Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ

Hlebu Rybčanku 31 hod. Jon hrodzieniec. Viadoma, što doŭhi čas jon žyŭ u Rasii. Minimum sa studzienia 2020 hoda jon pracavaŭ u AAT «Lesta». Heta rasijskaje padraździaleńnie kampanii «Varhiejminh», jakaja zajmajecca raspracoŭkaj kampjutarnych hulniaŭ, samaja viadomaja ź jakich — World of Tanks.

Pa-za pracaj Hleb — amatar videahulniaŭ, jon šmat času pravodziŭ u tematyčnych čatach. U biełaruskich čatach chłopiec zaŭždy pierapisvaŭsia na rodnaj movie.

Rybčanka zachaplajecca hulniami ad studyi Bethesda — sieryjami The Elder Scrolls i Fallout, a taksama Final Fantasy, Metal Gear Solid i Devil May Cry.

Akramia videahulniaŭ, Hleb lubić nastolnyja rolevyja hulni. Asablivuju prychilnaść jon mieŭ da Tales from the Loop i Things from the Flood — nastolnych ralavych hulniaŭ u žanry navukova-fantastyčnaj retrafuturystyki.

Pavialičyć

Rybčanka jość u źlitaj bazie čornaha śpisa Centrabanka Rasii. Pryčynaj stała admova ŭ ździajśnieńni hrašovaha pieravodu z farmuloŭkaj «apieracyja ździajśniajecca ŭ metach finansavańnia teraryzmu». Padobna, jon sprabavaŭ zadanacić Pałku Kalinoŭskaha z rasijskaj kartki. Adbyłosia heta ŭ sakaviku 2022 hoda.

Jość Hleb i ŭ rasijskaj bazie «Apazicyjaniery», jakuju stvarali rasijskija siłaviki, kab lahčej manitoryć niazhodnych z vajnoj i aktyvistaŭ. Jana źlitaja ŭ sietku.

U kancy 2025 hoda ci ŭ pačatku 2026 hoda Hrodzienski abłasny sud vynies Hlebu Rybčanku prysud adrazu pa vaśmi kryminalnych artykułach.

Jaho abvinavacili ŭ «raspalvańni varožaści» (č. 1 art. 130 KK), «abrazie Łukašenki» (č. 1 art. 368 KK), «paklopie na Łukašenku» (č. 1 i č. 2 art. 367 KK), «dyskredytacyi Biełarusi» (art. 369‑1 KK), «zaklikach da dziejańniaŭ, nakiravanych na škodu Biełarusi» (č. 3 art. 361 KK), «udziele ŭ terarystyčnaj arhanizacyi» (č. 2 art. 290-4), «padrychtoŭcy da ździajśnieńnia terarystyčnaha aktu arhanizavanaj hrupaj abo ŭ vyniku jakoha zahinuŭ čałaviek» (č. 1 art. 13 i č. 3 art. 289 KK) i «padrychtoŭcy da pryviadzieńnia ŭ niahodnaść šlachoŭ znosinaŭ ci transpartnaha srodku» (č. 1 art. 13 i č. 4 art. 309 KK).

Vychodzić, što pa ŭsich sapraŭdy istotnych abvinavačańniach jon ničoha nie zrabiŭ.

Nieviadoma, ci sapraŭdy chłopiec niešta płanavaŭ abo staŭ achviaraj pravakacyi siłavikoŭ. Ale amal napeŭna sprava ŭ niejkich dziejańniach, nakiravanych na padtrymku Ukrainy.

Prysud nieviadomy, ale Hleba sudzili pa rasstrelnym artykule. 

• 0
• 0
• 1
• 1
• 4
• 12
• 46
• 0