Minčuk dźvie hadziny dyktavaŭ machlaram kody z SMS, a potym ździviŭsia, što ŭsie jaho hrošy śpisalisia
U milicyju źviarnuŭsia 59‑hadovy mužčyna, jaki daŭ machlaram dostup da svaich bankaŭskich rachunkaŭ i straciŭ bolš za 25 tysiač rubloŭ.
Pieršapačatkova minčuku patelefanavali ź nieisnujučaj damafonnaj arhanizacyi i prapanavali zamianić klučy. Mužčyna pavieryŭ, bo pa supadzieńni ŭ jaho padjeździe jakraz išoŭ ramont. I nazvaŭ ličby z sms, kab «zabraniravać čarhu», paviedamlaje staličnaja milicyja.
Kankretna hetyja ličby nie mieli nijakaha značeńnia, ale paśla takoj pravierki ašukancy pierakanalisia, što čałaviek pavieryŭ i trapiŭ u ich pastku.
Zatym mužčynu patelefanavali jašče raz i napałochali kryminalnaj adkaznaściu za suviaź sa złačyncami. Jamu zahadali sabrać usie hrošy i praz bank pakłaści na svoj ža rachunak.
Zatym afierysty kala dźviuch hadzin razmaŭlali z mužčynam pa telefonie i patrabavali nazyvać kody z paviedamleńniaŭ ad banka. Jany pierakonvali minčuka, što dapamahajuć jamu pravieryć bałans, a na spravie za piać tranšaŭ vyvieli ŭsie hrošy z asnoŭnaha i nazapašvalnaha rachunkaŭ mužčyny.
Uvieś hety čas jamu zabaraniali zachodzić u asabisty kabiniet u internet-bankinhu. Kali minčanin usio-taki pasprabavaŭ heta zrabić, to ŭbačyŭ, što jaho akaŭnt zabłakiravany. Tady jon zrazumieŭ, što staŭ achviaraj padmanu.
Raspačata kryminalnaja sprava za machlarstva.
Milicyja nahadvaje: kody z sms-paviedamleńniaŭ patrebnyja tolki dla ździajśnieńnia płaciažoŭ abo pieravodu hrošaj. Nie nazyvajcie ich nikomu, kali nie źbirajeciesia ździajśniać takija apieracyi.
Kamientary