Škołu dla dziaciej ź psichičnymi asablivaściami ŭ Minsku pierarobiać u kadeckaje vučylišča. Da realizacyi išli 18 hadoŭ
Hety budynak u cichim minskim dvary ŭžo stanaviŭsia centram hučnaha skandału, kali ŭłady zakryli adzinuju škołu dla «asablivych» dziaciej dziela stvareńnia militaryzavanaj ustanovy. Tady kadety tam tak i nie źjavilisia, ale praz dva dziesiacihodździ čynoŭniki vyrašyli davieści zadumu da kanca. Ciapier tut płanujuć pabudavać maštabny kompleks ź ciram, płacam i internatam.
Administracyja Frunzienskaha rajona vyniesła na hramadskaje abmierkavańnie architekturna-płanirovačnuju kancepcyju maštabnaj rekanstrukcyi budynka pa vulicy Prytyckaha, 16. Havorka idzie pra typovy školny budynak 1965 hoda pabudovy, schavany ŭ žyłym dvary niedaloka ad stancyi mietro «Puškinskaja».
Siońnia hetyja płoščy addadzieny dzieciam: tut raźmiaščajucca šmatlikija siekcyi Fizkulturna-spartyŭnaha centra dziaciej i moładzi Frunzienskaha rajona, a taksama hurtki centra techničnaj i mastackaj tvorčaści «Zorka».
Adnak nieŭzabavie spartyŭnaje žyćcio sastupić miesca kazarmiennamu paradku: zhodna z prajektam, tut źjavicca Kadeckaje vučylišča HUUS Minharvykankama.
Što źmieniać
Zhodna z pradstaŭlenymi dakumientami, raspracavanymi TAA «NikaPrajekt» pa zakazie UKB Savieckaha rajona, kompleks čakajuć tatalnyja pieraŭtvareńni. Jaho ahulnaja płošča vyraście bolš čym udvaja — ź ciapierašnich 4 300 da 11 000 kvadratnych mietraŭ.
Hałoŭnyja źmieny zakranuć try asnoŭnyja zony. U pieršuju čarhu pad znos pojdzie isny spartyŭny korpus. Zamiest jaho budaŭniki ŭźviaduć vialiki błok ź dźviuma spartyŭnymi załami dla hulniaŭ i fizkultury, trenažornaj i chareahrafičnaj załami, a taksama pamiaškańniami dla ramontu łyž. Asablivaściu hetaha novaha abjekta stanie zakryty cir dla stralby ź pnieŭmatyčnaj zbroi.
Źniasuć taksama i asobny adnapaviarchovy budynak starych školnych majsterniaŭ. Na vyzvalenym miescy źjavicca čatyrochpaviarchovy internat dla pražyvańnia kursantaŭ. Žyły błok budzie raźličany na 192 čałavieka. Miarkujecca, što tut pasielać 168 chłopcaŭ i 24 dziaŭčyny. U hetym ža korpusie abstalujuć miedycynski błok i nieabchodnyja haspadarča-bytavyja pamiaškańni.
Maštabnaja pierabudova čakaje i hałoŭny navučalny korpus. U im zrobiać poŭnuju pierapłaniroŭku, arhanizujuć paŭnavartasny charčabłok z vytvorčym cykłam i nadbudujuć jašče adzin pavierch. Mienavita tam raźmieścicca prastornaja aktavaja zała z estradaj na 235 miescaŭ. Dadatkova dla patreb vučylišča abstalujuć kanfierenc-zału i śpiecyjalnaje pamiaškańnie dla muziejnaj ekspazicyi. Usiu terytoryju vakoł kompleksu abharodziać, na ŭnutranym dvary źjavicca abaviazkovy stroj-płac, a na stadyjonie całkam abnoviać pakryćcio biehavych darožak i spartyŭny hazon.
Jak źmianiŭsia prajekt za dva hady
Varta adznačyć, što ŭłady ŭžo padstupalisia da hetaha abjekta zusim niadaŭna. Letam 2024 hoda prajekt rekanstrukcyi ŭžo vynosili na hramadskaje abmierkavańnie, adnak tady jon vyhladaŭ kudy bolš ścipła.
