Chto ŭziaŭ novuju «Džyli» z sałona ŭ kredyt i praz hod-dva nie škaduje? Mierkavańni padzialilisia
Ad «sprabavaŭ jeździć na Geely — nie daj boh bolš» da «sprytnaja, vysokaja, usio padabajecca».
Biełarus u Threads spytaŭ ułaśnikaŭ Geely i Belgee, ci zadavoleny jany svaimi mašynami.
«Chto realna ŭziaŭ novuju z sałona ŭ kredyt i praz hod-dva nie škaduje? Ciapier na darohach kožny druhi — na «Emhrandzie» abo «Kułrei», ale mierkavańni ŭ internecie jak zaŭsiody dzielacca: adny kajfujuć ad harantyi i pachu novaj mašyny, inšyja plujucca i kažuć, što «lepš by ŭziaŭ Pasat B8 ź Jeŭropy». Jak vam zborka? Što pa raschodzie i ci realna servis u nas spraŭlajecca, kali niešta lacić?», — pacikaviŭsia mužčyna.
Dopis nabraŭ bolš za 100 tysiač prahladaŭ i 430 kamientaroŭ jak ad tych, chto nabyŭ Geely, tak i ad tych, chto addaŭ pieravahu patrymanym aŭto ź Jeŭropy abo ZŠA.
«Vielmi zadavolenyja i ciapier znoŭ by kupili»
«Nabyli X50 paŭtara hoda tamu, prabieh 20 tysiač, vielmi zadavolenyja i ciapier znoŭ by kupili. Uzimku raschod 12 litraŭ, letam 9—10. Sprytnaja, vysokaja, usio padabajecca. Servis spraŭlajecca dobra».
Čałaviek, jaki druhi hod vałodaje siedanam Emgrand, śćviardžaje, što jamu ŭsio padabajecca.
«Płaciažy pasilnyja, pach novaj mašyny, ni adzin amierykaniec abo jeŭrapiejec da mianie ŭ sałonie nie bździeŭ, ničoha nie lacić i nie rypaje, zavodzicca ŭ paŭtyčka navat u niadaŭnija minus 29».
Žančyna, jakaja ŭ 2024‑m kupiła novuju Geely Tugella, kaža, što ŭ poŭnym zachapleńni ad aŭto da hetaha času.
I nazyvaje tolki adzin niuans — raschod paliva amal 13 litraŭ pa horadzie.
Na niemały raschod paliva ŭ kamientarach skardziacca davoli časta. Navat z abjomam 1,5 litra heta kala 10 litraŭ pa horadzie.
«Geely Atlas braŭ novym roŭna 7 hadoŭ tamu. Nijakich prablem z mašynaj nie było naohuł», — koratka apisvaje dośvied ekspłuatacyi mužčyna.
Inšy biełarus, jaki za 6 hadoŭ źmianiŭ užo dva Geely Atlas (2020 i 2025 hadoŭ vypusku) taksama śćviardžaje, što nie mieŭ prablem z mašynami.
Admietna, što siarod kamientataraŭ niamała tych, chto ŭžo paśpieŭ zamianić adnu madel Geely na inšuju.
«Spačatku z aściarohaj byŭ nabyty Coolray. Katalisia hady čatyry biez narakańniaŭ. Ciapier uziali Atlas New, i ŭsio vydatna», — piša inšy kamientatar.
Nie vielmi zadavolenyja kuplaj taksama jość.
Dziaŭčyna navat prymacavała foty kryški bahažnika z karozijaj na dvuchhadovym aŭto. Ahułam jana piša, što zadavolenaść mašynaj u jaje 50/50.
Prybrać karoziju dyler abiacaje pa harantyi.
«Aŭto z Amieryki tańniej, bolš opcyj, vyšejšaja nadziejnaść»
Adhuknulisia i tyja, chto zamiest novaha kitajska-biełaruskaha aŭto nabyŭ patrymanuju mašynu ź Jeŭropy.
«My i ŭziali VW Passat B8 — adpad poŭny! Nie paraŭnajecca ŭzrovień kamfortu z Coolray (X50) i ŭžo tym bolš z Emgrand (S50)», — piša žančyna, jakaja da hetaha brała Geely ŭ karšerynhu.
Inšy čałaviek napisaŭ, što dva hady tamu pryhnaŭ ź Bielhii dyzielny Peugeot 508 va ŭniviersale 2019 hoda z prabieham krychu mienš za 90 tysiač kiłamietraŭ.
«Adno zachapleńnie. Sprabavaŭ jeździć na Geely. Nie daj boh bolš. Lepš užo Jeŭropa», — piša mužčyna.
Aproč vodhukaŭ na temu taho, ci jakasnaje heta aŭto, niekatoryja źviartali ŭvahu i na finansavy bok.
Čałaviek, jaki adjeździŭ na Geely Coolray try hady i 110 tysiač kiłamietraŭ, kaža, što kuplaŭ aŭto za 25 000 dalaraŭ, a pradaŭ za 14 000 dalaraŭ.
«Voś i ŭsia matematyka», — kaža jon i dalej pieraličvaje, što za hety čas było zroblena pa harantyi: try elemienty pierafarbavanyja pa harantyi, na čaćviortym elemiencie harantyja skončyłasia. Zamiena stojki stabilizatara pa harantyi na 25 000 kiłamietrach prabiehu. Pierastała pracavać kamiera zadniaha vidu na 40 000 kiłamietraŭ, dostup biez kluča — na 50 000 kiłamietrach. Paśla 80 000 kiłamietraŭ pačali źjaŭlacca hluki ŭ pracy multymiedyja, pryčynu tak i nie znajšli, paśla 100 000 kiłamietraŭ pierastali pracavać parktroniki.
U vyniku paśla prodažu Geely Coolray mužčyna nabyŭ sabie bitaje aŭto z Amieryki.
«Tańniej, bolš opcyj, vyšejšaja nadziejnaść, vyšejšaja likvidnaść», — ličyć jon.
Inšy kamientatar, jaki zadumvaŭsia ŭziać Geely, taksama spasyłajecca na vialikija finansavyja straty ŭ vypadku kupli novaha aŭto zamiest patrymanaha. Jon pryvodzić svoj raźlik koštu kiłamietra na novym i patrymanym aŭto.
«Jon dva razy vyšejšy ŭ paraŭnańni z b/u rynkam. U mianie, naprykład, pa ŭsich raźlikach adzin kiłamietr ruchu kaštuje $0,23. U novaj mašyny heta budzie $0,40 minimum za košt finansavych strat pry kupli z sałona».
Aproč hetaha, kamientatar śćviardžaje, što mašyny hetaha brendu nikomu nie patrebnyja na druhasnym rynku za najaŭnyja, pakolki ŭsie ich pakupniki iduć pa kredytnyja prahramy, tamu pradać takoje aŭto paśla budzie składana.
Pytańnie pra likvidnaść davoli papularnaje.
A kab zrazumieć, ci padabajecca vam taja ci inšaja Geely/Belgee, niekatoryja rajać spačatku pakatacca na ich u karšerynhu.
Kamientary
A što nie tak z matematykaj? Prabieh vyšej za 100tys, chaj dziakuj skaža što ŭvohule pradaŭ za 14.