«Kavałačak palca zastaŭsia ŭ rukavicy». Historyja minčanki, jakuju ŭ skviery ŭkusiŭ čužy sabaka
U lutym u staličnym skviery Kotaŭka Irynu ŭkusiŭ sabaka. «Ja adčuła rezki bol, vyciahnuła ruku z rukavicy i ŭbačyła, što častki palca niama — jana zastałasia ŭnutry», — uspaminaje žančyna. Spačatku Iryna nie chacieła zajaŭlać na ŭładalnika sabaki, spadziejučysia vyrašyć kanflikt mirna. Adnak nastupstvy akazalisia ciažkimi: daktary nie zmahli pryšyć fałanhu, a paźniej praź niekroz tkanak pryjšłosia vydalić jašče častku palca i sfarmiravać kuksu. Pavodle słoŭ paciarpiełaj, uvieś hety čas haspadar žyvioły nie śpiašaŭsia prasić prabačeńnia i nieachvotna išoŭ na kantakt, tamu joj pryjšłosia źviarnucca ŭ milicyju. U vyniku sud abmiežavaŭsia minimalnym štrafam za parušeńnie pravił vyhułu. Vydańnie «Anłajnier» raskazała padrabiaznaści hetaj historyi, a taksama razam z ekśpiertam padzialiłasia ałharytmam dziejańniaŭ, jaki dapamoža nie razhubicca ŭ padobnaj situacyi.
«Kavałačak palca zastaŭsia ŭ rukavicy»
Niekalki hadoŭ tamu Iryna aŭdavieła. Praź niekatory čas u jaje žyćci zusim vypadkova źjaviŭsia łahodny sabaka Ajka. Jon dapamoh zapoŭnić ščymlivuju pustatu, jakaja ŭźnikła ŭ jaje dušy paśla sychodu blizkaha čałavieka.
«Niejak zimoj my z dačkoj pajechali na lecišča, a tam niechta vykinuŭ sabaku z šaściu ščaniukami. My ich padabrali, z časam usich prystroili, navat ich mamu. Ale praz paŭhoda adzin z novych uładalnikaŭ patelefanavaŭ: maŭlaŭ, razvodžusia z žonkaj, zabirajcie sabaku nazad, abo addamo na Hurskaha», — raskazvaje Iryna.
Padrosły ščaniuk ź miłym apuščanym vucham nahadvaŭ niazhrabnaje miedźviedziania. Iryna pahadziłasia patrymać jaho ŭ siabie, pakul nie znojdziecca novaja siamja. Sabaku zabirali i viartali čatyry razy — pa samych roznych pryčynach.
«Kali Ajku viarnuli čaćviorty raz, ja pakinuła jaho ŭ siabie. Vyrašyła, što raz tak, značyć, heta moj sabaka», — kaža Iryna.
Sabaka chutka asvoiŭsia. Iryna časta vyhulvała jaho ŭ skviery Kotaŭka, raźmieščanym niepadalok ad jaje doma. Za hady hety skvier staŭ ulubionym miescam sabačnikaŭ, tut skłałasia svajo pastajannaje koła stasunkaŭ. Uvohule, usie adzin adnaho dobra viedali.
U toj dzień, 3 lutaha, kala adzinaccataj hadziny ranicy Iryna z Ajkam užo viartalisia dadomu.
«Pa darozie my sustreli Siarhieja (imia źmieniena. — Zaŭv. «Anłajniera»). Ja spyniłasia pavitacca, spytała, jak spravy. Siarhiej pažaliŭsia, što jahony sabaka drenna jeść doma, i tut ža nasypaŭ korm prosta na łavačku».
Dalej, pavodle słoŭ Iryny, usio adbyłosia za doli siekundy: jaje Ajka instynktyŭna tuzanuŭsia da łaŭki, a sabaka Siarhieja kinuŭsia napierarez, vidać, abaraniajučy ježu. Iryna, pavodle jaje słoŭ, imhnienna zabrała svajho hadavanca.
«Ja kryknuła jamu «Fu!», spadziejučysia, što Siarhiej taksama zabiare svajho sabaku. Zrabiła ŭsiaho paru krokaŭ napierad, i tut jahony sabaka znoŭ kinuŭsia ŭ naš bok i ŭčapiŭsia mnie ŭ ruku. Ja adčuła rezki bol, dastała ruku z rukavicy i ŭbačyła, što častka palca ŭ mianie zastałasia ŭsiaredzinie».
Chutkuju dapamohu Irynie vyklikała žančyna, jakaja ŭ momant incydentu stajała pobač ź joj. Paciarpiełuju dastavili ŭ 2‑iu haradskuju balnicu.
