U syna Chamieniei jość elitnaja nieruchomaść u Łondanie pad bokam u izrailskaj ambasady
Pavodle infarmacyi ahienctva Bloomberg sa spasyłkaj na dakumienty ab ułasnaści, Madžtaba Chamieniei — syn zabitaha viarchoŭnaha lidara Irana i mahčymy jaho pierajemnik — vałodaje dźviuma raskošnymi kvaterami ŭ rajonie Kiensinhtan u Łondanie, prykładna za 50 mietraŭ ad pasolstva Izraila.
Ahulny košt hetaj nieruchomaści aceńvajecca prykładna na 50 miljonaŭ funtaŭ sterlinhaŭ (bolš za 67 miljonaŭ dalaraŭ). Apartamienty znachodziacca na šostym i siomym pavierchach elitnaha žyłoha kompleksu i ŭklučajuć pamiaškańni dla absłuhi.
Pieršuju kvateru nabyli ŭ 2014 hodzie, druhuju — praz dva hady. Farmalna ŭłaśnikam ličyŭsia iranski biznesmien Ali Ansary, jakoha ŚMI nazyvajuć davieranaj asobaj siamji Chamieniei.
Paźniej ułady Vialikabrytanii abvinavacili Ansary ŭ finansavańni Korpusa vartavych isłamskaj revalucyi i ŭviali abmiežavańni na ŭsie apieracyi z łondanskaj nieruchomaściu, aformlenaj na jaho imia.
Ekśpierty, apytanyja Bloomberg, vykazali zaniepakojenaść tym, što apartamienty čałavieka, jakoha nazyvajuć hałoŭnym kandydatam na pasadu viarchoŭnaha lidara Irana, znachodziacca tak blizka da izrailskaha pasolstva. Były dyrektar pa biaśpiecy apazicyjnaha telekanała Iran International Rodžer Makmiłan vykazaŭ zdahadku, što hetyja kvatery mahli vykarystoŭvacca jak punkt nazirańnia za supracoŭnikami i naviedvalnikami dypmisii, što dazvalała adsočvać ich pieramiaščeńni i patencyjna pierachoplivać razmovy na adkrytych terytoryjach ambasady.
Pavodle źviestak Bloomberg, łondanskaja nieruchomaść Madžtaby Chamieniei moža nie abmiažoŭvacca hetymi dźviuma kvaterami. Miarkujecca, što jon taksama kantraluje jašče 11 abjektaŭ u prestyžnym rajonie Chempsted na poŭnačy Łondana, viadomym jak «vulica miljarderaŭ». Farmalna jon nie značycca ich uładalnikam, ale, pavodle niekatorych źviestak, kiruje hetaj ułasnaściu praź źviazanyja ź im kampanii.
Ahulny košt hetaj nieruchomaści aceńvajecca prykładna na 200 miljonaŭ funtaŭ sterlinhaŭ (kala 270 miljonaŭ dalaraŭ). Pry hetym niekatoryja damy pustujuć abo navat znachodziacca ŭ zaniadbanym stanie.
Iranskija ŭłady ŭžo paviedamili, što kandydatura pierajemnika viarchoŭnaha lidara krainy ŭzhodnienaja, ale budzie abvieščanaja paźniej. U toj ža čas ŚMI paviedamlajuć pra nibyta raskoł u kiroŭnaj elicie Irana, dzie daŭno naziraŭsia kanflikt pamiž kansiervatarami i bolš radykalnaj hrupaj «jastrabaŭ», jaki raniej strymlivaŭsia aŭtarytetam zahinułaha 86‑hadovaha Ali Chamieniei.
Syn zabitaha Ali Chamieniei byŭ paranieny padčas adnoj z atak. Jaho praročać u novyja Viarchoŭnyja lidary
Tramp zajaviŭ, što pavinien udzielničać u vybary novaha lidara Irana
Aktyŭny palityk ź idejami isłamskaj revalucyi, bolš radykalny, čym baćka. Chto taki Madžtaba Chamieniei
Izrail budzie ličyć luboha novaha lidara Irana «biezumoŭnaj mišeńniu dla likvidacyi»
Novym kiraŭnikom Irana abrali syna zabitaha ajatały Chamieniei — iranskija emihranckija ŚMI
Ciapier čytajuć
Chto pradaŭ kvateru ŭ «Majaku Minska» źnikłaj Mielnikavaj? Takoha čałavieka nie isnuje14
Kamientary