Za dva hady kancepcyja kardynalna razrasłasia. Kali ŭ 2024 hodzie ahulnuju płošču budynka płanavali pavialičyć da 7,2 tysiačy kvadratnych mietraŭ, to ŭ viersii 2026 hoda ličba skoknuła amal da 11 tysiač kvadrataŭ. Budaŭničy abjom vyras z 33 tysiač kubamietraŭ da 50 tysiač.
Z čym źviazany taki razmach? U pieršaj viersii prajekta, jakuju raspracoŭvaŭ dziaržaŭny «Biełžyłprajekt», płanavałasia tolki prybudova spalnaha korpusa. U ciapierašnim varyjancie, jaki raspracoŭvaje pryvatnaje TAA «NikaPrajekt», dadaŭsia poŭny znos staroha spartyŭnaha korpusa i budaŭnictva na jaho miescy novaha, a taksama nadbudova cełaha paviercha z aktavaj załaj.
Jak zakryli škołu dla «asablivych» dziaciej
Hety prajekt stavić kropku ŭ daŭniaj i dramatyčnaj historyi budynka. Da 2008 hoda tut raźmiaščałasia bazavaja škoła №9 dla dziaciej z asablivaściami psichafizičnaha raźvićcia. Heta była ŭnikalnaja dla horada ŭstanova, kudy nakiroŭvali dziaciej z hipieraktyŭnaściu i pavodnickimi prablemami — tych, kamu było ciažka abo ŭvohule niemahčyma adaptavacca ŭ zvyčajnych kłasach.
U 2008 hodzie Minharvykankam pryniaŭ rašeńnie ab likvidacyi škoły.
Aficyjna heta tłumačyłasia aptymizacyjaj, «nierentabielnaściu» i — samaje hałoŭnaje — nieabchodnaściu stvareńnia na jaje bazie kadeckaha korpusa Frunzienskaha rajona Minska. Ułady zajaŭlali, što heta robicca «ŭ metach pavyšeńnia jakaści idejna-patryjatyčnaha vychavańnia padrastajučaha pakaleńnia».
Baćki papiaredžvali čynoŭnikaŭ, što prymusovaje intehravańnie ich dziaciej u zvyčajnyja škoły pryviadzie da niervovych zryvaŭ i kanfliktaŭ. Adnak pratesty i prapanovy baćkoŭ zastalisia niepačutymi — škołu zakryli.
Ale paradoks situacyi zaklučaŭsia ŭ tym, što abiacany «kadecki korpus» u budynku tak i nie źjaviŭsia. Pustyja płoščy zaniali spartyŭnyja i tvorčyja hurtki. Spatrebiłasia 18 hadoŭ, kab na miescy zakrytaj škoły ŭłady ŭsio ž prystupili da stvareńnia taho samaha kadeckaha vučylišča — ciapier užo pad niepasrednym patranažam milicyi.
Jak pryniać udzieł u abmierkavańni
Hramadskaje abmierkavańnie prajekta rekanstrukcyi prachodzić z 4 pa 18 sakavika 2026 hoda. Usie achvotnyja mohuć aznajomicca z materyjałami na aficyjnym sajcie administracyi Frunzienskaha rajona ŭ raździele «Hramadskaje abmierkavańnie» abo ŭžyvuju ŭ faje na pieršym paviersie administracyi pa vulicy Kalvaryjskaj, 39, z 9:00 da 20:00.
Svaje zaŭvahi i prapanovy hramadzianie mohuć pakinuć u śpiecyjalnym časopisie ŭ faje ŭstanovy, nakiravać ich piśmova pa paštovym adrasie administracyi abo dasłać na elektronnuju poštu ([email protected]) z abaviazkovaj paznakaj «hramadskaje abmierkavańnie». Usie sabranyja zvaroty buduć razhledžany na architekturna-horadabudaŭničaj radzie pry hałoŭnym architektary Minska.
Ciapier čytajuć
Biełaruska kliča na viasielle zorku «Univiera», jaki za vajnu. Uprehsia ŭvieś Threads13
Kamientary
U krainie, dzie nie chapaje padtrymki dla takich dziaciej, ułady znoŭ vybirajuć nie adukacyju, a militaryzacyju. Pryjarytety sistemy vielmi vyraznyja: nie dapamahčy słabym, a vychoŭvać pasłuchmianych