«U pryjomnym pakoi adrazu spytali: «Budziem zajaŭlać u milicyju?» Ja admoviłasia. Na toj momant heta zdavałasia čymści niedarečnym: my ź Siarhiejem bolš za piać hadoŭ pierasiakalisia ŭ hetym skviery, nikoli nie kanfliktavali. Dy i dumki byli zaniatyja inšym: treba było ratavać palec».
Iryna spadziavałasia, što fałanhu možna pryšyć. Ale miedyki, kaža jana, byli niepachisnyja: skazali, što paśla ŭkusaŭ žyvioł vysokaja ryzyka infiekcyi i niekrozu tkanak. Joj spynili kryvaciok, zašyli sasudy i na nastupny dzień vypisali dadomu.
Dalej byli štodzionnyja pieraviazki ŭ paliklinicy. Iryna źviarnułasia ŭ pryvatny miedcentr da viadomaha kiściavoha chirurha ŭ nadziei maksimalna viarnuć estetyčny vyhlad ruce. Apieracyju pryznačyli na 17 lutaha.
«Na žal, niezadoŭha da hetaha pačaŭsia niekroz tkanak u miescy ŭkusu, i pryjšłosia ratavać toje, što jašče možna było vyratavać», — uzdychaje hierainia.
U vyniku Irynie praviali reziekcyju paznohcievaj fałanhi treciaha palca i sfarmiravali amputacyjnuju kuksu. Ale navat praz dva miesiacy paśla apieracyi krovazabieśpiačeńnie ŭ palcy nie adnaviłasia, i vykonvać zvykłyja bytavyja spravy joj usio jašče vielmi niazručna.
«Abodva sabaki vinavatyja»
A što haspadar sabaki? Pavodle słoŭ Iryny, uładalnik sabaki, jaki jaje pakusaŭ, nie prajaŭlaŭ nijakaj inicyjatyvy. Joj pryjšłosia samoj telefanavać jamu ŭ dzień incydentu: daktaram było krytyčna važna viedać, ci pryščeplenaja žyviolina ad šalenstva. U advarotnym vypadku žančynie pryjšłosia b prachodzić balučy kurs antyrabičnaj prafiłaktyki — standartnuju praceduru, kali nieviadoma, ci była ŭ sabaki pryščepka.
«Mnie prysłali tolki fota vietpašparta z paznačeńniem pryščepak, ale nichto navat nie pasprabavaŭ paprasić prabačeńnia».
Paźniej Iryna vyrašyła źviazacca ź Siarhiejem užo aficyjna i 4 sakavika nakiravała jamu list z prapanovaj ab kampiensacyi materyjalnych vydatkaŭ na lačeńnie i nieabchodnych zatrat na pratezavańnie, a taksama ab spahnańni materyjalnaj kampiensacyi maralnaj škody. Na toj momant jana nazvała sumu ŭ 5 tysiač rubloŭ.
«Ja vielmi spadziavałasia, što my znojdziem kampramis. Urešcie, my abodva piensijaniery i mahli b damovicca pa-ludsku», — razvažaje hierainia.
Praź piać dzion Siarhiej paviedamiŭ u miesiendžary, što adpraviŭ adkaz zakaznym listom.
Zakonam nie ŭstanoŭlenyja dakładnyja terminy padačy zajavy ŭ milicyju, ale pry hetym treba ŭličvać vielmi važny niuans: zhodna ź biełaruskim zakanadaŭstvam, administracyjnaje spahnańnie pa artykule 16.30 KaAP («Parušeńnie pravił utrymańnia chatnich žyvioł») moža być nakładziena nie paźniej za dva miesiacy z dnia jaho ździajśnieńnia albo vyjaŭleńnia. To-bok, kali hety termin prajšoŭ, čałavieka nie mohuć pryciahnuć da administracyjnaj adkaznaści, a pačaty praces pavinien być spynieny. Mienavita tamu pravaabaroncy rajać nie marudzić z padačaj zajavy ŭ milicyju.
Incydent u skviery Kotaŭka adbyŭsia 3 lutaha. Nie atrymaŭšy adkazu ŭ ahavorany termin i miarkujučy, što kanstruktyŭnaha dyjałohu ź Siarhiejem nie atrymajecca, 11 sakavika Iryna napisała zajavu ŭ milicyju. Adkaz ad haspadara sabaki pryjšoŭ joj u momant, kali siłaviki ŭžo pačali pravierku pa zajavie.
Rašeńnie suda
Žurnalisty sprabavali źviazacca ź Siarhiejem, kab vysłuchać jaho viersiju padziej, adnak na momant publikacyi atrymać jaho kamientaryj nie ŭdałosia. Tamu pakul možna abapiracca tolki na fakty, vykładzienyja ŭ dakumientach, dadzienych redakcyi Irynaj.
