Ukrainiec z-pad Łuhanska: Adzinaje, što možna rabić na akupavanaj terytoryi, heta źbirać i pieradavać infarmacyju
Chłopiec, jaki doŭhi čas byŭ infarmataram ukrainskaj armii, ciapier słužyć u joj. Jon raskazaŭ pra svoj dośvied i dzielicca dumkami, jakija mohuć być kaštoŭnymi i biełarusam, jakija taksama žyvuć faktyčna pad akupacyjaj. Jaho dumka adnaznačnaja: pry ciapierašnim uzroŭni videanazirańnia nijakija arhanizavanyja padpolnyja hrupy dziejničać nie mohuć. I jon nazyvaje niešmatlikija mahčymyja sposaby supracivu.
Dośvied Arcioma Karakina ŭnikalny: jon bolš za siem hadoŭ pražyŭ va ŭmovach rasijskaj akupacyi na Łuhanščynie, tajemna dapamahajučy Uzbrojenym siłam Ukrainy, až da zimy 2021 hoda. Siońnia Arciom — sałdat, jaki braŭ udzieł u tym liku ŭ apieracyi USU ŭ Kurskaj vobłasci. U intervju Kyiv Independent Arciom Karakin padzialiŭsia nazirańniami, jak transfarmavałasia rasijskaja represiŭnaja mašyna paśla 2022 hoda i jak moža vyhladać supraciŭ va ŭmovach tatalnaha videanazirańnia i pravierki smartfonaŭ.
Pavodle słoŭ Arcioma, paśla pačatku poŭnamaštabnaha ŭvarvańnia situacyja na akupavanych terytoryjach kardynalna źmianiłasia.
«Hałoŭnaja prablema ŭ tym, što rasijanie pačali poŭnuju zamienu ŭsich pravaachoŭnych orhanaŭ na akupavanych terytoryjach, zamianiajučy miascovych kałabarantaŭ kvalifikavanymi supracoŭnikami z Rasijskaj Fiederacyi», — tłumačyć Arciom. Pa jaho słovach, rasijskija ŭłady pavialičyli štat śpiecsłužbaŭ, bo ŭśviadomili, nakolki šmat tam zastajecca praŭkrainskich ludziej.
«Bačačy, jak ich terytoryi traplajuć pad udary, i ŭśviedamlajučy, što niechta ŭvieś čas pieradaje raźviedvalnyja danyja ŭ režymie realnaha času, jany ŭzmacnili kantrol nad usim nasielnictvam», — praciahvaje mužčyna i tłumačyć, što ciapier dla mnohich haradoŭ i viosak normaj stali tak zvanyja «filtracyjnyja mierapryjemstvy»: raz u try miesiacy nasieleny punkt całkam akružajuć dla pravierak.
Asablivy cisk adčuvaje moładź. Supracoŭniki Śledčaha kamiteta i FSB rehularna prychodziać u navučalnyja ŭstanovy sa śpiecyjalnym prahramnym zabieśpiačeńniem, kab praviarać mabilnyja pryłady na najaŭnaść «ekstremisckich materyjałaŭ» ci suviaziaŭ z ukrainskimi siłami.
Asobna Karakin spyniajecca na dziejnaści publičnych ruchaŭ supracivu, takich, jak «Žoŭtaja stužka», jakija zaklikajuć žycharoŭ akupavanych terytoryj rabić patryjatyčnyja foty. Na jaho dumku, u sučasnych realijach heta nie prosta ryzykoŭna, a nieracyjanalna.
«Bieź źmieny taktyki takija dziejańni prynosiać tolki śmierć abo aryšt apošnim ukraincam, jakija tam zastajucca», — kaža jon.
Pryčyna kryjecca ŭ technałohijach.
Siońnia vyličyć čałavieka pa adnoj fatahrafii — sprava ličanych hadzin. Smartfon pakidaje ličbavyja ślady, sim-karty adsočvajucca, a šmatlikija kamiery videanazirańnia dazvalajuć prasačyć šlach luboha čałavieka.
