U Biełarusi nie pracuje hałoŭnaja birža hruzapieravozak. Jaje sierviery stajali ŭ Kijevie, kudy ciapier bje Rasija
Lardi-Trans — bujnaja łahistyčnaja płatforma, jakaja źviazvaje pieravozčykaŭ i klijentaŭ. Jak Uber, tolki dla biznesu.
Zasnavali «Łardzi-Trans» ukraincy z Charkava ŭ 1999 hodzie. Z 2017 hoda ŭ Biełarusi pracuje pradstaŭnictva — TAA «ŁardziBiełTrans» u Homieli. Birža nie spyniła rabotu ź Biełaruśsiu paśla pačatku vajny.
Biełarusy karystajucca sajtam «Łardzi-Trans» prykładna ŭ dva razy čaściej, čym sajtam asnoŭnaha kankurenta ŭ rehijonie — rasijskaj ATI.su.
Pavodle acenak servisu Similarweb, za červień—žnivień 2026 hoda biełaruski sajt biržy naviedali kala 467 tysiač razoŭ, heta prykładna 155 tysiač vizitaŭ štomiesiac. Amal usie (99,4%) — ź Biełarusi.
Ale ŭžo niekalki dzion jak birža zamovaŭ lahła. Na sajcie visić zahłuška, što płatforma časova niedastupna.
Nie pracuje nie tolki biełaruskaja viersija. Na hałoŭnym sajcie lardi-trans.com kampanija pa-ŭkrainsku i pa-anhlijsku paviedamlaje, što praca adnovicca 29 vieraśnia, i prosić prabačeńnia za niazručnaści. Nie adkryvajucca i navinavy sajt kampanii, i polskaja dy bałharskaja viersii.
Što mienavita zdaryłasia, Lardi-Trans nie tłumačyć. Ale možna vykazać zdahadku, što heta źviazana ź niadaŭnimi rasijskimi bambardziroŭkami.
Z pačatku vieraśnia Rasija sistemna atakuje ŭkrainskija data-centry i vuzły suviazi. Tolki za 23—27 vieraśnia ŭ Kijevie byli paškodžanyja «Parkovy», data-centry Etherlink, «Datahrup» i Cosmonova. Bieź internetu zastavalisia dziasiatki tysiač chatnich haspadarak, ź pierabojami pracavali telekanały.
Pavodle jeŭrapiejskaha rejestra internet-adrasoŭ RIPE, u kampanii jość ułasnaja sietka ŭ kijeŭskim data-centry «Vola».
Suviaź hetaha data-centru ź internetam abarvałasia 23 vieraśnia kala 16:30 pa kijeŭskim časie. U toj dzień Rasija dvojčy ŭdaryła dronami pa kanhresna-vystavačnym centry «Parkavy» ŭ Kijevie, dzie staić takoje abstalavańnie. Techničnymi mietadami možna ŭstanavić, što sierviery «Łardzi» dahetul nie adkazvajuć.
Na dadzieny momant asnoŭnymi paciarpiełymi ad situacyi ŭ Biełarusi možna nazvać nievialija kampanii i IP, zaniatyja ŭ łahistycy (u śfiery transpartu pracuje kožny piaty IP u krainie), jakija nie majuć doŭhich kantraktaŭ na pieravozki. Dla takich pieravozčykaŭ «Łardzi» zastajecca asnoŭnaj krynicaj pošuku zamovaŭ.
Ciapier čytajuć
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha45
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ88
Kamientary