30 sakavika 2026 hoda sud razhledzieŭ incydent u skviery Kotaŭka. Haspadar sabaki, jaki pakusaŭ žančynu, byŭ pryznany vinavatym u ździajśnieńni pravaparušeńnia pa častcy 2 artykuła 16.30 KaAP («Parušeńnie pravił utrymańnia žyvioł, što paciahnuła pryčynieńnie škody zdaroŭju ludziej abo majomaści»).
Sankcyja hetaha artykuła praduhledžvaje štraf ad 10 da 30 bazavych vieličyń, hramadskija raboty abo administracyjny aryšt. U hetym vypadku sud abmiežavaŭsia štrafam pa nižniaj miažy, daŭšy haspadaru sabaki 12 bazavych vieličyń — 540 rubloŭ.
Na sudzie Siarhiej pryznaŭ vinu i patłumačyŭ: 3 lutaha kala adzinaccataj hadziny ranicy jon sapraŭdy vyhulvaŭ svajho sabaku (rostam kala 25 santymietraŭ u karku) biez łancužka i namordnika ŭ nie pryznačanym dla vyhułu miescy. Pavodle słoŭ mužčyny, kali hadavancy sčapilisia, Iryna schapiła svajho sabaku, a jon u hety momant sprabavaŭ adciahnuć svajho. Ale sabaka vyrvaŭsia i znoŭ kinuŭsia ŭ bok žančyny. Samoha momantu ŭkusu haspadar, jak jon zapeŭnivaje, nie bačyŭ — tolki pačuŭ kryk Iryny: «Jon adkusiŭ mnie palec!»
Śviedka zdareńnia, jakaja vyklikała chutkuju, zapomniła detali inakš. Pavodle jaje słoŭ, Siarhiej pačaŭ karmić svajho sabaku, da jaho padyšoŭ sabaka hieraini. Sabaki sčapilisia. Haspadary ich razahnali. Siarhiej sprabavaŭ pryšpilić łancužok, ale sabaka vyrvaŭsia i znoŭ napaŭ.
«Potym ja pačuła kryk. Kali Iryna źniała palčatku, ja ŭbačyła adkusanuju fałanhu palca i vyklikała chutkuju dapamohu», — tłumačyła śviedka ŭ sudzie.
Sama ž Iryna na sudovym pasiadžeńni padkreślivała: sabaka Siarhieja pieršym kinuŭsia na jaje Ajku. Na dumku hieraini, mužčyna praihnaravaŭ pieršy napad, «paśla čaho jahony sabaka druhi raz kinuŭsia» i ŭkusiŭ jaje za ruku.
Haspadar sabaki, jak pisałasia vyšej, pryznaŭ vinu ŭ administracyjnym pravaparušeńni i byŭ aštrafavany. Iryna adznačaje, što sudova-miedycynskaja ekśpiertyza, jakaja pavinna była acanić stupień ciažkaści paškodžańniaŭ, u materyjały spravy da momantu vyniasieńnia rašeńnia ŭ sud nie trapiła.
«My z dačkoj sprabavali vyśvietlić, čamu tak vyjšła, chadzili na pryjom u RUUS. Kali ja pravilna zrazumieła, padciskali terminy: pa zakonie na pryciahnieńnie da administracyjnaj adkaznaści jość usiaho dva miesiacy, i milicyja śpiašałasia pieradać spravu ŭ sud, — kaža hierainia. — Ciapier dumaju: čamu ja adrazu nie napisała zajavu?»
Iryna pryznajecca: jaje ŭłasnaja prystojnaść i niežadańnie «psavać adnosiny z čałaviekam» syhrali suprać jaje.
«Ja advažyłasia na ahałosku tolki dziela adnaho: kab inšyja nie paŭtarali maich pamyłak i viedali, što ŭ takich situacyjach marudzić nielha».
A što ciapier?
Pakul rychtavaŭsia hety materyjał, Irynu aznajomili z vynikami toj samaj zapoźnienaj ekśpiertyzy. Zaklučeńnie ekśpierta było padpisana 31 sakavika — na nastupny dzień paśla taho, jak sud vynies pastanovu.
Praŭda, adkazaŭ na hałoŭnyja pytańni ŭ im niama. Ekśpiert paznačyŭ, što jamu nie dali ŭsie nieabchodnyja miedycynskija dakumienty, tamu ŭstanavić poŭny abjom traŭmaŭ i stupień ich ciažkaści «nie ŭjaŭlajecca mahčymym». Dla paŭnavartasnaj vysnovy patrabujecca peŭny pieralik mieddakumientaŭ.