«Luby śpiecyjalist pa zbory raźviedvalnaj infarmacyi z adkrytych krynic (…) moža vyznačyć čas zdymki, miesca, a kamiery adsočać, chto heta zrabiŭ. Ja bačyŭ fota, zroblenaje sa šlemam i ŭkrainskim ściaham u centry Daniecka. Jak vy dumajecie, ci šmat ludziej źviarnuli ŭvahu na čałavieka, jaki nios šlem i fatahrafavaŭsia ŭ centry Daniecka z ukrainskim ściaham? Nie kažučy ŭžo pra toje, što kožny krok kantralujecca kamierami videanazirańnia. Jak tolki vychodzić śviežaja porcyja takich fota, kožny pavinien razumieć, kožny srodak masavaj infarmacyi, jaki heta aśviatlaje, pavinien razumieć, što hetyja ludzi na fota ŭžo ŭ turmie abo buduć nieŭzabavie aryštavanyja. Abo zabityja», — papiaredžvaje Arciom.
Jak dapamahčy rodnaj krainie i zastacca žyvym?
Dla tych, chto maryć pra skaardynavany ruch supracivu, u Arcioma jość niepryjemnaja praŭda: u sučasnych umovach heta niemahčyma. Rasijskija śpiecsłužby pracujuć takim čynam, što lubyja kaardynavanyja hrupy ci supołki aktyvistaŭ vykryvajucca davoli chutka.
«Kali niechta kaža, što isnuje niejki kaardynavany ruch supracivu, to jaho nie isnuje. I vy nie možacie hetaha rabić, bo heta padstaŭlaje ludziej pad ryzyku. Vy nie možacie abjadnoŭvać ich u hrupy. Usio, što tam realna isnuje — heta adzinočki, jakija dziejničajuć samastojna, pieradajuć infarmacyju i ździajśniajuć dyviersijnyja akcyi. Ale heta ŭsio ludzi, jakija iduć na śviadomaje samaachviaravańnie. Jany nie ŭstupajuć ni ŭ jakija arhanizacyi, časta jany nidzie nie zafiksavanyja. Heta prosta ludzi, jakija vybirajuć samaachviaravańnie dziela Ukrainy».
Na pytańnie ab tym, što rabić ukraincam-patryjotam na akupavanych terytoryjach, Arciom daje paradu:
«Prosta zastavajciesia žyvymi, zachoŭvajcie svajo žyćcio, i tady vy sustreniecie nas z ukrainskim ściaham. Heta budzie najlepšaja dapamoha, jakuju vy možacie dać».
Kali ž čałaviek hatovy da ryzyki, to, jak davodzić Arciom,
«najlepšaja forma lubych partyzanskich dziejańniaŭ — heta pieradača infarmacyi. Nie bolš za toje».
Jon vystupaje suprać dyviersij, takich jak padpały vajenkamataŭ ci padryvy mašyn akupacyjnaj armii, bo heta adnarazovyja akcyi, paśla jakich čałaviek albo pavinien imhnienna pakinuć terytoryju — a heta amal niemahčyma, bo vyjezd za miažu zajmaje čas, albo budzie zatrymany.
Ciapier čytajuć
«Fieminizm u maim vypadku pieramoh». Vieranika Stankievič — pra dapamohu palitviaźniam u «Volnych» i płany na viasielle ź Ivulinym24
«Fieminizm u maim vypadku pieramoh». Vieranika Stankievič — pra dapamohu palitviaźniam u «Volnych» i płany na viasielle ź Ivulinym
Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»2222
Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»22
«Pra ciažarnaść viedali tolki jana i jaje chłopiec». Stali viadomyja padrabiaznaści historyi ź miortvym niemaŭlom, znojdzienym u Baranavičach u pakiecie
Kamientary
Russkij mir na druhoje nie sposobien, eto - jeho modiel raźvitija.
Takoj žie łahieŕ postrojen i v Biełarusi, - filtracija, rieprieśsii, tiuŕmy, pytki, ubijstva.