Śledčy kamitet Biełarusi nabyŭ suvienirnyja hadzińniki pa 800 dalaraŭ

Heta vynikaje z dadzienych tendaru, praviedzienaha na sajcie dziaržaŭnych zakupaŭ. Krynica finansavańnia — dziaržaŭny biudžet. U dakumentach zakupki nie ŭdakładniajecca, kamu pryznačanyja hetyja kaštoŭnyja hadzińniki.

Pry hetym ich cana amal roŭnaja siaredniamu zarobku ŭ Biełarusi za 2025 hod, jaki, zhodna sa źviestkami Dziaržaŭnaha statystyčnaha kamitetu, składaŭ 2693 rubli.

Damovu na vyrab takich hadzińnikaŭ pavodle admysłovaj zamovy Śledčy kamitet padpisaŭ ź Mienskim hadzińnikavym zavodam «Łuč» 13 listapada, a pastavić ich mieli da 22 śniežnia 2025 hodu.

U zajaŭcy na zakupku paznačana, što hadzińniki pavinny być mužčynskija ź miechanizmam «Łuč 2616M». U dužkach hetaja madel rasšyfravanaja jak šviejcarski miechanizm SW200-1A.

Siarod inšych patrabavańniaŭ — ramieńčyk z naturalnaj skury, sapfiravaje škło z antyblikam ź piaredniaha boku, zadniaja nakryŭka korpusu ź minieralnaha škła, najaŭnaść kalendara. Da hadzińnika pavinna być vyrablenaja padarunkavaja draŭlanaja ŭpakoŭka z hraviravańniem.

U razmovie z Svabodaj były supracoŭnik zavodu «Łuč» paćvierdziŭ, što takoje apisańnie hadzińnika padychodzić pad paramietry premijalnaj kalekcyi zavodu pad nazvaj «Siryjus». Jak adznačyŭ surazmoŭca, heta najdaražejšyja hadzińniki pradpryjemstva.

«Kali ja tam pracavaŭ, jany mienš kaštavali, zdajecca, kala 400 dalaraŭ, ale ciapier na ŭsio ceny padnialisia. Hetaja madel całkam z Kitaju prychodzić, tam šviejcarski miechanizm, a na «Łučy» tolki zborka», — skazaŭ surazmoŭca.

I sapraŭdy, na aficyjnym sajcie «Łuča» možna znajści niekalki varyjantaŭ hadzińnikaŭ z kalekcyi «Siryjus», cana jakich akurat kala 800 dalaraŭ.

Jak adznačyŭ były supracoŭnik zavodu «Łuč», dziaržaŭnyja orhany mieli zaviadzionku zamaŭlać takija hadzińniki i raniej, ale kalekcyju «Siryjus» zamaŭlali zvyčajna tolki «najvyšejšamu kiraŭnictvu».

«Kali niechta raniej zamaŭlaŭ dla supracoŭnikaŭ partyju zvyčajnych hadzińnikaŭ, časam u jakaści suvieniraŭ prasili jašče asobna dla kiraŭnictva najdaražejšyja, i mienavita voś hetuju kalekcyju ŭ tym liku zavod im prapanoŭvaŭ».

Heta nie adziny vypadak kupli suvieniraŭ centralnym aparatam Śledčaha kamiteta. Na sajcie dziaržaŭnych zakupaŭ jość niekalki padobnych tendaraŭ, ź jakich vynikaje, što za minuły hod dla patrebaŭ hetaha dziaržaŭnaha orhanu za biudžetnyja srodki nabyli kala 168 naručnych suvienirnych hadzińnikaŭ na sumu prykładna 161 tysiača rubloŭ, abo amal 53 tysiačy dalaraŭ.

• 0
• 0
• 2
• 0
• 0
• 0
• 1
• 0