«Adzinaje, što mnie zastajecca ciapier, — heta padać hramadzianski pazoŭ i ŭ pryvatnym paradku dakazvać, čaho mnie kaštavaŭ hety lutaŭski dzień u skviery Kotaŭka», — kaža Iryna.
Kali na vas napaŭ sabaka: ałharytm dziejańniaŭ ad ekśpierta
«Anłajnier» paprasiŭ staršyniu Asacyjacyi zoaabarončych arhanizacyj Aksanu Davydzienku raskazać pra toje, jak ź jurydyčnaha punktu hledžańnia pavodzić siabie čałavieku, kali na jaho napaŭ sabaka. Nižej — pakrokavy ček-list.
1. Nieadkładna źviarniciesia pa dapamohu. Kali traŭmy surjoznyja, vyklikajcie chutkuju na miesca. Adnačasova telefanujcie pa numary 102. Vyklik narada milicyi adrazu paśla incydentu — najlepšy sposab zafiksavać fakt napadu «pa haračych śladach».
2. Źbiarycie dokazy. Kali traŭma nie patrabuje nieadkładnaj miedycynskaj dapamohi, pastarajciesia zafiksavać situacyju na miescy zdareńnia, vyśvietlić, chto bačyŭ padzieju i moža ŭ dalejšym vystupić śviedkam, ci jość pobač kamiery vonkavaha videanazirańnia. Vaźmicie telefony ŭ śviedak, sami zrabicie fota– i videafiksacyju paškodžańniaŭ, žyvioliny, navakolnaha asiarodździa.
Važna! Vy možacie zdymać tvary ŭsich udzielnikaŭ padziei, uklučajučy mierkavanaha ŭładalnika žyvioły, adnak hetuju infarmacyju nielha pieradavać nikomu, akramia pradstaŭnikoŭ siłavych struktur, a taksama zabaroniena publikavać u sacyjalnych sietkach da vyniasieńnia pastanovy pa spravie sudom.
3. Dajcie poŭnuju infarmacyju pra šalenstva. Padčas akazańnia miedycynskaj dapamohi detalova paviedamicie miedycynskamu piersanału abstaviny atrymańnia traŭmy z metaj pryznačeńnia mahčymaj antyrabičnaj prafiłaktyki.
Važna! Daviedajciesia va ŭładalnika žyvioliny, ci pryščeplenaja jana ad šalenstva i kali tak, to kali i dzie była zroblena pryščepka.
4. Źbirajcie čeki i dakumienty. Pry prachodžańni lačeńnia źbirajcie dokazy paniesienych zatrat (miedycynskija dakumienty, čeki), doktarskija pryznačeńni. Paśla hetyja dakumienty pavinny być padadzienyja dla razboru.
5. Nie marudźcie z zajavaj. Kali nie vyklikali milicyju na miesca, nie čakajučy zakančeńnia lačeńnia, kali heta mahčyma, padajcie piśmovuju zajavu ŭ orhany ŭnutranych spraŭ pa miescy vašaha žycharstva.
Važna! U bolšaści vypadkaŭ termin pryciahnieńnia da administracyjnaj adkaznaści ŭ Biełarusi — usiaho dva miesiacy. Paśla zakančeńnia hetaha terminu pakarać uładalnika štrafam abo aryštam budzie niemahčyma.
Abskardžańnie i hramadzianski pazoŭ. Paśla atrymańnia vynikovaha rašeńnia orhanaŭ unutranych spraŭ abo suda vy majecie prava na jaho abskardžańnie. U paciarpiełaha taksama jość prava na pakryćcio škody, pryčynienaj žyćciu i zdaroŭju, i kampiensacyju maralnaj škody. Kali ŭładalnik admaŭlajecca płacić dobraachvotna, padajcie hramadzianski pazoŭ u sud.
Navukoŭcy śćviardžajuć, što my niapravilna hulajem sa svaimi sabakami. A jak pravilna?
U Homieli sabaka pamior u pakutach, niečym atruciŭšysia na dvary. I heta ŭžo nie pieršy padobny vypadak
Astranaŭtku z «Artemidy-2» sustrakała nie tolki siamja, ale i lubimy sabaka VIDEA
U Vialikabrytanii ŭ adnoj kvatery znajšli 250 pudzielaŭ-«dudlaŭ»
U Viciebsku dziaŭčyna začyniła sabaku ŭ kamiery zachavańnia. Jaje šukaje milicyja
Kamientary
Nu i marazm... chacia, čaho jašče čakać ad "zakonaŭ" na hetaj terytoryi.