Palitviazień Mikałaj Aŭtuchovič pieraviedzieny z kałonii № 14 u Navasadach u hrodzienskuju turmu № 1, paviedamiła «Radyjo Svabodzie» daśviedčanaja krynica. Sa słoŭ hetaj krynicy, u hrodzienskaj turmie Aŭtuchovič znachodzicca z 31 studzienia.
Rašeńnie ab pieravodzie Aŭtuchoviča na turemny režym vyjazny sud pryniaŭ u kałonii 23 studzienia. Na kolki hadoŭ Mikałaja Aŭtuchoviča znoŭ pieraviali na turemny režym, dahetul nieviadoma.
Pavodle słoŭ krynicy, Mikałaj Aŭtuchovič apynuŭsia ŭ toj ža kamiery, dzie byŭ da pieravodu z hrodzienskaj turmy ŭ Navasady ŭ kancy 2025 hoda.
«Etap zaniaŭ adzin dzień, užo 31 studzienia byŭ u byłoj kamiery. Z prablem tolki toje, što nie ŭsio ź jahonych rečaŭ jamu addali», — paviedamiła krynica.
Stan zdaroŭja Aŭtuchoviča, pavodle krynicy, raniejšy:
«Z zubami zaŭsiody prablema, ale skazaŭ, kab za jaho nie chvalavalisia».
U hrodzienskaj turmie № 1 Mikałaj Aŭtuchovič prabyŭ bolš za try hady z ahulnaha terminu 25 hadoŭ, jaki jamu pryznačyŭ sud u 2022 hodzie. U kałoniju ŭ Navasadach palitviaźnia pieraviali ŭ kancy minułaha hoda, pakolki ŭ jaho skončyŭsia termin znachodžańnia mienavita na turemnym režymie, ale ŭžo praz try tydni na novym miescy nad Aŭtuchovičam znoŭ adbyŭsia sud, jaki druhim razam pryznačyŭ jamu turemny režym. Za što dadatkova pakarali palitviaźnia, nieviadoma.
Byłoha pradprymalnika z Vaŭkavyska, pravaabaroncu i aktyvista Mikałaja Aŭtuchoviča zatrymali ŭ śniežni 2020 hoda, a ŭ kastryčniku 2022‑ha asudzili na 25 hadoŭ źniavoleńnia pavodle 10 artykułaŭ Kryminalnaha kodeksa, uklučna z takimi ciažkimi, jak «akt teraryzmu» i «zmova z metaj zachopu ŭłady niekanstytucyjnym šlacham». Pavodle prysudu, pieršyja 5 hadoŭ jon musiŭ adbyć na turemnym režymie.
Heta ŭžo treciaje źniavoleńnie Mikałaja Aŭtuchoviča. Pieršaje było z kastryčnika 2005 hoda da studzienia 2008-ha. Druhoje — ź lutaha 2009‑ha da krasavika 2014 hoda, pryčym bolš za dva hady da kanca terminu jon pravioŭ u hrodzienskaj turmie.
Mikałaja Aŭtuchoviča miesiac patrymali ŭ kałonii pad Barysavam i znoŭ adpravili na turemny režym
Sieviaryniec: Aŭtuchoviča ŭ turmie pryznajuć lehiendaj navat tyja, chto supracoŭničaje z administracyjaj. Jon kremień
«Terarystka» Dzierbyš, jakaja atrymała 20 hadoŭ: Śledčy prapanoŭvaŭ abyłhać Aŭtuchoviča ŭ abmien na lahčejšaje pakarańnie
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary