«Nie Dzień Voli, a tydzień». Sieviaryniec raskazaŭ pra padrychtoŭku śviatkavańnia 25 Sakavika
Palityk i były palitviazień, jaki byŭ abrany staršyniom arhkamitetu ŭ spravie śviatkavańnia Dnia Voli, u efiry «Studyi Biełsat» padzialiŭsia płanami datyčna adznačeńnia 108‑j hadaviny abviaščeńnia niezaležnaści Biełaruskaj Narodnaj Respubliki.
Pavieł Sieviaryniec padkreśliŭ, što arhkamitet nie kiruje arhanizacyjaj śviatkavańnia, a dapamahaje biełarusam i kaardynuje ich dziejańni dziela supolnaha adznačeńnia. Pavodle jaho, arhkamitet źviazaŭsia z aktyvistami ŭ roznych miascovaściach u bolš jak 30 krainach, jakija płanujuć śviatkavać Dzień Voli.
«Heta dzień, jaki źjaŭlajecca centralnym biełaruskim dniom i dla biełarusaŭ za miažoj, i dla biełarusaŭ u samoj Biełarusi. I tamu vyjści na śviata ŭ hety dzień budzie peŭnym pakaźnikam ahułam biełaruskaha ruchu. … Sioletniaja viasna natchnialnaja šmat u čym. Chistajucca tyraničnyja režymy ŭ śviecie, vyzvaleńnie palitviaźniaŭ idzie płyń za płyńniu. I jość peŭnaja nadzieja», — padkreśliŭ palityk.
Pavodle jaho, płanujecca praviadzieńnie socień akcyj u roznych haradach i krainach. Jany buduć ładzicca ŭ samych roznych farmatach: šeści, kancerty, mitynhi, aŭtaprabiehi, hulni, kulturnickija imprezy. Usio heta płanujecca źvieści ŭ adzinuju afišu, kab infarmavać hramadstva.
Najbujniejšyja akcyi i mierapryjemstvy ŭzhadniajucca ciapier z pradstaŭnikami miascovych uładaŭ u najbujniejšych haradach ź biełaruskaj prysutnaściu. Pakolki 25 sakavika vypadaje sioleta na sieradu, to śviatkavańni pačnucca raniej.
Hetak, 21 sakavika zapłanavanaje bujnaja akcyja ŭ Biełastoku, 25 — u Vilni i 28 — u Varšavie.
«Takim čynam, my majem nie Dzień Voli, a ceły tydzień voli. I šmat jakija mierapryjemstvy ŭnutry hetaha tydnia buduć prosta rassypanyja, buduć niaspynnaj nahodaj hetaha Tydniu Voli», — skazaŭ kiraŭnik arhkamitetu.
Sieviaryniec adznačyŭ, što ŭ sioletnim arhkamitecie adčuvajecca adzinstva ludziej dziejańnia, jakija «razumiejuć adzin adnaho z paŭsłova». Jon padkreśliŭ, što ŭ pytańniach śviatkavańnia razmaŭlaŭ ź ludźmi absalutna roznych pohladaŭ: i sa Śviatłanaj Cichanoŭskaj, i ź Zianonam Paźniakom, i z Maryjaj Kaleśnikavaj, i z Alesiem Bialackim.
«Byli tyja, chto nie hatovy ŭdzielničać u ahulnym farmacie. Ale ŭ rešcie Dzień Voli buduć śviatkavać tak ci inakš usie. Tamu ja dumaju, što asnoŭnaja častka biełarusaŭ budzie abmieńvacca infarmacyjaj i skarystajecca z ahulnaha płanu», — skazaŭ jon, vykazaŭšy spadzieŭ na toje, što «biełarusy zdolnyja davieści, što Biełaruś žyvie».
Pakul kankretnyja daty i miescy śviatkavańnia nie nazyvajucca, bo ŭ šmat jakich vypadkach praciahvajucca jašče arhanizacyjnyja dziejańni i arhanizujucca damoŭlenaści z uładami. Pry hetym, naprykład, u Kanadzie i ZŠA ŭ peŭnych vypadkach užo jość całkam hatovy scenar vystupleńniaŭ. Płanujucca imprezy i va Ukrainie: Kijevie dy Lvovie, choć tamu z abviestkami jašče ciažej praz vajskovaje stanovišča.
2 sakavika adbyłosja pieršaje pasiadžeńnie arhkamitetu ŭ spravie śviatkavańnia Dnia Voli. U im uziali ŭdzieł pradstaŭniki Abjadnanaha pierachodnaha kabinietu, Ofisu Śviatłany Cichanoŭskaj, palityčnych partyj, a taksama suarhanizatary akcyj u Vilni i Varšavie. Pa vynikach hałasavańnia na pasadu staršyni arhkamitetu byŭ abrany Pavieł Sieviaryniec.
Meta arhkamitetu — vyznačyć ahulnyja pryjarytety i asnoŭnyja pasłańni sioletniaha śviatkavańnia Dnia Voli, a taksama kaardynavać i padtrymlivać arhanizacyju padziej biełaruskimi dyjasparami ŭ roznych haradach i krainach. Zadača — spryjać najlepšaj kaardynacyi pamiž inicyjatyvami i arhanizatarami.
Kamientary