Namieśnikam kiraŭnika Administracyi prezidenta staŭ ćvierdałoby Muraviejka, a Hienštab uznačaliŭ hienierał, jaki nie vučyŭsia ŭ Rasii
Łukašenka pryznačyŭ Paŭła Muraviejku namieśnikam kiraŭnika Administracyi prezidenta. Raniej jon zajmaŭ pasadu načalnika Hienieralnaha štaba Uzbrojenych sił — pieršaha namieśnika ministra abarony. Pryčym pierasadzili na novuju pasadu jaho praz dva dni paśla taho, jak jamu spoŭniłasia 55 hadoŭ.
Hienierał-major Pavieł Muraviejka maje reputacyju ćvierdałobaha navat pa mierkach ciapierašniaj siłavoj viarchoŭki.
55‑hadovy Pavieł Muraviejka naradziŭsia ŭ Marjinaj Horcy 26 vieraśnia 1971 hoda. U 1992‑m skončyŭ Minskaje vyšejšaje vajskova-palityčnaje ahulnavajskovaje vučylišča. Paśla Muraviejka pastupiŭ u minskuju Vajskovuju akademiju, jakuju skončyŭ u 2001-m. Praź niekalki hadoŭ vučyŭsia ŭ Rasii — u Akademii Hienštaba RF. Skončyŭ jaje ŭ 2008‑m z załatym miedalom.
Muraviejka zajmaŭ pasadu načalnika pieršaha ŭpraŭleńnia Hałoŭnaha vajskovaha ŭpraŭleńnia Hienštaba. U 2013‑m jaho pastavili kiravać Hałoŭnym apieratyŭnym upraŭleńniem i dali hienieralskaje zvańnie.
U 2022‑m hienierała pieraviali na pasadu pieršaha namieśnika dziaržaŭnaha sakratara Rady biaśpieki Biełarusi.
Jość u Muraviejki i rasijskaja ŭznaharoda. U 2019 hodzie rasijski pasoł Michaił Babič uručyŭ jamu orden Družby.
Palityk Pavieł Łatuška nazyvaŭ Muraviejku razam z hienierałam Alaksandram Valfovičam rasijskim łobi ŭ biełaruskim siłavym błoku.
Hienštabam Muraviejka kiravaŭ ad 2024 hoda. Tam jon źmianiŭ hienierał-majora Viktara Huleviča, jaki, pa našaj infarmacyi, u 2022 vystupiŭ suprać udziełu biełaruskich vajskoŭcaŭ va ŭvarvańni va Ukrainu.
U Hienštabie Muraviejku, u svaju čarhu, siońnia źmianiŭ hienierał-major Uładzimir Bieły. Bieły zusim niadaŭna, z 8 lipienia 2026 hoda, pracavaŭ namieśnikam ministra abarony. Da taho jon uznačalvaŭ hałoŭnaje ŭpraŭleńnie bajavoj padrychtoŭki Uzbrojenych siłaŭ.
Naradziŭsia jon 17 lutaha 1977 hoda ŭ vioscy Mikałajeŭščyna Staŭbcoŭskaha rajona. Vychodzić, jon ziamlak Jakuba Kołasa.
Jon skončyŭ kamandna-štabny fakultet Vajskovaj akademii z adznakaj i załatym miedalom. A paśla — fakultet Hienieralnaha štaba Uzbrojenych Sił Vajskovaj akademii.
Prajšoŭ šlach ad kamandzira ŭzvoda ŭ 120‑j hvardziejskaj motastrałkovaj dyvizii da namieśnika kamandzira bataljona ŭ 120‑j hvardziejskaj asobnaj miechanizavanaj bryhadzie Paŭnočna-zachodniaha apieratyŭnaha kamandavańnia. Paśla byŭ načalnikam štaba ŭ 19‑j asobnaj miechanizavanaj bryhadzie i 103‑j hvardziejskaj asobnaj mabilnaj bryhadzie, kamandavaŭ hvardziejskaj asobnaj pavietrana-desantnaj bryhadaj, a zatym staŭ načalnikam štaba — pieršym namieśnikam kamandujučaha Siłami śpiecyjalnych apieracyj.
Paźniej Bieły zaniaŭ pasadu načalnika fakulteta Hienieralnaha štaba Uzbrojenych Sił — namieśnika načalnika Vajskovaj akademii Respubliki Biełaruś.
Byŭ kamandujučym Zachodnim apieratyŭnym kamandavańniem.
U adroźnieńnie ad Muraviejki, Uładzimir Bieły ŭ Rasii nie vučyŭsia.
Kamientary