Źjaviŭsia novy rejtynh biełaruskich haradoŭ — voś jak vyhladaje top-20

U novym rejtynhu biełaruskija harady ranžyravany ŭ piaci vymiareńniach: demahrafičnaja ŭstojlivaść, stan ekanomiki, jakaść žyćcia, miascovyja ŭłady i turystyčnaja pryvabnaść.

U adroźnieńnie ad papiarednich daśledavańniaŭ, pry składańni rejtynhu 2026 hoda daśledčyki nadali roznym pakazčykam svaju vahu. Tak, stan ekanomiki i jakaść žyćcia dadavali pa 30% vynikovaha bała, demahrafičnaja ŭstojlivaść — 20%, a miascovyja ŭłady i turystyčnaja pryvabnaść — pa 10%.

Pa słovach aŭtaraŭ Jaŭhiena Mierkisa i Antona Radniankova, bolšy pryjarytet ekanamičnym umovam i paŭsiadzionnaj jakaści žyćcia dali, bo mienavita jany najbolš upłyvajuć na rašeńnie čałavieka, dzie žyć.

Akramia taho, upieršyniu byli ŭviedzieny bonusnyja bały za pamier horada. Žyćcio ŭ bujnym nasielenym punkcie dadaje mahčymaściaŭ — bolš pracadaŭcaŭ, pasłuh, infrastruktury, jakija nie zaŭsiody ŭłoŭlivajucca statystykaj. Tamu abłasnyja harady (zvyš 300 tysiač žycharoŭ) atrymlivali +10 bałaŭ, vialikija harady (100—300 tysiač) — +6, siarednija (50—100 tysiač) — +3, a małyja — biez bonusu.

Ad niekatorych kryteraŭ pry pracy nad rejtynham daviałosia admovicca (naprykład, źviestki pra naturalny pryrost bolš nie publikujucca). U toj ža čas byli dadadzienyja novyja paramietry kamfortnaści pražyvańnia ŭ haradach, a taksama praanalizavanaja kolkaść žančyn u miascovych orhanach ułady i prysutnaść vykankamaŭ u sacsietkach.

Praŭda, jak adznačajuć składalniki rejtynhu, pa peŭnych asabliva adčuvalnych aśpiektach žyćcia ŭ haradach — stanie ekałohii, kulturnickim i ŭnutrysacyjalnym žyćci — im tak i nie ŭdałosia znajści hodnaha sposabu acenki.

U razumieńni daśledčykaŭ «najlepšy horad» — heta miesca z adnosna stabilnym i adnačasova žyvym raźvićciom, dzie praściej budavać budučyniu: vučycca, pracavać, hadavać dziaciej.

Da važnych čyńnikaŭ adniesienyja: dastupnaść miedycynskich i sacyjalnych pasłuh, mahčymaść atrymlivać hodny dachod, a taksama prazrystaść miascovaj ułady i chacia b minimalny ŭpłyŭ na jaje rašeńni.

Takim čynam, u ahulnym rejtynhu na pieršym miescy apynułasia stalica. U trojku lidaraŭ uvajšli Brest i Hrodna. A voś čaćviortaje miesca, jak ni dziŭna, zaniaŭ horad-spadarožnik Minska — Smalavičy. U dziasiatcy, akramia abłasnych centraŭ, taksama Mazyr (7‑ie miesca), Salihorsk (9-je) i Kobryn (10-je).

Pavialičyć

Voś jak vyhladaje top-20 haradoŭ u rejtynhu:

1. Minsk
2. Brest
3. Hrodna
4. Smalavičy
5. Viciebsk
6. Mahiloŭ
7. Mazyr
8. Homiel
9. Salihorsk
10. Kobryn
11. Lida
12. Dziaržynsk
13. Pružany
14. Pinsk
15. Słuck
16. Rečyca
17. Kalinkavičy
18. Łuniniec
19. Ivacevičy
20. Połack

Pa turystyčnaj pryvabnaści pieršyja piać pazicyj zaniali Połack, Minsk, Brest, Hrodna i Viciebsk. U dziasiatku ŭvajšli taksama Mahiloŭ, Pinsk, Navahrudak, Pružany, Orša.

