Rasija zakryje kulturnyja centry niamieckaha Instytuta Hiote paśla rašeńnia Hiermanii spynić pracu Ruskaha doma ŭ Bierlinie ŭ adkaz na ataku dronaŭ u Lejpcyhu, zajaviŭ u čaćvier ministr zamiežnych spraŭ Rasii Siarhiej Łaŭroŭ.
«Viadoma, jany buduć zakrytyja paśla taho, jak naš kulturny centr adtul vyhnali», — zajaviŭ Łaŭroŭ na Uschodnim ekanamičnym forumie va Uładzivastoku, piša VVS.
Hiermanija aficyjna abvinavaciła Rasiju ŭ sprobie dyviersii ŭ suviazi ź incydentam z načynienym vybuchoŭkaj bieśpiłotnikam, jaki miesiac tamu vyjavili ŭ aeraporcie Lejpcyha. Kiraŭnik MZS Hiermanii Johan Vadeful paviedamiŭ, što ŭ adkaz na hetuju sprobu dyviersii Hiermanija zakryje rasijskaje konsulstva ŭ Bonie i Ruski dom u Bierlinie.
U aŭtorak prezident Rasii Uładzimir Pucin abvinavaciŭ Hiermaniju ŭ falsifikacyi dokazaŭ z metaj uskłaści adkaznaść za incydent na Maskvu.
Pavodle Łaŭrova, «u niemcaŭ tut jość adździaleńni Instytuta Hiote — i ŭ Maskvie, i ŭ Piciery, i ŭ Jekaciarynburhu».
«Nu viadoma, jany buduć zakrytyja paśla taho, jak naš kulturny centr adtul vyhnali. Inakš my sami siabie nie budziem pavažać», — skazaŭ ministr.
Pavodle źviestak samoha Instytuta Hiote, treciaje adździaleńnie ŭ Rasii znachodzicca nie ŭ Jekaciarynburhu, a ŭ Navasibirsku.
Pavodle rasijskaha ministra, niamieckija ŭłady «śviadoma iduć na krok, jaki adnaznačna aznačaje spynieńnie ich kulturnaj prysutnaści ŭ Rasijskaj Fiederacyi, jakaja zachoŭvałasia, niahledziačy na ŭsie «ŭkrainskija pierypietyi» ŭ našych adnosinach z Zachadam».
Ciapier, dadaŭ Łaŭroŭ, u ich «nie zastaniecca pramych mahčymaściaŭ pracavać z našym nasielnictvam».
Pieršy Instytut Hiote ŭ Rasii adkryŭsia ŭ Maskvie ŭ 1992 hodzie, nieŭzabavie paśla raspadu Savieckaha Sajuza.
Minskija ŭłady raskazali, jak buduć zmahacca z «akijanam aŭtamabilaŭ» u dvarach2
Kamientary