niepryjemna».

Kali vy adčuvajecie, što vas zachłynajuć emocyi, šukajcie varyjant, jak zaziamlicca — naprykład, umyjciesia. Ci vyjdzicie na vulicu padychać śviežym pavietram, dajcie ciełu rassłabicca.

Padčas sprečak u internecie pracuje toje samaje. Zachlistvajuć emocyi — nie adkazvajcie adrazu. Viartajciesia da razmovy tady, kali supakoiciesia.

16 lutaha pačaŭsia zapis na biaspłatny anłajn-kurs «Majsterstva znosin» ad «Nacyi lidaraŭ». Na kursie vy zasvoicie navyk asensavanaha dyjałohu, dzie kožnaje słova buduje masty, a nie mury. Navučyciesia nie tolki słuchać, ale i čuć surazmoŭcu za šumam ułasnych dumak i havaryć tak, kab ludzi razumieli vas pravilna i prysłuchoŭvalisia da vašych słoŭ.

Zaniatki pačnucca 2 sakavika. Raźličany kurs na dva miesiacy.

Pavialičyć

• 1
• 2
• 0
• 1
• 0
• 0
• 0
• 0