Pavialičyć

Kali paraŭnoŭvać harady pa stanie ekanomiki, to ŭ lidarach Smalavičy, Dziaržynsk, Minsk, Salihorsk, Marjina Horka.

Pavialičyć

Akramia rejtynhu, aŭtary vyznačyli asnoŭnyja trendy ŭ raźvićci biełaruskich haradoŭ.

Piać trendaŭ raźvićcia biełaruskich haradoŭ

1. Zachad macnieje, uschod słabieje

Padzieł pamiž zachodnimi i ŭschodnimi haradami praciahvaje pahłyblacca. Hrodna abahnała Mahiloŭ pa nasielnictvie i vyjšła na treciaje miesca ŭ krainie. Brest — №2 u rejtynhu, u toj čas jak Homiel — druhi horad pa vieličyni — apuściŭsia na vośmuju pazicyju. Na pohlad aŭtaraŭ, zachodnija abłasnyja centry ŭmacoŭvajuć svaje pazicyi za košt turyzmu, bolš žyvoj demahrafii i blizkaści da miažy ź Jeŭrapiejskim sajuzam. Na ŭschodzie ž nazapašvajucca prablemy: adtok nasielnictva, słabaja ekanomika, zaležnaść ad adnoj haliny.

2. Harady puściejuć i starejuć

Rost nasielnictva pakazali tolki 4 harady z 40: Minsk, Hrodna, Brest i Smalavičy. Usie astatnija hublajuć žycharoŭ, u šerahu vypadkaŭ — na 2—3% ciaham čatyroch hadoŭ. Adnačasova harady chutka starejuć: moładź źjazdžaje ŭ bujnyja centry, i ŭ 15 haradach dola pažyłych ludziej vyrasła bolš čym na 5 pracentnych punktaŭ. Vyklučeńnie — Smalavičy, dzie siaredni ŭzrost žycharoŭ źnižajecca dziakujučy prytoku maładych siemjaŭ.

3. Pramysłovyja harady raskałolisia

Mazyr i Salihorsk zachoŭvajuć mocnyja pazicyi ŭ pieršaj dziasiatcy. Adnak Navapołack, Śvietłahorsk i Babrujsk, jakija taksama trymalisia na pramysłovaści, pajšli ŭniz — pa ich udaryli sankcyi, zvužeńnie rynkaŭ i adsutnaść dyviersifikacyi. Zaležnaść ad adnaho pradpryjemstva ci adnoj haliny, što raniej pracavała ŭ plus, ciapier pieratvaryłasia ŭ ryzyku.

4. Blizkaść da Minska bolš nie harantuje rostu

Dziaržynsk pakul trymajecca na 12-m radku dziakujučy mocnaj ekanomicy, ale Maładziečna, Barysaŭ i Žodzina — harady, jakija jašče niadaŭna ličylisia «dynamičnymi spadarožnikami» stalicy — apuścilisia ŭ nižniuju pałovu rejtynhu. Adziny sapraŭdny bienieficyjar minskaj ahłamieracyi — Smalavičy z rostam nasielnictva +15%, ale i tut infrastruktura nie paśpiavaje za rostam.

5. Miascovyja ŭłady — nieraŭnamierna bačnyja

Miascovyja ŭłady prajaŭlajuć roznuju aktyŭnaść u sacyjalnych sietkach. Taksama nazirajecca vialikaja roźnica ŭ doli prysutnaści žančyn u składzie miascovych savietaŭ — ad 18% da 63% bieź jakoj-niebudź karelacyi z pamieram horada abo rehijonam.

• 3
• 2
• 1
• 3
• 1
• 1
• 0
• 0