Tramp staŭ pieršym za 100 hadoŭ dziejnym prezidentam ZŠA, čyj partret źjaviŭsia na maniecie
Donald Tramp staŭ pieršym za stahodździe dziejnym prezidentam ZŠA, čyj partret raźmiaścili na amierykanskich hrašach. U sieradu Manietny dvor ZŠA vypuściŭ kalekcyjnuju manietu naminałam u adzin dalar, pryśviečanuju 250‑hodździu niezaležnaści krainy, piša Bi-bi-si.
Na maniecie namalavany Tramp, a taksama raźmieščanyja słovy Liberty («Svaboda») i In God we Trust («Na Boha spadziajomsia»). Maniety pradajucca naborami pa 25 štuk za 61 dalar, a miašečak sa 100 manietami kaštuje 154,50 dalara. Praź niekalki hadzin paśla pačatku prodažu na sajcie Manietnaha dvara źjaviłasia paviedamleńnie, što maniety časova skončylisia.
Manietny dvor zajaviŭ, što vypusk źjaŭlajecca častkaj śviatkavańnia 250‑hodździa ZŠA i pavinien stać admietnym dadatkam da sučasnych kalekcyj. Maniety taksama pradajuć praz aŭtamaty ŭ Vašynhtonie, dzie dziejničaje abmiežavańnie — nie bolš za piać maniet u adnyja ruki.
Na vyhlad maniety nahadvajuć załatyja, ale zołata ŭ ich niama. Jany vyrablenyja sa spłavu, jaki na 88,5% składajecca ź miedzi, a astatniaje prypadaje na cynk, marhaniec i nikiel.
U traŭni ministr finansaŭ ZŠA Skot Biesient taksama paviedamlaŭ pra płany vypuścić da 250‑hodździa krainy banknotu naminałam 250 dalaraŭ z partretam Trampa.
Zvyčajna fiederalnaje zakanadaŭstva ZŠA zabaraniaje raźmiaščać vyjavy žyvych ludziej na amierykanskich hrašach. Adnak zakanadaŭstva ŭ dačynieńni da maniet maje peŭnyja asablivaści.
Padčas pieršaha prezidenckaha terminu Trampa byŭ pryniaty zakon 2020 hoda, jaki zabaraniaje źmiaščać vyjavy žyvych ludziej na reviersie maniet, ale nie zabaraniaje heta rabić na aviersie. Mienavita na aviersie novaj maniety i raźmieščany partret Trampa.
Jašče adna norma, viadomaja jak papraŭka Tejera 1866 hoda, zabaraniaje partrety žyvych ludziej na amierykanskich banknotach, ale na maniety jana nie raspaŭsiudžvajecca.
Raniej dziejny prezident ZŠA ŭžo źjaŭlaŭsia na maniecie: Kałvin Kulidž byŭ namalavany na paŭdalara, vypuščanym da 150‑hodździa niezaležnaści ZŠA. Tamu manieta z Trampam stała pieršym padobnym vypadkam za sto hadoŭ.
Ciapier čytajuć
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram16
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary